Read Medumba 1 Fenfen 22 Bible Online

1 Fenfen 22 - Medumba bible

1 Fenfen 22

¹Fite be num ngu'njù tat, ntsho ke be netèt Siria bo Israél.

²A be kum mbatte ngu'njù tat, Yosafat mfen Yuda swe' nèn mbaṅ mfen Israél.

³Mfen Israél tshob tshe' tse ndù: Bin lèn ndù Ramot z'a Galad là ke mb'a dù' be à? Be ke tshwèt ndab wut nekwé i mum mbu mfen Siria.

⁴Ndùlal'a tshob Yosafat ndù: A be bag wù nèn ntsho me Ramot z'a Galad là ké? Yosafat tshob mfen Israél ndù: Be b'a ta' ju ntshù', wù mba me, yàm ngô b'a bo yu, tshàm nyàmdiaṅ be boa tsho.

⁵Yosafat bèn ntshob mfen Israél ndù: A mbe ndùlal'o bwôgmbwe mbètte Tshùaben.

⁶Mfen Israél kùmte ba ghatshob ntshob Nsi nguan benntùn nkù kuà ntshob bo ndù: Be me lo' ntsho ntsho yi Ramot z'a Galad là ké ke me faṅ n'à? Bo tshob yi ndù: Mfen lo' ntsho ntsho yi bwe, nummbe Tshùaben nsi fà i wù.

⁷Là Yosafat tshob ndù: Sàm ta' ngatshob ntshob Nsi Tshùaben ke' bèn mbe nsen ni, be tshùa njam i mbètte Tshùaben nu ké?

⁸Mfen Israél tshob Yosafat ndù: Ta' mèn nsen ni ze be be tshùa njam i mbètte Tshùaben nu là, nda' ndù tu wul àm ke' be kô i, nummb'a ke' be tshob sàm nu ntùn num àm. A ke ntshob à be kebwô num àm. A b'a Mika nshum Yimla. Yosafat tshob ndù: Kà mfen tshob ndùlala.

⁹Ndùlala mfen Israél tum njabmfenkun ntshob yi ndù: Ghù Mika nshum Yimla se' nsen ni ndende.

¹⁰Mfen Israél bo Yosafat mfen Yuda lo tswe nsi num nsém mbu' ngô Samaria, mba we lo num se diaṅkwa, nket nzwe fen num bo. Njoṅ ghatshob ntshob Nsi fa lo ke ntàm ngàm bo.

¹¹Tshù, Sédékia nshum Kenaana lo lo' ndô tùn nse' yi ntshob ndù: Tshùaben tshob mb'o nsi lo' men ndô li lab Siria yi kà biagt'é.

¹²Njoṅ ghatshob ntshob Nsi fa nke ntshob be ju ntshù' ntshob ndù: Ko' nèn Ramot z'a Galad là, o nsi tshùa ntsho. Tshùaben nsi fà ngô ntùm mbu mfen.

¹³Ngantum z'a nèn tsiaṅ Mika là tshob yi ndù: Lèn mbe njoṅ ghatshob ntshob Nsi fa b'a ntshu ntshù', nke ntshob à nu ntùn mfen. A bwô ndù yu ngàm b'a mba ze mba we lo netèt bo là; tshob à numebwô num mfen.

¹⁴Mika bùnte ndù: Me lo' lén Tshùaben z'a be ntùn nà nkàn mfe yi ndù me nsi tshob à nu z'a nsi tshob me là.

¹⁵Ndùs'a kum mbaṅ mfen nà, mfen tshob yi ndù: Be bag kam Ramot z'a Galad là le' ntsho ké ke bag faṅ n'à? Mika bùnte yi ndù: Ko'o, o nsi tshùa i ntsho, nummbe Tshùaben nsi fà ngô mum mbu mfen.

¹⁶Mfen tshob yi ndù: M'a' ghù o nu ngu a yoṅ si' ndù o nsi ke tshob à nenùn z'a fe Tshùaben nà m'à?

¹⁷Mika bùnte ndù: Me yen Israél ndù bo sate num ba mbat mba mbwe tse ngabéb yub ke bwe là. Ndùlala Tshùaben tshob ndù: Tshen benntùn ni ke' ghù ngatshagte, a bwô ndù mba we lo bèn ndà i ntùm fite!

¹⁸Mfen Israél tshob Yosafat ndù: Me lo ke tshob wù ké? A ke' be tshob sàm nu ntùn me, a ke ntshob à be kebwô.

¹⁹Ndùlala Mika tshob ndù: Ju' ntshob Tshùaben li! Me lo yen Tshùaben ndù a tswe num diaṅkwa se ntshu ntsho mfe kamànyam tsinte mbaṅ i bu zwim bo bu kwéb.

²⁰Tshùaben tshob bo ndù: We z'a nsi lo' ntù Akab, a ko' nèn Ramot z'a Galad là, a tsho bwe mbi à? Bo bùnte ntshù' ntshù', mba we lo num ze mal i.

²¹Mo' ywèt se' ntsin mbwe Tshùaben ntshob ndù: M'a' lo' ntù i. Tshùaben tshob yi ndù: O nsi ghù à ndùke?

²²A bùnte ndù: Me nsi tume, be ywèt tatte mba ntshu zit ngatshob ntshob Nsi lo netèt ghatshob ntshob Nsi tse fa. Tshùaben tshob ndù: O nsi lo' ntù i tà nèn miagte, nèn ngù kua' ndùlala.

²³Tshù là, ndonni Tshùaben yab ywèt tatte ntshu njoṅ tsho ghatshob ntshob Nsi fa tse bo be nsen ni là. Tshùaben tshob kebwô num o.

²⁴Ndùlala Sédékia nshum Kenaana kù'te nse' mbaṅ Mika ntam bu ntoṅ i, ntshob ndù: Ywèt Tshùaben tum à yà num àm kà ntshob nu wù à?

²⁵Mika bùnte ndù: O nsi yen i lé'njù s'o ke tsho nto'ndà nto'ndà ke lem nà.

²⁶Mfen Israél tshob ndù: Lo' Mika nèn mfà Ammon, mfen tusô bo Yoas nshum mfen.

²⁷Tshob bo ndù bo ma' i ndàtsha, nke nkém i jujù bo ntse nge' tà nkum ndùse me nsi bèn njam ntùm fite là.

²⁸Mika tshob ndù: A be z'o bèn njam ntùm fite là mba Tshùaben ke' to' tshob nu me. A bèn ntshob ndù: a bwô ndù njoṅ ngô fa ju'u.

²⁹Mfen Israél bo Yosafat mfen Yuda ko' nèn Ramot z'a Galad là,

³⁰mfen Israél tshob Yosafat ndù: M'a' kaṅ wul àm nèn tshwèt ntsho, l'à bwô tu wul o ma' nzwe tsho. Ndùlala mfen Israél kaṅ wul i nèn tshwèt ntsho.

³¹Mfen Siria lo tshob tse ghatshagte nkalig tse ntshob bàa ṅam ntat ndù: Bin ke nsi kam bônke' ke dùbdùb lo ntsho, bin nsi kam à nda' mfen Israél ntsho.

³²Ndùse ghatshagte nkalig yen Yosafat là, bo tshob ndù: B'a b'a kua' mfen Israél kua' nenùne. Ndùlala bo nèn mbaṅ i, nkam i ntsho. Yosafat bu' se kem ntsho.

³³Ghatshagte nkalig be yen mb'a ke' b'a mfen Israél là, ntsin ngùanesà mbaṅ i.

³⁴Ndùlala mo' mandum sô két mbàn, ntam mfen Israél yi ke lèn, mum yoṅte fat se. Mfen tshob mèn z'a ke ntshagte se kalig là ndù: Kaṅ wul o ngù me tum tshwèt nummbe bo lem àm.

³⁵Ntsho ta sen lé'njù là neshu. Kà mfen ghô ntùm se kalig mbwe ba Siria; a kwù mfetnjù. Lem mfaṅ z'a be num i là nke nké nèn ntùm kalige.

³⁶Lagnyam be bi, bo kua' ntùm mbàn ntsho ntshob ndù: Mba we lo nèn ntùm se tusô, mba we lo nèn ntùm ze ngô.

³⁷Tshù mba mfen na' nkwù là. Bo lo' fe i nèn yi Samaria. Bo na' ntshoṅ mfen à Samaria.

³⁸Ndùse bo sôg kalig ntùm ntse mi a Samaria là, mbù latte lem Akab, ba kattù bèn nsôg wut tshob bwe ndaṅndaṅ mb'a be ntùm ntshob mi Tshùaben na' ntshob là.

³⁹Tshé' mfa' Akab, njoṅ tshu fa ts'a na' ngù là, ba' nsô nsennyàm z'a na' nkut là, boa ntusô mi a kut là, bo kite ntùm ṅwa'ni Kronika fenfen Israél.

⁴⁰Akab nèn ntèt tà tse. Nshum i Akazia tô num ze dù'.

⁴¹Yosafat nshum Asa lo tô Yuda num mbatte ngu'njù kuà mba Akab be mfen Israél là.

⁴²Yosafat lo be jù fen ndù a ghù ngu'njù ntshob tàn ṅam ntat. A tswe Yérusalém ngu'njù ntshob tàn ṅam mbàa nke ntô. Màab Azuba na' mb'a ngon Shilshi.

⁴³A lo ke nzin à num manze tàab Asa, ke tum bwe, nke ngù nu ndaṅndaṅ num miag Tshùaben.

⁴⁴Nda' ndù a lo ke biagte ba mbwe'; ngô lo ke nke' nton tshule'te boa labinda num tshen mbwe' là.

⁴⁵Yosafat tswe fite bo mfen Israél.

⁴⁶Tshé' mfa' Yosafat, tshu ts'a ghù là, ntsho ts'a le' là, bo kite ntùm ṅwa'ni Kronika fenfen Yuda.

⁴⁷A sô njoṅ kattù fa' neghamte fa tse bo ke' ntùm ngô fe num ze ngelaṅ tàab Asa là.

⁴⁸Mfen lo ke be Edom: ta' ngomna na' mbèn nke ntô bwe.

⁴⁹Yosafat lo ghù bo nabte sitima yi Tarsis gham, a nke nèn ndiag gol yi Ofir; là bo ke nèn bwe nummbe nsitima lo be'te Etsjon-Guéber.

⁵⁰Ndùlala Akazia nshum Akab tshob Yosafat ndù: O kô ndù tsho ghafa' nèn boa tshàm num nsitima ké? Yosafat ke kô.

⁵¹Yosafat nèn ntèt tà tse, bo tshoṅ i mbaṅ tà tse ntùm tusô tàab David. Yoram nshum i tô num ze du'.

⁵²Akazia nshum Akab tswe Samaria, ntô Israél num mbatte ngu'njù ntshob sammbàa gham mba Yosafat be mfen Yuda là. A tô Israél ngu'njù bàa.

⁵³A ghù ju z'a ke' bwô là num miag Tshùaben, nzin num manze tàab bo ze màab bo manze Yéroboam nshum Nebat, z'a na' ngù Israél vù ntùm nukebwô là.

⁵⁴A fa' Baal, nte ntunkekwi' mi nsi mbwe i, nkamte yantù Tshùaben, Nsi Israél, mba tàab na' nke ngù là.