Read Medumba 1 Fenfen 19 Bible Online

1 Fenfen 19 - Medumba bible

1 Fenfen 19

¹Akab soṅ Yézabél njoṅ tshu fa tse Elia ghù là bo mb'a watte njoṅ ghatshob ntshob Nsi Baal fa ṅwi là.

²Yézabél tum ntum, a nèn ntshob Elia ndù: A bwô ndù ba nsi yab nge' num àm a be z'a be be ndamnjù num yen ngelaṅ ni, me ke yab tu o dù' z'o yab tu mba zit mèn no netèt bo bwe là.

³Elia be yen ndùlala, nkù nèn ndem tu i. A zin nkum Ber-Shéba z'a b'a tse tsha' Yuda là, mfaṅ ngafa' i bwe.

⁴Tu wul i nèn nkum kônkwa, ndù a zin ta' lé'njù, ntswe nsi tun netshùm, mbètte vùkob, ntshob ndù: A ku' ndùlala. A bwô ndù Tshùaben lo' zwiag sàm ndonni, nummbe me ke' b'a mèn mebwô ntshùa tà tshàm.

⁵A nô tun netshùm nke nsi. Mo' Angél kwag i ntshob yi ndù: Lo nsi njù jujù.

⁶A lôte njen tag mbaṅ tu i ndù bo tont'a num ndoṅ nedume, bo tshaṅ ntse. A jù jujù, nu ntse, mbèn nô nsi.

⁷Angél Tshùaben bèn nse' mbatte yoṅ bàa nkwag i ntshob ndù: Lo nsi njù jujù, nummbe nze z'o nsi nèn nà sage.

⁸A lo nsi njù mbèn nu. A lo' neta ze jujù fà yi là nzin yi lé'njù ṅam nkuà, tèttswe' bo mbwôgtshù, tà nèn nkum num mbat Nsi z'a be Horéb là.

⁹A lo bwe, ntsho ntùm ngabloṅ nzi bwe. Ndùlala Tshùaben tshob yi ndù: Ke z'o tshwèt ngù nsen ni Elia?

¹⁰A bùnte ndù: Nkôni z'a dun num àm num Tshùaben tàndà ntsho là b'a ze lànghe'e, nummbe bon Israél ghua' o, nsate ntômbwôg mu, nzwite ghatshob ntshob Nsi tsho ṅwi. Me tù' à nda' tù' me; ndonni bo tshwèt ndiag nelo' tu àm.

¹¹Tshùaben tshob yi ndù: Tum ntsin mbwe Tshùaben num mbale. Tshùaben nsi tshùa! Mo' tonkèt fetmbaṅ tôg, nke mbagte ba mbat boa ndoṅ, Tshùaben ke be ntùm fetmbaṅ. Fetmbaṅ be tsine, tsha' nyi'te, Tshùaben ke be ntùm tsha' nenyi'te.

¹²Tsha' nenyi'te be tsine, mbwôg kù, Tshùaben ke be ntùm mbwôge. Mbwôg be mi, mo' mén mfùag nebotte tshùa.

¹³Ndùse Elia ju' ntshùa mfùag nebotte là, a lo' kummbaṅ se nkabte se i yi, ntum ntsin ntshu ngabloṅ. Ndùlal'a ju' mo' nze mèn tshob yi ndù: O ghù à ke nsen ni Elia?

¹⁴Elia bùnte ndù: Nkôni z'a dun num àm num Tshùaben tàndà ntsho là b'a ze lànghe'e, nummbe bon Israél ghua' o, nsate ntômbwôg mu, nzwite ghatshob ntshob Nsi tsho ṅwi. Me tù' à nda' tù' me; ndonni bo tshwèt ndiag nelo' tu àm.

¹⁵Tshùaben tshob yi ndù: Tam nze mbèn nzin num kônkwa tà nèn nkum Damas. Ndùs'o kum bwe là, o yo' Hazaél ndo' ngù mfen Siria yi.

¹⁶O nsi yo' mba Yéhu nshum Nimshi lo' i ghù mfen Israél yi. Yo' Elisa nshum Shafat ze Abél-Mehola, ndo' i ngù ngatshob ntshob Nsi yi num yu dù'.

¹⁷Mèn ze ṅwi Hazaél ke' wal i là mba Yéhu nsi zwi i, mèn ze ṅwi Yéhu ke' wal i là mba Elisa nsi zwi i.

¹⁸Là, me nsi faṅ benntùn ntsha' sammbàa Israél, tshen ben nà lo ke te ntunkekwi' mub nsi mbwe Baal, ntshu yub ke ghamt'é.

¹⁹Elia lo nsen nà nèn ntèt Elisa nshum Shafat, a nke ndù' nà. Nyàmna' lo be mbwe i bàa bàa nze ntshob bàa gham, boa tse bàa na' mbèn mbe. Elia kù' nèn mbaṅ i, ma' kummbaṅ se num Elisa.

²⁰Elisa faṅ nyàmna' tse, nkù nde njam Elia ntshob ndù: Faṅ me nèn ndé'te tàa bo màa kà njôg ntam njam o. Elia bùnte yi ndù: Nèn mbèn nse'e, nummb'a bwô ndù o kwimte ju ze me ghù wù là.

²¹Ndùs'a lo mbaṅ Elia nèn nà, a bèn mbèn njam, ndo' nyàmna' bàa nzwi yube, ndo' kalig se na mbàb yub yi mfà ben tse bo fèt. A lo ntam njam Elia nke mfa' yi.