Read Medumba 1 Fenfen 6 Bible Online

1 Fenfen 6 - Medumba bible

1 Fenfen 6

¹Ngu'njù *gi*bon fom nkù kuà lo be tôg mba bon Israél tum ntùm ngô Egipto là, Salomon kut ndà Tshùaben. A na' mb'a mbatte ngu'njù kuà mb'a be mfen ba Israél là, mb'a ntùm maṅwù Ziv, z'a be mbatte maṅwù bàa là.

²Ba' ze mfen Salomon kut Tshùaben nà lo ghù mbu ṅam ntat nesage, ngù mbu gham num bam se bo mbu ntshob tàn gham nenèn tù.

³Metsit to'ndà lo ghù mbu gham num nesage, mbe njoṅ bam metsit to'ndà, ngù mbu ntàn num se i.

⁴Mfen tete ntôndà num ba', ndù a fa' njoṅ i fa kua' mebwô.

⁵A kut ndaṅ ba' ndo' ndam kumba' yi mbume, men ndaṅ ba' là diaṅ nkumba' mbume, ndà Nsi, dù' nelàn ntshùate. A ghù nto'ndà bwe ndù a latte dù' ntshù' ndiaṅ mbume.

⁶Laṅ ba' s'a be nsi là lo ghù mbu bàa kam num bam se, ngù mbu tat num laṅ se se netèt, ngù mbu tat kam num laṅ se s'a tù, mbe mbatte ndaṅ ntat là. Nummb'a lo ke nsébte ba' njam njù ndiaṅ mbume, ndùlala ndù kà tuba' kabte num nkumba' mi a be njù là.

⁷Bo lo be kut ba' ndo' à ndoṅ mi bo tshua'te tô loṅ nà nkut ba' yi, kà ndùse bo ke nkut là mèn ke ju' nze hama, nze njàm ke nze sàm tùn mba ntshù' lo dù' fa'.

⁸Nze nto'ndà mi a be num laṅ ba' se tunnsi là na' mb'a num bag ba' ze zwim. Bo lo ke nko' num tuko' ba', ndù a ṅatte kà nkum num laṅ ba' s'a be netèt là, ndo num laṅ ba' se netèt nkum num laṅ se s'a be mbatte tat là.

⁹Ndùse Salomon miagte nekut ba' là, a lo' ntù nebag nkabt'é yi, ndo' ntù sédra ngù ntom tse yi.

¹⁰A ghù mba sit laṅ ba' lo ghù mbu bàa kam nenèn tù, a bèn ndo' à mbwoṅ sédra kà ndatte yub yi num ndà Nsi.

¹¹Tshùaben tshob Salomon ndù:

¹²Mb'o kut yen ba' li là, a be z'o ke nzin mb'a be ntùm ntshù' màm, a be z'o tshùb nkàn màm, a be z'o ze ntag màm nà, mba me nsi zwiagte nka'ni mi me na' ngù tàan David là num o.

¹³Mba me nsi tswe ntùm yen ba' là, netèt ba Israél, ke zi ngua' Israél yàm nzwit mèn.

¹⁴Ndùlala Salomon miagte nekut ndà Nsi,

¹⁵ndo' ntù sédra mi a bag là, ndatte nkumba' mi ntùm bwe yi, neto' num tètndà nèn nkum kandà; a lo' ntù ndatte nkumba' ntùm ndà yi, ndo' nkabte nsindà yi.

¹⁶A lo' ntù sédra mi a bagte là, njabte ntùm tètndà ndà Nsi, neto' nsi nèn nkum kandà; ta' dù' lo be bwe num mbu gham, mb'a neghù dù' nelàn yi bo dù' nelàn ntshùate.

¹⁷Dù' z'a be mbwe, mbe mbu ṅam mbàa là b'a ba', yen nà b'a ndù ndà Nsi.

¹⁸Ntù sédra mi bo latte num nkumba' mum ndà là lo ke nda'te ta' ve ndù bo tshebte ba ngùtnze' boa nsàmtù neṅwate num bwe. Bo lo' à sédra ngù njoṅ i fa yi, nkabte njoṅ nkumba' yi fa kà bo ke bèn njen sàm loṅ mba ntshù'.

¹⁹Salomon yab dù' nelàn à tà mà tôg ndà Nsi, num nete Koṅ Kàn Tshùaben bwe.

²⁰Dù' nelàn lo ghù mbu gham nesage, num njoṅ kum tse fa, ngù mbu gham nenèn tù. Salomon lo' kua' gol ntùn njo' njoṅ i fa yi. A te ta' tômbwôg mbwe dù' nelàne, ndo' gol njo' yi. A lo' ntù sédra nabte sen tômbwôg là yi.

²¹Salomon lo' gol njo' njoṅ ntùm ndà Nsi yi fa, ndo' nkwa gol ntaṅte mbwe dù' nelàne. A lo' gol njo' mba mum dù' nelàn yi.

²²A lo' gol njo' njoṅ ba' yi fa, ndo' njo' mba tômbwôg s'a be mbwe dù' nelàn nà yi.

²³A lo' tù nabte kérubim bàa yi ntùm dù' nelàne; bo sag nèn tù num mbu ntàn.

²⁴Mba sit bàb mo' kérubim mi mbàa lo ghù mbu bàa kam, yen nà b'a ndù nelo num mo' tôg bàb se nèn nkum num mo' lo ghù mbu ntàn.

²⁵Mba mbatte kérubim na' ghù mbu ntàn. Mfi' yub bo yub nebe na' mb'a be mat ntshù' num njoṅ kérubim bàa fa.

²⁶Mba zit kérubim no lo nèn tù num mbu ntàn.

²⁷Salomon te ba kérubim nà netèt ba', mum ndà. Mbàb mub na' mb'a nenyile: Bàb mbwe kérubim kwag ta' kumba', se mbatte kérubim bàa kwag mo' kumba'; memo' mbàb mub mbumte netèt ba'; mo' te tôg se num mo'o.

²⁸Salomon lo' gol njo' ba kérubim yi.

²⁹Salomon ghù bo tshebte ba kérubim ndo' ndiaṅ nkumba' yi mbume, njam njù mba njam ntùm bwe. Bo tshebte ba tshatene, boa nsàmtù mebwô bwe.

³⁰A lo' gol njo' tètndà yi, ntùm bwe mba njam njù.

³¹A lo te mbatndà dù' nelàne, ndù bo lo' à tù nkom yi. Tshen mbatndà là boa nkù'ndà lo tamte ndo' ta' dù' kumba' z'a be ta' nz'é ntshù' num tse nze tàn num njoṅ kub kumba' là.

³²Bo lo' à ntshwèn nkom ghabndà ts'a be nga' bag bàa là yi. A ghù bo tshebte ba kérubim, tshaten boa nsàmtù mebwô bwe, njo' yub gol; a yo' gol mba num ba kérubim boa ntshatene.

³³Nzendà ndà Nsi lo ghù mbatndà ts'a ke ndo' ta' bag kub kumba' num tse kuà là.

³⁴Ghabndà tse ts'a be bag bàa là, bo lo' à tù tô kà nkom yub yi. Mba sit ghabndà lo ghù nkam mi mbàa.

³⁵Salomon ghù bo tshebte ba kérubim, ntshaten boa nsàmtù bwe, a yo' yub gol, njo' tà nkum num ve z'a tshebte là.

³⁶Bo kut kumba' bam ntshundà ntùm bwe nka ndoṅ netshua'te ntat bo ta' nka ntù sédra.

³⁷A lo be mbatte ngu'njù kuà mba Salomon jù fen nà, mum ṅwù Ziv, bo ma' tun ba' ndà Tshùaben.

³⁸A lo be mbatte ngu'njù ntshob ntshù' gham, ntùm ṅwù Bul z'a be mbatte maṅwù fom nà, bo miagte ba' fa, mb'a bwô ndù bo kul i là. Salomon lo yab ngu'njù sammbàa nekut yen ba' là.