Read Medumba 1 Fenfen 21 Bible Online

1 Fenfen 21 - Medumba bible

1 Fenfen 21

¹Tshù nu z'a na' ntôg ndùse tshen tshu là tshùa li: Nabot ze Yizréel lo ghù mo' nkùa mà Yizréel, mbaṅ ntshwèt Akab, mfen Samaria.

²Akab tshob Nabot ndù: Fà nkùa o me, me lo' ndù' njab yi, nummb'a ghebte mbaṅ ndà àm. Me nsi fà nkùa ntùn wù num bwe; a be z'o nekô là mba me nsi jun fà nkàb wù njoṅ ntshuntàne.

³Là Nabot bùnte ntshob Akab ndù: A bwô ndù Tshùaben béb àm ndù kà me fà ntsi' tà tshàm wù.

⁴Akab be bèn njam ndà i, nke nywine, nke nja ntù, nummbe Nabot ze Yizréel lo tshob men ntshob là yi ndù: Be me ke fà ntsi' tà tshàm wù! Ndùlal'a nô num kunndà se, nkaṅ se i, ke jù sàm ju.

⁵Nzwi i Yézabél se' mbaṅ i, mbètt'é ndù: Numk'o nke ntswe nenywine, ke jù sàm ju à?

⁶A bùnte yi ndù: Me tshob Nabot ze Yizréel ndù a fà nkùa i me, nkwé nkàb, ke ndù me fà mo' nkùa ghua yi num bwe lo, l'a ke bam, mbèn ntshob me ndù: B'a ke fà nkùa i me.

⁷Yézabél nzwi i tshob yi ndù; A b'a kua' wù ke nke' ntô mum ngô Israél à? Lo nsi njù jujù. A bwô ndù o ṅwate ntùm ntù o. Tu wul àm, me nsi fà nkùa Nabot Yizréel wù.

⁸Yézabél kite ba ṅwa'ni num lén Akab, ndo' Sitam Akab ntete bwe, ntshag tshen ṅwa'ni là ghakwé mbwe boa ghasa'kam tse boa Nabot ke ntswe ntùm tusô ntshù' là.

⁹A kite ntùm tshen ṅwa'ni là ndù: Bin ghù ngô tswe nziku'u, nte Nabot mbwe ngô,

¹⁰ngù tsemo' tshùagkèt benntùn bàa te nu tu i ntshob ndù a tshabte Nsi bo mfen! Yen nà nsi be tôg bin lo' i ntum yi mum ngô, ntamt'é ndoṅ a kwù.

¹¹Benntùn tse bo be ntùm tusô se Nabot ke ntswe bwe là, ghakwé mbwe boa ghasa'kam ghù ndaṅndaṅ mba Yézabél kite bo ntùm ṅwa'ni ts'a tum bo là.

¹²Bo yab kàn num netswe nziku'u, ngù Nabot tswe nsi mbwe ngô.

¹³Tsemo' tshùagkèt benntùn bàa se' ntswe mbwe Nabot, se ngô nte nu tu Nabot ndù: Nabot tute Nsi bo mfen. Bo lo' Nabot ntum yi mum ngô, ntamt'é ndoṅ, a kwù.

¹⁴Bo tum mèn a nèn ntshob Yézabél ndù: Bo tamte Nabot ndoṅ k'a kwù.

¹⁵Ndùse Yézabél na' nju' ndù bo tamte Nabot ndoṅ k'a kwù là, a tshob Akab ndù: Lo nsi! Lo' nkùa Nabot ze Yizréel z'a na' nga neswèn wù là, nummbe Nabot ke' bèn mb'a ntùn, a kwù.

¹⁶Ndùse Akab ju' ndù Nabot kwù là, a lo nswe' nèn ntùm nkùa Nabot ze Yizréel, ndo' ngù ze yi.

¹⁷Ndùlala Tshùaben tshob Elia ze Tishbi ndù:

¹⁸Lo nsi nswe' nèn mbumte bin Akab mfen Israél z'a be Samaria là. Tshù i là mà ntùm nkùa Nabot. A là z'a swe' nèn lo' ghù ze yi là.

¹⁹O nsi tshob yi num yàm tu, me Tshùaben ndù: o ke' b'a ngazwi mèn bo ntshô ké? Bèn ntshob yi ndù: Mbù nsi latte lem tsho be kua' num dù' ze bo latte tse Nabot bwe là.

²⁰Ndùlala Akab tshob Elia ndù: Ngakeban àm, o bèn ntèl àm ké? Elia tshob ndù: Me bèn ntèl o nummb'o swèn wul o num neke ngù nukebwô num miag Tshùaben.

²¹Tshù, m'a' ghù nge' tsho num o, me nsi kùmt'o ghua'a, me nsi biagte mba we lo z'a b'a ze mèn Akab là, biagte nkuan bo ménla' tse bandum ntùm ngô Israél.

²²Me nsi ghù tunndà o fute ze Yéroboam nshum Nebat bo tunndà Baesha nshum Ashija, nummb'o lo ghù ntù àm ya, mbèn ngù Israél vù ntùm nukebwô.

²³Mbe se' num Yézabél Tshùaben tshob ndù: Ba mbù nsi fèt Yézabél mbaṅ kàbngô mà Yizréel.

²⁴Mbù nsi fèt mèn z'a tum ntùm tunndà Akab nkwù tusô là, mèn z'a tum bwe nkwù mà tshwèt là bon nsaṅ fèt fe i.

²⁵Sàm mèn ke' to' yèn wul i num neghù nukebwô num miag Tshùaben mba Akab là. Nzwi i Yézabél lo lo' ntù i koṅkoṅ.

²⁶Akab ghù tshùaya'nu yàme, nke ntam njam ba neto kebwô, ndaṅndaṅ mba ba Amor tse Tshùaben yoṅ yub mbwe bon Israél là.

²⁷Akab be miagte neju' ntshob mi Elia ke ntshob yi là, mfagte nzwe tse, ntôg nke'mbàm, ntswe nziku'u; a nke nô nsi be bo yen nke'mbàm nà, nke nzin à nda'nda'.

²⁸Ndùlala Tshùaben tshob Elia ze Tishbi ndù:

²⁹O yen mba Akab fà wul i nsi mbwe àm à? Mb'a fà wul i nsi mbwe àm nà, me ke fà nge' à num ze ngelaṅ, là me nsi ghù nge' se' num tunndà i à num ze ngelaṅ nshum i.