Read Medumba 1 Fenfen 20 Bible Online

1 Fenfen 20 - Medumba bible

1 Fenfen 20

¹Ben-Hadad, mfen Siria, kùmte njoṅ ze ntshu ntsho fa; a lo ghù fenfen ntshob bàa ṅam ntat njam i, ngù ba nyàmdiaṅ boa nkalige. A ko' nèn nkab ntsho ntshu ngô Samaria, nkam i ntsho.

²A tum ntum mfen Akab, mfen Israél,

³bo tshob yi ntùm ngô ndù: Tshù nu ze Ben-Hadad tshob li: Silba o bo gol o b'a yàm, zwi tsho boa bon tsho tse ntùn be tshàm.

⁴Mfen Israél bùnte ndù: Mfen àm, mbe tshùaben àm, mb'o tshob là, me mba ju ze me ghù là, b'a ju o.

⁵Là ntum bèn nse' ntshob ndù: Tshù nu ze Ben-Hadad tshob li: a be ze me lo ntum bo tshob wù ndù o nsi fà yu silba, yu gol, zwi tsho boa bon tsho me là,

⁶mb'a b'a nummb'a nsi be ndamnjù, be num yen nyam ni, me tum tshe' tshàm wù. Bo nsi tsha' ndà o boa ndà ghafa' tsho; bo nsi lo' mba ke lo ze lag sob te bwe là nèn yi.

⁷Ndùlala mfen Israél tsiaṅ njoṅ ghakwé mbwe fa ntùm ngô ntshob ndù: Bin lène, njen mba yen mèn nà tshwèt ndiag kebwô num be là. A lo tum ntum, bo se' mbètt'àm zwi tshàm, bon tshàm, yàm silba bo yàm gol, me ke ne nga yi!

⁸Njoṅ ghakwé mbwe fa boa ngô tshob Akab ndù: Kà ju' nu z'a tshob là, ke bam nu z'a tshob là.

⁹Akab tshob ntum Ben-Hadad ndù: Bin tshob tshùaben mfen ndù m'a' ghù nu z'a lo mbwôg mbwe mbètte ngafa' i me yi là. Là me ke' ku'ni nebam nu z'a lo mbètt'àm yi mbatte yoṅ bàa là. Ntum bèn njam, mfà mbùn ntshob Ben-Hadad.

¹⁰Ben-Hadad tum bo nèn ntshob Akorb ndù: A bwô ndù ba nsi yab nge' num àm ntshùate, nummbe mba mbab mi a Samaria là ke' ku'ni tse nedun tôbu nguan ngô ze me ghù njam àm nà.

¹¹Mfen Israél bùnte ndù: Bin tshob yi ndù a ke' ywimte mb'a be mèn be nèn ntsho ntù' ke nka'te mb'a tù' nefe là.

¹²Ben-Hadad lo be ju' men ntshob li ndù boa fenfen bo be njam i là tshwèt nu tshob ntùm ba ntàb; ndùlal'a tshob ghafa' tse ndù: Bin nabte wut tsine, bo nabte wut ndo nsi mum ngô.

¹³Là mo' ngatshob ntshob Nsi kù'te nse' mbaṅ Akab mfen Israél ntshob yi ndù: Tshù nu ze Tshùaben tshob li: Yen mà bwoṅ benntùn ni z'o tshwèt njen nà, me nsi swèn yub mum mbu mu, a tshùa ndùlal'o lèn ndù me b'a Tshùaben.

¹⁴Akab tshob ndù: Tshùa à njam wù di? Ngatshob ntshob Nsi bèn ntshob ndù: Tshù nu ze Tshùaben tshob li: Njam ghafa' tse kam taṅla' tsho' là. Akab tshob ndù: we z'a nsi to' ntsho à? A bùnte ndù: wù.

¹⁵Ndùlala Akab ghù ghafa' tse kam taṅla' tsho' là tshùa mbwe i. Bo tum bwe benntùn ntshob bàa bon tat nkù bàa. Yub yoṅ i be mi, a ghù ngô tshùa mbwe i, njoṅ bon Israél fa, bo tum yub ntu ntsha' sammbàa.

¹⁶Bo tum ndà num bo a njagnyam. Ben-Hadad lo ke' à ntùm ba ntàb boa fenfen ntshob bàa ṅam ntat, nke nu mbèn nke mbume.

¹⁷Ghafa' tse kam taṅla' tsho' là bwôg tum. Ben-Hadad bètte bo tshob yi ndù: Benntùn tum Samaria nse'e.

¹⁸A tshob ndù: A be ze bo tum nse' à num fite là, bin ghomte yub ntùnntùn, mbe ze bo se' à ntsho là, bin ghomte yub be ntùnntùn.

¹⁹Ndùse ghafa' tse kam taṅla' tsho' boa ntshu ntsho z'a be njam bo tum ntùm ngô là,

²⁰mba zit mèn no zwi ze ta' mèn, ndùlala ba Siria kù. Israél te njam bo. Ben-Hadad, mfen Siria ko' num nyàmdiaṅ boa ghako' nyàm nkù nène.

²¹Mfen Israél tum, nzwite nyàmdiaṅe, mbagte nkalige, ngù ba Siria vù kua' kebwô neshu.

²²Ndùlala ngatshob ntshob Nsi kù'te nèn mbaṅ mfen Israél ntshob yi ndù: Nèn ntshamte wul o, mbèn ndôte ju z'a bwô ndù o ghù là, nummb'a nsi be ngumo' mfen Siria lo nsi mbèn nko' nse' num o.

²³Ghafa' mfen Siria tshob yi ndù: Nsi yub b'a nsi ba mbale; a ndùlala bèn ngù kà bo nta ntshùa be. Ndonni a bwô be ma' yub ntsho tômbo'o, njen mbe ze be ke' ta ntshùa yub là.

²⁴A bwô ndù o fa' sen fa' li ndù: sô njoṅ fenfen fa ndo' ba ngomna mbate yub yi.

²⁵Bèn ntse'te mo' ntshu ntsho be njoṅ z'o na' ngù k'a mbi là, ngù nyàmdiaṅ boa nkalig be njoṅ ts'a be là. Nummbe be nsi ma' yub ntsho tômbo'o, yen mbe ze be ke' ta ntshùa yub là. A ju' ntshu yub ngù ndùlala.

²⁶A be tam ngu', Ben-Hadad ghù ba Siria tshùa mbwe i, nko' nèn Afék num nema' Israél ntsho.

²⁷Mba bon Israél lo yub nsi. Bo kwé jujù, nèn mbumte boa ba Siria. Ba Siria lo' ngô fa, ba Israél be mbwe bo mba metsit bwoṅ mbwe là.

²⁸Mèn Nsi kù'te nse' ntshob mfen Israél ndù: Tshù nu ze Tshùaben tshob li: Mba ba Siria tshob ndù Tshùaben b'a nsi ba mbale, ke b'a ze tômbo' là, me nsi swèn yen bwoṅ benntùn ni mum mbu mu, a tshùa ndùlala bin lèn ndù me b'a Tshùaben.

²⁹Bo nôte nsi se se num lé'njù sammbàa, a be kum mbatte lé'njù sammbàa ntsho kam. Bon Israél zwite ta' ntshu ntsho ba Siria ndù a ghù benntùn ntsha' nkù num ta' lé'njù ntshù'.

³⁰Tse bo tù' là kù nèn ntùm tusô Afék. Kàbngô vù num tse ntshob sammbàa gham tse bo tù' là. Ben-Hadad kù nèn ntùm tusô, nke ntsho nto'ndà nto'ndà.

³¹Tshe' tse tshob yi ndù: Bag lo ju' ndù fenfen tunndà Israél b'a ghakondèn; bam ndù bag taṅ nke'mbàm tun bag, ntaṅ nkù tô bag, nèn njen mfen Israél; be mo' ndù a faṅ o ntùn.

³²Bo taṅ nke'mbàm tun bo, ntaṅ nkù tô bo nèn njen mfen Israél, ntshob yi ndù: Ngafa' o Ben-Hadad tshob ndù o faṅ i ntùn ! Akab bùnte ndù: A b'a mfèl àm, a ke' ntùn ké?

³³Tshen ben ni yoṅ njù bin men ntshob là, nànte ntshob ndù: Ben-Hadad b'a mfèl o! Akab tshob ndù: Bin nèn ndo' i nse' yi. Ben-Hadad se' mbaṅ i. Akab ghù a ko' ntùm kalig se.

³⁴Ben-Hadad tshob Akab ndù: Me nsi ba' ngô tse tàa na' ndo' tàan nà wù; o nsi te so taṅla' Damas, ndaṅndaṅ mba tàa na' nte se Samaria là. A bùnte ntshob ndù: Me nsi be faṅ o nèn ndù be wat kàn; a wat kàn bo yi, mfaṅ i a nèn.

³⁵Mo' mèn netèt nshumnshum ngatshob ntshob Nsi tshob nshun fa' i, mba Tshùaben tshob yi là ndù: Lab àm nàï; là nshun fa' i gha nelab i.

³⁶A tshob yi ndù: Mb'o ke' ju' nze Tshùaben nà, ngwayit nsi ghom o ndùs'o nsi lo mbaṅ àm nèn nà. Ngwayit bumte bo yi ndùs'a lo mbaṅ i nke nèn nà, ngom i.

³⁷A bèn ntèt mo' mèn ntshob yi ndù: Lab àm nà; yen mèn nà to' nelab i, nkag mfaṅ num i.

³⁸Ndùlala ngatshob ntshob Nsi nèn ntswe dù' ze mfen be tshùa bo yi bumte là. A lo lo' kam nzwe nkut miag mi yi.

³⁹Ndùse mfen ke ntshùa là, a kua' ntshob mfen ndù: Ngafa' o lo kum tshwèt ntsho, mo' mèn sô wul i njam, ndo' mo' mènntùn nse' mfà me ntshob ndù: Lé' yen mènntùn ni! A be z'a be ke be là, mb'o nsi lo' tu o tô yi, ntag ndùlala mb'o a' fà talaṅto nkàb.

⁴⁰Tshù là, ndùse ngafa' o ke mfa'a, nke nèn bag bag là, yen mèn nà bi nsi. Mfen Israél tshob yi ndù: Yen nà b'a yu ntsha, o bèn nkeb ntsha yu tu wut.

⁴¹Yen mèn nà ké' kam nzwe num miag mi be ndùse, mfen Israél lèn ndù a b'a mo' mèn netèt ba ghatshob ntshob Nsi.

⁴²Yen mèn ni tshob mfen ndù: Tshù ju ze Tshùaben tshob li: Mb'o faṅ mèn ze me na' ntam i bwembwôg tum bu o nèn nà, o nsi lo' tu o tô ze yi, lo' ngô o tô ze yi.

⁴³Mfen Israél bèn njam ndà i, ntùm nenywine, ntùm yantù, nzin nkum Samaria.