Read Medumba 1 Fenfen 17 Bible Online

1 Fenfen 17 - Medumba bible

1 Fenfen 17

¹Elia ze Tishbi, mo' ze Galad tshob Akab ndù: A tshùa num lén Tshùaben Nsi Israél ze me be ngafa' i là, me tshob ndù mbaṅ ke meme' lo ke nsi be num tshen ngu'njù li, ke be ndù me bèn ntshobe.

²Yen nà be tôge, Tshùaben tshob yi ndù:

³Lo nsen ni, nèn nze bag ntumnyam, ndem mbaṅ fub Kerit s'a be mbwe Yordan nà.

⁴O nsi ke nu ntse fube, m'a' tshob ba mala ndù bo ke nkém o bwe.

⁵A nèn, ngù be ndaṅndaṅ mba Tshùaben tshob yi là, nèn ntswe mbaṅ fub Kerit s'a be mbwe Yordan nà.

⁶Ba mala nke nse' mfà bàn bo mbàb yi nkebnjù, mfà bàn bo mbàb yi mfetnjù, a nke nu ntse mi a fub là.

⁷Là, a be ghubte mo' mén ngelaṅ, fub jumte, nummb'a lo tswe neshu mba mbaṅ ke' lo ntùm ngô là.

⁸Ndùlala Tshùaben tshob yi ndù:

⁹Lo nsi, nèn Sarepta z'a b'a tsha' Sidon nà, ntswe bwe. Mo' mènnzwi num bwe, mb'a mfôge. M'a' tshob yi ndù a ke nkém o.

¹⁰A lo nsi, nèn Sarepta. Mb'a ke ntsho tusô là, a yen ta' mènnzwi, mfôge, a nke ntswitte ntshwèn. Elia tsiaṅ i ntshob yi ndù: Me le't'o, nèn ndiag mén ntse là ntùm tshaṅ nse' mfà me me nu.

¹¹A nèn ndo'o, Elia bèn ntsiaṅ i ntshob ndù: Netsho'o, lo' mba meke' bàn njab bu o nse' mfà me.

¹²Mènnzwi là tshob ndù: Num lén Tshùaben Nsi o z'a be ntùn nà, me ke' ghù sàm mfé bàn ntùm ndà. Me ghù bon mbab bàn bo metsit mfèt ntùm nda. Me ke ntswitte nta' ntshwèn bàa nèn na à yi bag nshum àm jù kà njôg nkwù.

¹³Elia tshob yi ndù: Kà bwôg, bèn njam ndà ngù mb'o tshob là. Nda' ndù bwôgmbwe nkate meju tag nse' mfà me, kà njôg nabte zin bin nshum o.

¹⁴Nummbe tshù ju ze Tshùaben Nsi Israél tshob li: Mbab bàn mi a kab là ke nsi mi, mfèt mi a be ntùm nda là ke nsi mi, tà nkum lé'njù sen nà se Tshùaben nsi ghù mbaṅ lo num nsitsha' là.

¹⁵Mènnzwi là nèn ngù mba Elia tshob là. Ndùlal'a ghù jujù ngelaṅ yàme, num ze tu wut, tunndà i mba ze tu Elia.

¹⁶Mbab bàn mi a be ntùm kab là ke mi, mfèt mi a be ntùm nda là ke sébte, ndaṅndaṅ mba Tshùaben na' ntshùa num ntshu Elia ntshob là.

¹⁷Tshen nu li be tshùa, nshum mènnzwi ndà tam ngokèt, ngokèl i ta neshu kà zwiag se ke bèn nebe.

¹⁸Mènnzwi là tshob Elia ndù: A ze be nu ke mèn Nsi? O se' ndà àm à ndù Nsi kwimte mfànnu màm, mén àm kwù ké?

¹⁹Elia bùnte yi ndù: Fà nshum o li. A kwé i num mbu mènnzwi là, ndo' i nko' yi num to'ndà z'a mfe tù, dù' tu wul i ke ntswe là, njab mén nà num kunndà se.

²⁰Elia tsiaṅ lén Tshùaben ntshob ndù: Tshùaben Nsi àm, b'o ghù nukebwô mba yen mfôg mènnzwi li z'a lo' àm ghùn ndà i là, ngù mén i kwù ké?

²¹A kab wul i num mén yoṅ tse tat, ntsiaṅ lén Tshùaben ntshob ndù: Tshùaben Nsi àm, me le't'o neshu, ghù ndù zwiag yen mén ni bèn nse' num i.

²²Tshùaben ju' nze Elia, zwiag mén nà bèn nse' num i, a be ntùn.

²³Elia lo' mén nswe' mànsi, ntùm ndà, mfà i màab, ntshob ndù: Tshù nshum o li, a b'a ntùn.

²⁴Mènnzwi là tshob Elia ndù: Me lèn ndonni ndù o b'a mèn Nsi, mba ndù ntshob mi a be ntum ntshu o là b'a mi Tshùaben, mbe mi nenùne.