Read Medumba 1 Fenfen 2 Bible Online

1 Fenfen 2 - Medumba bible

1 Fenfen 2

¹David z'a ke ntù' nekwù là fà ntag nshum i Salomon ntshob ndù:

²Me tù' b'a nze nenèn nkatte ze njoṅ benntùn fa nsi nèn nà. A bwô o fèn ntù, nda'te ndù o b'a mènntùn.

³Ze ntshù' Tshùaben Nsi o, nke nzin num tse manze, nke ntshùb ntshù' mi, ntag mi, tshu ts'a kô là boa nkàn mi, mba bo kite ntùm ntshù' Mosé là. A nsi tshùa ndùlala tsho tshunu ke ngwù lag mba yà lo dù' z'o nèn bwe là.

⁴Tshùaben nsi zwiagte nka'ni mi a na' nka' me là wù. Tshù nka'ni mbit li: A be ze bon tsho tse bandum zete num nzin mube, nke nzin mbwe àm mb'a tsine, num njoṅ ntù yub fa, num njoṅ zwiag sob fa là, mb'o ke zi bwoṅ njùndà num diaṅkwa ba Israél.

⁵Mba tu wul o lèn ju ze Yoab nshum Tseruya na' ngù num àm nà, ju z'a ghù tse tàndà ntsho ba Israél bàa, Abner nshum Ner bo Amasa nshum Yéter là. A lo zwite yube; a lo fètte lem tshob ndùse la' tswe fite là, ndo' lem tshob nsagte kob s'a be tun i là yi, mbèn nsagte nketo' mi a be nku mi là yi.

⁶A bwô o ghù mba ntù o tshob wù là, ke faṅ ndù tu i z'a fôg là nèn njam tsha' ntùm fite.

⁷A bwô ndù o ghù mebwô nshumnshum Barzillai ze Galad, bo bèn mbe netèt ben tse bo ghù njù ntùm ndà o là. Nummbe tu wut tshob lo ghù num àm be ndaṅndaṅ; bo lo ywimt'àm ndùse me ke nkù mfèl o Absalom nà.

⁸Tshù Shimei nshum Guéra, mèn Benjamin, ze Bashurim nà mbaṅ o. A lo tshob kebwô num àm ndùse me ke nswe' nèn mà Mahanaim nà. Là, a lo tèl àm nze mà Yuda, me kàn mfe yi num lén Tshùaben ntshob ndù me ke nsi faṅ a kwù ṅwi.

⁹Là ndonni o ke nsi faṅ i kua' ndùlala. Mb'o b'a nkummèn nà, o nsi lèn mb'o ghù num i là. Ghù a lo' à lem kà nèn yi njam tsha' num ze ywèn.

¹⁰David nèn ntèt tà tse, bo tshoṅ i ntùm tusô David.

¹¹David lo tô ngô Israél num ngu'njù ṅam nkuà. A lo tô ndùs'a be Yérusalém nà ngu'njù ntshob tat ṅam ntat.

¹²Salomon tswe num diaṅkwa tàab David, ze nufen ghomte kua' mebwô.

¹³Adoniya nshum Hagit lo nèn ju Bat-Shéba, mà Salomon, ngwù nsi mbwe i. Bat-Shéba dù: o lo' à fite nse' yi à? Adoniya bùnte ndù: ṅ,

¹⁴ntshob ndù: me ghù nu netshob wù. Bat-Shéba tshob ndù: tshobe.

¹⁵Adoniya tshob ndù: Tu wul o lèn ndù fen na' mb'a sàm, tà njoṅ ngô Israél fa nke ntù' béb à ndù me tô. Là fen lo tum ntshu àm ntsho ntshu mfèl àm. Nummbe yen nu là fe à Tshùaben.

¹⁶Ndonni me tshwèt mbètt'o ta' nu ntshù', a ke bwô ndù o gha me. Bat-Shéba bùnte ndù: Tshobe.

¹⁷Adoniya tshob ndù: Netsho'o, tshob mfen Salomon, me lèn ndù b'a ke gha nu wù, ndù a fà Abishag ngon Sunam me, a be yàm mènnzwi.

¹⁸Bat-Shéba tshob ndù: A bwô, m'a' tshobte bag mfen num yen nu là.

¹⁹Bat-Shéba lo nèn mbaṅ mfen Salomon neyab kam num tu Adoniya. Mfen lo nèn mbumte bo màab, nte ntunkekwi' mi nsi, mbèn njam ntswe num diaṅkwa se. Bo te ta' diaṅ mà mfen, a tswe num bag bu i ze zwim.

²⁰Bat-Shéba tshob ndù: Me ghù nda' metsit nu nebètt'o yi, kà gha yen nu là me. Mfen tshob ndù: Màa, bètte, me ke nsi gha yen nu là wù.

²¹A tshob ndù: A bwô o fà Abishag ngon Sunam mfèl o Adoniya a lo' ngù nzwi i yi.

²²Mfen tshob màab ndù: Numk'o mbètt'a nda' Abishag ngon Sunam Adoniya à? Bètte mba fen mfà yi, mb'a b'a ntshùambwe àm, mbe ndù Abiatar ngale'te Nsi bo Yoab nshum Tseruya tshwèt ntomt'é là.

²³Ndùlala mfen Salomon lo' lén Tshùaben nkàn mfe yi ntshob ndù: A bwô ndù Nsi yab nge' num àm ntùm njoṅ tshùagntù i fa, a be ze Adoniya ke' lo' tu i ntô ntshob mi a tum ntshu i là yi là.

²⁴Num lén Nsi z'a te àm num diaṅkwa tàa David, nte yàm tunndà mb'a na' nka' là, me nsi ghù bo zwi Adoniya be kua' sènni.

²⁵Mfen Salomon tum Benaya nshum Yéhoyada, a nèn ndab Adoniya nzwi i.

²⁶Yen nà be tôg mfen tshob Abiatar ngale'te Nsi ndù: Nèn ntswe num tsho tsha' ts'a Anatot là, nummb'o b'a ngavù. Nda' ndù me ke tshwèt nzwi o sènni, nummb'o lo ket Koṅ Tshùaben Nsi mbwe tàa David, mbèn mbe ndù bin tàa lo tamte num njoṅ nge' fa ts'a yen nà.

²⁷Ndùlala Salomon sô Abiatar num fa' nele'te Nsi. A tshùa ndùlala ntshob mi Nsi tshob Silo num tunndà Eli là bumte.

²⁸Yen tshô là tam toṅ Yoab z'a na' ntam njam Adoniya, mba mb'a na' mbe ke be ze njam Absalom nà. Yoab kù, nèn ndem ntùm ntàb Tshùaben, ntshùb ndô tômbwôg le'te Nsi.

²⁹Bo soṅ mfen Salomon ndù Yoab lo kù nèn ndem ntùm ntàb Tshùaben, mba ndù a b'a mbaṅ tômbwôg le'te Nsi. Salomon tum Benaya nshum Yéhoyada ntshob yi ndù: Nèn ndab i nzwi i.

³⁰Benaya kum ntùm ntàb Tshùaben ntshob Yoab ndù: Mfen tshob mb'o tume. Yoab bùnte ndù: Me ke tume, m'a' kwù à nsen ni. Benaya bèn njam nsoṅ mfen yen nu là. Tshù ju ze Yoab bùnte ntshob me là.

³¹Mfen tshob yi ndù: Ghù mb'a tshob là. Zwi i ntshoṅe, ndù lem ts'a na' mfètte ke ntun mi là nèn ngùanesà num miag màm bo tunndà tàa.

³²Tshùaben nsi ghù tshen lem nà vù à num ko' ze tu, nummb'a lo zwi, nkebte benntùn ṅwi, tàa David ke lèn. A lo zwi benntùn bàa tse nu tshob bwô ntshùa tse là: Tshen ben nà b'a Abner nshum Ner, tàndà ntsho ba Israél bo Amasa nshum Yéter, tàndà ntsho ba Yuda.

³³Lem tshob nsi vù tu Yoab mba tu ze nzwit matmat. Là fite z'a fe Tshùaben nà nsi ke be njoṅ ndù fa num David mba ze nzwit matmat; fite nsi be num tunndà i bo diaṅkwa se.

³⁴Benaya nshum Yéhoyada ko' nèn ndab Yoab, nzwi i. Bo tshoṅ i ntùm ba' i z'a be kônkwa là.

³⁵Mfen lo' Benaya nshum Yéhoyada ngù tàndà ntsho yi num dù' Yoab, njab Tsadok ngale'te Nsi num ze dù' Abiatar.

³⁶Mfen ghù bo tsiaṅ Shimei, a tshob yi ndù: Kut ta' ba' Yérusalém; o nsi tswe bwe, ke tum bwe nèn sàm dù', ke nsen ni ke nsen nà lo.

³⁷Lèn ndù me nsi zwi o lé'njù s'o nsi dut koṅntse Kédron nà; lem tsho nsi vù à be tu o.

³⁸Shimei bùnte mfen ndù: a bwô! Nkuan o me nsi ghù à mba mfen àm tshob là. Shimei tswe Yérusalém yàme.

³⁹A be be ngu'njù tat, tsemo' ghafa' Shimei bàa kù nèn ju Akish nshum Maaka, mfen Gat. Bo soṅ Shimei yen nu là ntshob ndù: Tshù ghafa' tsho là bo kù nèn Gat là.

⁴⁰Shimei lo nsi, nabte kekwèn i, nèn Gat diag ghafa' tse ju Akish. Ndùlala Shimei nèn Gat, ndo' ghafa' tse bwe mfe yi.

⁴¹Bo soṅ Salomon ndù Shimei lo Yérusalém nèn Gat kà mbèn njam.

⁴²Mfen ghù bo tsiaṅ Shimei, a tshob yi ndù: Me lo ke kàn mfe wù num lén Tshùaben, ke tshob wù ndaṅndaṅ ndù o lèn mb'o nsi kwù lé'njù s'o nsi tum Yérusalém nèn nsen ni ke nsen nà lo ké? Tu wul o lo ke bèn mbùnte me ndù: A bwô, me ju' ké?

⁴³Numk'o mbe ke ze nkànmfe Tshùaben bo ju ze me na' ntshob wù à?

⁴⁴Ndùlala mfen tshob Shimei ndù: Tu wul o lèn nukebwô z'o na' ngù tàa David là mebwô. Ndonni Tshùaben a' ghù o jù bin tshùagntù o yu tu.

⁴⁵Là mfen Salomon nsi be ts'a ntùm fite, diaṅkwa David ghum tse mbwe Tshùaben njoṅ ndù fa.

⁴⁶Mfen tshob Benaya nshum Yéhoyada ndù a tum nèn ndab Shimei, Shimei kwù. Ndùlala nufen ghum ntùm mbu Salomon.