Read Medumba 1 Fenfen 5 Bible Online

1 Fenfen 5 - Medumba bible

1 Fenfen 5

¹Hiram mfen Tiro lo tum tshe' tse mbaṅ Salomon, nummb'a lo ju' ndù bo yo' i fen num dù' tàab David. Hiram lo ke nkô David.

²Salomon tum ntum Hiram ntshob bo tshob yi ndù:

³O lèn ndù tàa David lo ke yoṅ nkut ta' ba' Tshùaben Nsi i, num nu ntsho yàm tse ghakeban tse lam i yi mbume, tà nkum ndùse Tshùaben yab yub bam nku mi là.

⁴Ndonni Tshùaben Nsi àm fà fite me njoṅ bag tse fa. Ghakeban ke' bèn mbe, mo' fa'te ke bèn mbe.

⁵Ndonni me ghù nkwate nekut ta' ba' num lén Tshùaben Nsi àm, mba Tshùaben na' ntshob tàa David là. A lo tshob yi ndù: Nshum o ze me nsi te num diaṅkwa so, num yu dù' là, nsi bèn kut ta' ba' num lén sàm.

⁶A bwô ndonni ndù o tshob bo ke' sédra Liban me. Tshe' tshàm boa tsho nsi tamte fa'a, tu wul àm fà njoṅ nkàbfa' z'o nsi keb là wù. Tu wul o lèn ndù sàm mèn ke netèt bag z'a lèn neke' ntù mba ba Sidon nà.

⁷Ndùse Hiram ju' ntshob Salomon nà, a ghù tsiaṅte ndùb ntù i ntshob ndù: Ghamte be Tshùaben sènni, yi z'a fà nzenu mén David, ndo' i ngù mfen yen mà nzwit mèn ndùb li yi là.

⁸Hiram tum mbùn ntshob Salomon, ntshob ndù: Me ju' ju z'o tum bo tshob me là. Me nsi ghù mb'o tshob là num ntù sédra boa ntù tô.

⁹Ghafa' tshàm nsi ket ntù Liban swe' nèn yi mà dibantse; me nsi yoṅte ntù tum wù dù' z'o nsi la'te me là. Bo nsi kum bwe ké'te o lo' o. Ju ze me nsi bètt'o yi là b'a ndù o fà jujù mum yàm ndà.

¹⁰Hiram fà ntù sédra boa ntù tô Salomon njoṅ z'a kô là.

¹¹Salomon fà ntsi ngefet ndùb ntsha' ṅam mbàa boa mban mfèt kena ndùb ṅam mbàa Hiram num nekém ndà i yi. A njoṅ ju ze Salomon ke mfà Hiram mba zit ngu'njù lo là.

¹²Tshùaben fà zenu Salomon, mb'a na' mbù yi là. Salomon bo Hiram nke ntshob nju'u, mbèn ngwat kàn netèt bo.

¹³Mfen Salomon tsho'te benntùn ntsha' ṅam ntat num njoṅ ngô Israél fa num fa' njôgmasi.

¹⁴A nke ntum yub Liban ndaṅndaṅe. Ta' laṅ se benntùn ntsha' gham. Mba sit laṅ se lo nke ntswe bwe ta' maṅwù, mbèn ntswe mum ze ndà maṅwù bàa. Bo lo lo' Adoniram ngù mèn ndùb yi netèt ben tse bo nèn njôgmasi là.

¹⁵Salomon lo bèn ngù benntùn ntsha' ṅam sammbàa tse bo ke nket tshu là boa tsemo' ben ntsha' ṅam fome. Tshen ni ke ntshua't'a ndoṅ mfe num mbale.

¹⁶Bo ke yoṅ nsiaṅ tse ghatshagte tse bo be benntùn ntsha' tat nkù tat là. Tshen ni b'a tse Salomon yab yub neke ndôte ghafa' là.

¹⁷Mfen tshob bo sôte ndoṅ ndùbndùb boa mi nekuni mi bo tshua'te là num nema' tun ba' ndà Nsi yi.

¹⁸Ghafa' Salomon, tse Hiram boa ba Guiblia tshua'te ndoṅ, nabte ntù boa ndoṅ num nekut ba' Ndà Nsi.