Read Medumba 1 Fenfen 18 Bible Online

1 Fenfen 18 - Medumba bible

1 Fenfen 18

¹Tsemo' ngu'njù lo be tôge, Tshùaben tshob Elia num mba mbatte ngu'njù tat tshùa là ndù: Nèn ntswite wul o mfen Akab, me nsi ghù mbaṅ lo num nsitsha'a.

²Elia nèn ntswite wul i Akab. Nziku' na' mb'a ze ndùb Samaria.

³Akab ghù bo tsiaṅ Abdia, ze tàndà. Abdia lo ke mbwôg Tshùaben neshu.

⁴Mbe ndù a lo lemte ba ghatshob ntshob Nsi Tshùaben ntu nkù, njabte yub ṅam ntàn ṅam ntàn ntùm ngabloṅ, nke nkém yub bàn, nke mfà ntse bo, ndùse Yézabél biagte ba ghatshob ntshob Nsi Tshùaben nà.

⁵Akab tshob Abdia ndù: Katte ntùm ngô, num njoṅ ntôntse fa, ntùm njoṅ mfub fa, be mo' ndù nenà be bwe, be lo' nkém tse be nyàmdiaṅ boa nyàm tse kekwèn bo nyàmdiaṅ bèn mbwe yub là yi, ndù bo yôge; a be ndùlala mba be ke bèn nezwite ba nyàm.

⁶Bo ghabte ngô num nekatte ntùm bwe; Akab nèn num mo' ta' nze tù' i, Abdia nèn num mo' tù' i.

⁷Mba Abdia be num manze là, a bumte bo Elia. Abdia be yen i ndèn i, ngwù nsi kabkab ntshob ndù: tshùaben àm Elia, a b'a wù ké?

⁸Elia bùnte ndù: A b'a me, nèn ntshob tàfa' o ndù tshù me Elia li.

⁹Abdia tshob ndù: Ke lèn nu ze ngafa' o me fàn k'o nke nswèn àm mum mbu Akab a zwi àm à?

¹⁰Tshùaben z'a be ntùn nà lèn ndù ngô, ke nufen no ke bwe ze tàfa' àm ke' tum bo nèn ndiag o bwe là. Ndùse bo be ke yen o bwe là, a ghù nufen mbit bo ngô kàn mfe ndù o ke' be bwe.

¹¹Ndonni o tshwèt ntshob me ndù me nèn ntshob tshùaben àm ndù tshù Elia li.

¹²Ndonni ndùse me nsi lo mbaṅ o là, Ywèt Tshùaben nsi kel o nèn yi dù' me ke' lèn nà. A be me nèn nsoṅ Akab a ke yen o là, mb'a nsi zwi àm. Mbe ndù ngafa' o me, be mbwôg Tshùaben fe ndùse me be ménnshum nà.

¹³Tshùaben àm ke' ju' ju ze me na' ngù ndùse Yézabél ke nzwite ba ghatshob ntshob Tshùaben nà ké? Me lem ba ghatshob ntshob Nsi ntu nkù, ndemte yub ṅam ntàn ṅam ntàn ntùm ngabloṅ, nke nkém yub bàn, nke mfà ntse bo.

¹⁴Ndonni o tshwèt ntshob ndù me nèn ntshob tàfa' àm ndù tshù Elia li. Là, kà lagte ndù a nsi zwi àm.

¹⁵Là Elia tshob ndù: Num lén Tshùaben tàndà ntsho z'a be ntùn, me nke mfa' yi là, me nsi nèn mbwe Akab sènni.

¹⁶Abdia nèn ntèt Akab nsoṅ i yen nu là. Akab lo nèn mbwe Elia.

¹⁷Akab yoṅ mbe yen Elia ntshob yi ndù: A b'a wù bèn nke nkag va' ntùm ngô Israél na' à?

¹⁸Elia bùnte ndù: Me ke tshwèt nkag va' ntùm ngô Israél. A ke b'a me, a b'a tu wul o bin tunndà tàan, nummbe bin ghua' nkàn Tshùaben, tu wul o tam njam ba Baal.

¹⁹Ndonni kùmte njoṅ ngô Israél fa mbaṅ àm, mfe num mbat Karmél, mba ghatshob ntshob Nsi Baal ntu bon tàn nkù kuà boa ghatshob ntshob Nsi Astarté ntu nkù kuà tse bo be njù num téblé ntùm ndà Yézabél là.

²⁰Akab tum ntum mbaṅ bon Israél, ntse'te ba ghatshob ntshob Nsi num mbat Karmél.

²¹Ndùlala Elia kù'te nèn mbaṅ ngô ntshob ndù: Bin nsi ke vù bag bag tà nèn kum à ndùke? A be Tshùaben b'a Nsi là, bin tam njam i, a be z'a b'a Baal là, bin tam njam i. Ngô ke bùnte sàm ju yi.

²²Elia tshob ngô ndù: Me tù' à tù' me netèt ghatshob ntshob Nsi Tshùaben. Tshù, ghatshob ntshob Nsi Baal num nsen ni ntu bon tàn nkù kuà.

²³A bwô ndù bin fà mfô bag bàa; bo nsi lo' yub ta' mfô, kebte nkamnkam yab num ntshwèn ke te mbwôg bwe. Tu wul àm nsi lo' mo' mfô wat yab num ntshwèn ke te mbwôg bwe.

²⁴Yen ni nsi be tôg bo tsiaṅ lén yub nsi, tu wul àm bèn ntsiaṅ yàm lén Tshùaben; nsi z'a nsi bùnte, fà mbwôg là, nsi b'a Nsi nenùne. Njoṅ ngô fa bùnte ndù: Yen nu là bwô.

²⁵Elia tshob tse ghatshob ntshob Nsi Baal ndù: Bin lo' zin mfô, mbwôg wat, nummbe bin yàm ntshùa àm. Bin tsiaṅ lén zin nsi, ke te mbwôg bwe.

²⁶Bo lo' yub mfô, bo fà bo, bo nabt'é. Bo tsiaṅ lén Baal neto' nkebnjù nkum mbwôgtshù nke ntshob ndù: Baal, bùnte bag. Là bo ke ju' nze mèn, mbùn ntshob ke be. Bo nke ntsho' mfe tù mbwe tômbwôg se bo bom nà.

²⁷A be njagnyam Elia tshab yub ntshob bo ndù: Mb'a b'a nsi là, a bwô ndù bin kua' neta, mo' ndù a ke nkwat'a nu, ke neke mfa' lo, k'a ke nekatte lo, mo' ndù a ke nezi, a be ndùlala mb'a' bam num miaglo.

²⁸Bo kua' mà neta, ndo' ṅwi boa nkô nke'te mfaṅ yi num bo mb'a be yub matnu là. Bo so mfaṅ num bo tà lem nke ntum num bo.

²⁹Ndùse nyam jag là, bo tshob ntshob ghatshob ntshob Nsi tà nkum ngelaṅ z'a bwô ndù bo fà jule'te là. Là, mba ndùlala bo ke ju' nze mèn, mbùn ntshob ke be, mo' nekù' ntoṅ ke be.

³⁰Ndùlala Elia tshob ngô ndù: Bin kù'te nse' mbaṅ àm. Ngô kù'te nèn mbaṅ i, Elia bèn mbù'te tômbwôg Tshùaben se bo na' nsate là.

³¹A lo' ndoṅ ntshob bàa gham, num njoṅ tunndà nzwit bon Yakob ze Tshùaben na' ntshob ndù Israél nsi be lén sob là.

³²A lo' men ndoṅ nà mbù'te tômbwôg yi num lén Tshùaben. A ghù bo tswe' nsam ndo' ndiaṅ tômbwôg yi mbume. Nsam nà nèn nsi kua' neshu.

³³A nabte ntshwèn, nkebte mfô nkamnkam njab num ntshwèn,

³⁴ntshob ndù: Bin ket ntshaṅ ntse nkuà mi ntse dun bwe là nse' naṅ num nyàm bo ton nà mba num ntshwèn. A tshob bo ndù bo ghù ndùlala yoṅ tse tat.

³⁵Ntse naṅ num tômbwôge, ndun mba ntùm nsam ze bo lo' ndam tômbwôg yi mbum nà.

³⁶A kum ngelaṅ nefà jule'te, Elia ngatshob ntshob Nsi nèn mbwe, ntshob ndù: Tshùaben Nsi Abraham, Isak, Israél! A bwô o ghù bo lèn ndù o b'a Nsi Israél, mba ndù me b'a ngafa' o, mbe ndù njoṅ tshu fa tse me tshwèt ngù là b'a mb'o tshob là.

³⁷Tshùaben, bùnte me! Bùnte me ngô lèn ndù a b'a wù Tshùaben bèn mbe Nsi, mba ndù o tshùa ndùlala nsoṅte ntù tshob mbèn yi njam!

³⁸Mbwôg Tshùaben vù num tômbwôg, nkù nyàm bo ton nà bo ntshwèn, nkù ndoṅ bo tsha'a, mfin mba ntse mi a be ntùm nsam nà.

³⁹Ngô be yen ndùlala, ngwù nsi kabkab ntshob ndù: A b'a Tshùaben bèn mbe Nsi, a b'a Tshùaben bèn mbe Nsi!

⁴⁰Elia tshob ndù: Bin tshùb tse ghatshob ntshob Nsi Baal; kà ta' i mba ntshù' tum. Bo tshùbte yube. Elia lo' yub nswe' nèn mà fub Kison, nzwite yub bwe.

⁴¹Elia tshob Akab ndù: Ko' nèn njù mbèn nu, nummbe mbaṅ tshwèt ntshame.

⁴²Akab ko' nèn njù mbèn nu. Là Elia ko' nèn ntshùa mbat Karmél. A ben wul i nsi, nso se i mfé' nku mi,

⁴³ntshob ngafa' i ndù: Ko' ndôte nze mà dibantse di. Ngafa' ko' ndôte ntshob ndù: Sàm nu ke nsi. Elia tshob yi yoṅ sammbàa ndù a bène, a bèn yoṅ tse sammbàa.

⁴⁴A be kum mbatte yoṅ sammbàa, ngafa' Elia tshob ndù: Tshù metsit ndot li a be nze mà dibantse mba bu mènntùn nà. Elia tshob yi ndù: Ko' nèn ntshob Akab ndù a nabte kalig nswe' kà mbaṅ ghom i manze.

⁴⁵A be ghubte mén nda'nda' ndot nke ngù kamànyam tam njame, fetmbaṅ shùm, mo' tonkèt mbaṅ lo. Akab ko' ntùm kalig se, nèn Yizréel.

⁴⁶Bu Tshùaben be num Elia, a taṅ kob se, nkù nde nèn mbwe Akab mb'a ke ntsho Yizréel là.