Read Medumba 1 Fenfen 8 Bible Online

1 Fenfen 8 - Medumba bible

1 Fenfen 8

¹Ndùlala mfen Salomon tse'te njoṅ ghakwé mbwe bon Israél, njoṅ fenfen nzwit Israél boa njoṅ tà tunndà bon Israél fa mbaṅ i mà Yérusalém, num neket Koṅ Kàn Tshùaben s'a be ntùm tusô David se lén se be Sion nà.

²Njoṅ ba Israél fa tse'te mbaṅ mfen Salomon ntùm ṅwù Etanim z'a b'a mbatte ṅwù sammbàa là. A na' mb'a ngelaṅ jùa ntàb.

³Ndùse njoṅ ghakwé mbwe bon Israél fa ṅwag là, ghale'te Nsi ket Koṅ.

⁴Bo ket Koṅ Tshùaben bo ntàb mbumte boa njoṅ tshufa' nelàn fa ts'a be ntùm bwe là. Ghale'te Nsi boa ba Lévi na' mbèn nket Koṅ Tshùaben.

⁵Mfen Salomon boa njoṅ ntse'te bon Israél fa nke ntsin mbwe Koṅ. Bo fà mbwe boa nyàmna' yàm neshu, kà mèn ke bèn nku'ni nesiaṅ ndèn njoṅ i.

⁶Ghale'te Nsi ket Koṅ Kàn Tshùaben njab num ze dù', ntùm dù' nelàn mum ndà, ntùm dù' nelàn ntshùate, bam mbàb ba kérubim.

⁷Nummbe mbàb ba kérubim lo sag tà nyit nèn nkabte dù' ze Koṅ be là; ba kérubim nke mbomte Koṅ boa nkeba nelo' nket Koṅ yi.

⁸Nkeba lo sag neshu kà bo nke ntsin dù' nelàn njen ntôg mi ntùm dù' nelàn ntshùate; là bo lo ke be yen ntôg mi njam njù. Men nkeba là num nke' tà nse' nkum sènni.

⁹Nda' ntafèt mbàa mi ndoṅ mi Mosé na' njab bwe Horéb là na' mbe ntùm bwe. Men ntafèt là b'a mi Mosé kwé ndùse Tshùaben wat kàn boa bon Israél ndùse bo tum mum ngô Egipto là.

¹⁰Ndùse ghale'te Nsi tum dù' nelàn nà, ndot dun num Ndà Tshùaben.

¹¹Ghale'te Nsi ke ku'ni neghô bwe mfa' fa' num nu ndot. Nummbe nkuni Tshùaben lo dun ntùm ndà i.

¹²Ndùlala Salomon tshob ndù: Tshùaben tshob mb'a' tswe ntùm njame.

¹³Ndùlala me kut ta' ba' z'a nsi be yu dù'ntswe là, dù' z'o nsi tswe bwe matmat là.

¹⁴Mfen kaṅ wul i nze dù' ze ntse'te bon Israél be là, naṅ mbotni num bo, ndù bo tsinte tù.

¹⁵A tshob ndù: Ghamte be Tshùaben, Nsi Israél, ze tu wul i na' ntshob nu tàa David ntshu i là. Tu wul i tshwèt nzwiagte yen nka'ni là ntùm neta nke ntshob ndù:

¹⁶Fe num lé'njù se me na' nsô yàm nzwit mèn Israél mum ngô Egipto là, me ke' yoṅ ntsho' tusô netèt njoṅ nzwit Israél fa dù' ze bo nsi kut ba' bwe, lén sàm ke mbe bwe là; là me lo tsho' David ndù a tô yàm nzwit mèn Israél.

¹⁷Tshù, tàa David lo ghù nkwate nekut ta' ba' num lén Tshùaben Nsi Israél.

¹⁸Là, Tshùaben tshob tàa David ndù: Mb'o ghù nkwate nekut ta' ba' num lén sàm nà, o ghù a bwô mba yen nkwate là se' ntù o là.

¹⁹Nda' ndù a ke b'a wù nsi bèn kut ba' me, là nshum o z'a tum zwe' o là nsi bèn kut ba' num lén sàm.

²⁰Tshùaben zwiagte ntshob mi a na' ntshob là. Me lo tswe num ze dù' tàa David, ntswe num diaṅkwa ngô Israél, mba Tshùaben na' ntshob là, kà nkut ba' num lén Tshùaben Nsi Israél.

²¹Me nabte dù' ntùm bwe neyab Koṅ bwe, Koṅ se kàn be bwe là. Sen Kàn nà b'a s'a na' ngwat boa tà be ndùs'a sô yub mum ngô Egipto là.

²²Salomon lo nèn ntsin mbwe tômbwôg Tshùaben, mbwe njoṅ ntse'te bon Israél fa, mbù' mbu mi mfe kamànyam, ntshob ndù:

²³O! Tshùaben Nsi Israél! Mo' Nsi ke bwe z'a fut'o là, ke mfe tù mfe kamànyam, ke mànsi num nsitsha' lo. O be ntshùb kàn bo kondèn o num ghafa' tsho tse bo be nzin mbwe o njoṅ ngô ntù yub fa là.

²⁴Ndùlala, o lo tshùb ntshob mi o na' ntshob ngafa' o, tàa David là. O tshwèt ndo' à neta nzwiagte nu z'a tum ntshu o là yi sènni.

²⁵Tshùaben Nsi Israél, lôte mba mo' nka'ni mi o na' nka' tàa David, ngafa' o là ndonni. O lo tshob yi ndù: B'o ke zi mbwoṅ njùndà o num màm miag, njùndà z'a nsi tswe diaṅkwa ngô Israél là. A b'a nda' ndù bon tsho tse bandum zete num nzin mube, nke nzin mbwe àm ndaṅndaṅ mba tu wul o na' nzin mbwe àm nà.

²⁶O! Nsi Israél, a bwô ndù o zwiagte nka'ni mi o na' nka' tàa David, ngafa' o là.

²⁷A b'a kua' nenùn ndù be Nsi tswe num nsitsha' ké? Tshù là, kamànyam, njoṅ kamànyam fa kag num o, kà njôg mbe se' num yen ba' li ze me kut là!

²⁸Mba tà ndùlala, a bwô Tshùaben Nsi àm kù' ntoṅ nju' le'te bo ze nema' mbu ngafa' i; a bwô ndù o nz'é, o ju' le'te z'a tshwèt nde't'o yi sènni là.

²⁹A bwô ndù miag mu te num yen ba' li, num yen dù' li z'o na' ntshob ndù lén so nsi be bwe là. A bwô ndù o ju' le'te ze ngafa' o tsin dù' mbit nke nde't'o yi là.

³⁰Netsho'o, bam ze nema' mbu ngafa' o bo ze yu nzwit mèn Israél ndùse bo nsi tswe num yen dù' li le't'o là! Ju' nze yub tà mfe tù, mum dù'ntswe o mfe kamànyam, ju' nze yub ndagte mfà bo.

³¹Mèn ghù nukebwô mfèl i, bo nànt'é ndù a nu ngu, nkàn mfe, a be z'a se' nkàn mfe mbwe tômbwôg wù Tshùaben, ntùm yen ndà li là,

³²mb'a bwô ndù o tsin mfe kamànyam nju' nz'é, ngù num i mb'a bètte là. Tsho'te ghafa' tsho; naṅ ntsha tu ngafànnu, ngù ndù nzin mi vù a be tu i; ghù nunetsin mbu'u, ngù num i a mb'a b'a mbu' là.

³³Ndùse yu nzwit mèn Israél nsi vù ntsho mbwe ngakeban, mb'a ta tu wù là, a be ze bo bèn njam ntèl o, mfà ghamte num lén so, a be ze bo le't'o, ma' mbu wù ntùm yen ndà li là,

³⁴mb'a bwô ndù o tsin mfe kamànyam ndagte nukebwô yu nzwit mèn Israél, ndo' yub mbèn yi njam ntùm ngô z'o na' mfà tà tshob là.

³⁵Ndùse kamànyam nsi fùne, mbaṅ be ke lo, num nukebwô tse bo ghù num o là, a be ze bo le't'o mum yen dù' li, mfà ghamte num lén so, ndo' mvèn yub ntam nukebwô tshob yi, mb'o ma'ni yub là,

³⁶mb'a bwô ndù o tsin mfe kamànyam ndagte nukebwô ghafa' tsho bo yu nzwit mèn Israél. Tswite yub manze ntùn ze bo nsi ke zin num bwe là. A bwô yen ngelaṅ nà ndù o ghù mbaṅ lo num tsha' ts'o na' mfà yu nzwit mèn mba ntsi' là.

³⁷Ndùse kekua, keya', bangùa, mbé', ngamntàn nze bàa nsi be ntùm ngô, ndùse ngakeban nsi lo' yu nzwit mèn mum ze ngô, tsho mum tse nsém, ndùse nge' yàm ke ngokèt nzenze lo nsi be là,

³⁸a be ze ta' mèn, a be ze njoṅ yu nzwit mèn Israél fa ke nde't'o, nke ma' mbu wù, mba we lo lèn ze mfaṅ z'a ntù i, nyit mbu mi ntshag num yen ba' li là,

³⁹mb'a bwô ndù o tsin mfe kamànyam ntùm dù'ntswe o ndagte mbèn njwimte. Ghù mba we lo mb'a bètte là, mba nzin mi be yi là; tu wul o lèn ntù mba we lo, o bèn ndèn ntù njoṅ benntùn fa.

⁴⁰Bo nsi ke bwôg o njoṅ ngelaṅ fa ze bo nsi yôg ntùm ngô z'o na' mfà tà tshag là.

⁴¹Ndùse ngùn z'a ke' tum à netèt yu nzwit mèn Israél nsi fe ngô z'a ngùanesà num nu lén so,

⁴²nummbe bo nsi lèn ndù lén so b'a se ndùb, bu o be ze neta, laṅbu so be ndù a sage, se' le't'o ntùm yen ndà li là,

⁴³mb'a bwô ndù o tsin mfe kamànyam, ntùm dù'ntswe o, mfà ju ze yen ngùn nà nsi lon wù là yi. A nsi tshùa ndùlala njoṅ nzwit benntùn fa nsitsha' lèn lén so, nke mbwôg i, ndaṅndaṅ mba yu nzwit mèn Israél là. Bo nsi lèn ndù bo be ntsiaṅ lén so mum yen ba' li ze me kut là.

⁴⁴Ndùse yu nzwit mèn nsi tum nèn ma' ngakeban ntsho, zin à num manze z'o nsi la'te yi là, a be z'a le'te Tshùaben, nkaṅ se i nke ndôt'a tusô s'o na' ntsho'o, nke ndôt'a ba' ze me kut num lén so là,

⁴⁵mb'a bwô ndù o tsin mfe kamànyam nju' le't'é bo ze nema' mbu, ngù nunetsin yi.

⁴⁶A be ze bo ghù nukebwô num o, nummbe sàm mèn ke bwe z'a ke' be ghù nukebwô là, o ya ntù num bo, mfà yub mum mbu ngakeban, ndù a lo' yub nèn yi ndà kuan mum ze ngô, yen ngô là sag ke neghebte lo,

⁴⁷bo tsho bwe nkaṅ ntù tshob mum yen ngô là bo be kuan bwe ntshob ndù: Bag lo ghù nukebwô, bag lo fàn nu, bag b'a ghafànnu là, mb'a bwô ndù o lagte.

⁴⁸A be ze bo bèn njam njoṅ ngô ntù yub fa ntèl o, ntèl o mum njoṅ zwiag sob fa ntùm ngô ze bo be kuan bwe, a be ze bo le't'o, nkaṅ se yub nke ndôte, nke ndôte ngô z'o na' mfà tà tshobe, nke ndôte tusô s'o na' ntsho'o, bo ba' ze me kut num lén so là,

⁴⁹mb'a bwô ndù o tsin mfe kamànyam dù' ze dù'ntswe o be là, nju' le'te boa yub nema' mbu, ngù nunetsin num bo.

⁵⁰Lagte nukebwô yu nzwit mèn boa njoṅ mfànnu mi fa mi a ghù num o là. So kondèn ntù ben tse bo tshùb yub ndà kuan nà, ndù bo ko ndèn mube;

⁵¹nummbe bo b'a yu nzwit mèn, mbe ntsi' mu, ndù o lo sô yub ntùm ngô Egipto netèt ndà mbwôg z'a ku'ni neghù tùn yag là!

⁵²A bwô ndù o gha' miag mu num le'te ngafa' o bo le'te yu nzwit mèn Israél, ndù o fà mba ke lo ze bo nsi lon wù là bo.

⁵³Tshùaben Nsi, o lo fagte yub num tsemo' nzwit fa num nsitsha'a, ndo' yub ngù ntsi' mu yi, ndaṅndaṅ mb'o na' ntshob ngafa' o Mosé ndùs'o ke nsô tà tshag ntùm ngô Egipto là.

⁵⁴Ngelaṅ ze Salomon miagte nele'te Tshùaben mba nema' mbu yi là, a lo mbwe tômbwôg Tshùaben dù' z'a te ntunkekwi' mi nsi, nyit mbu mi mfe kamànyam nà.

⁵⁵A lo tù, ntshag nz'é tù naṅ mbotni num njoṅ ntse'te bon Israél fa ntshob ndù:

⁵⁶Ghamte be Tshùaben z'a fà fite ze nzwit mèn Israél mb'a na' njù' mum nka'ni mi là! Sàm ntshob ke netèt mi a na' ntshob ngafa' i Mosé là mi a tôg banban nà.

⁵⁷A bwô ndù Tshùaben Nsi be be netèt be mb'a na' mbe boa tà be là. A ke' bwô ndù a kag bu be, ke bèn ngua' be.

⁵⁸Là, a bwô ndù a so ntù be num i, ndù be ke nzin num njoṅ tse manze fa, nke nze nkàn mi, ntshù' mi boa ntag mi, mi a na' nkite mfà tà be là!

⁵⁹A bwô ndù tshen le'te li tse me tshwèt nde'te Tshùaben Nsi yag yi là ke mbe ntù i mbwôgtshù bo tèttswe', ndùlala ndù a ghù nunetsin ngafa' i mba ze nzwit mèn Israél, ngù mb'a ku'ni là mba num sit lé'njù lo.

⁶⁰A nsi tshùa ndùlala njoṅ nzwit benntùn fa num nsitsha' lèn ndù Tshùaben b'a Nsi, mbe ndù mo' ke' bèn mbe.

⁶¹A bwô ndù bin fà njoṅ ntù zin fa Tshùaben Nsi be ke sébte sàm ju bwe, ndùlala ndù bin ke nzin mb'a be ntùm ntshù' mi là, nke ntshùb ntag mi mba bin tshwèt ngù sènni là.

⁶²Mfen boa njoṅ ba Israél fa fà jule'te Nsi mbwe Tshùaben.

⁶³Salomon zwite nyàmna' ntsha' ntshob bàa ṅam mbàa boa mbwe ntsha' bon bàa nkù mba jule'te Nsi ze nelon fite yi Tshùaben nà. A tshùa ndùlala mfen boa bon Israél jù jùa num ba' Tshùaben.

⁶⁴Mfen tsho' ntshub netèt bam ntshundà z'a na' mbe mbwe ba' Tshùaben nà sen lé'njù là; nummb'a lo ton tshule'te Nsi tse nelon fite yi. Tômbwôg tùn s'a be mbwe Tshùaben nà lo kag neshu mb'a be nzenze tshule'te tse bo ton boa nzit tshule'te Nsi tse nelon fite yi tsho bwe là.

⁶⁵Salomon jù jùa yen ngelaṅ nà boa njoṅ ngô Israél fa. Mo' bwoṅ benntùn fe dù' ts'a ghebte là, nelo Hamat tà nèn nkum fub s'a be Egipto là, nse' ntse'te mbwe Tshùaben Nsi yag, be ndùlala mum lé'njù (ntshob kuà gham).

⁶⁶A lé'te benntùn num mbatte lé'njù fome. Bo be nèn ntùm ndà tshob nke nyàmte mfen, ntù tshob nke ntsiaṅte num njoṅ mebwô fa ze Tshùaben na' ngù num ngafa' i David bo Israél ze nzwit mèn nà.