Read Medumba 1 Fenfen 9 Bible Online

1 Fenfen 9 - Medumba bible

1 Fenfen 9

¹Ngelaṅ ze Salomon miagte nekut ba' Tshùaben, ba' mfen boa njoṅ tshu fa ts'a ko' ntù i neghù là,

²Tshùaben ṅwag yi mbatte yoṅ bàa, mb'a na' ṅwag yi Gabaon nà.

³Tshùaben tshob yi ndù: Me ju' le't'o bo nema' mbu ts'o tshob me là. Me lànte yen ba' li z'o kut num nete lén sàm bwe matmat là. Me nsi te miag màm bwe, yab ntù àm bwe njoṅ ndù fa.

⁴Tu wul o, a be z'o ke nzin mbwe àm à mba tàan David na' nke nzine, ntùm nenùne, bo ntù ndaṅndaṅ, nke ngù ju ze me tshob là, a be z'o ze ntshù' màm bo ntag màm nà,

⁵mba me nsi te o num diaṅkwa fen Israél matmat, ndaṅndaṅ mba me na' ntshob tàan David là. Me lo tshob yi ndù a ke nsi bwoṅ njùndà i num diaṅkwa Israél.

⁶Là, a be ze bin lo' mvèn zin ntam àm yi, wù bin à nshumnshum tsho là, a be ze bin ke' ze nkàn màm, ntshù' màm mi me na' nkite bin nà, a be ze bin tam njam tsemo' nsi, nke ngwù nsi mbwe bo là,

⁷mba me nsi biagte Israél ntùm ngô ze me na' mfà yi là, ngua' ba' ze me te lén sàm bwe tà ngùanesà, Israél tù' à tshô tuswe bo tunu zwi netèt ngôngô.

⁸Ke yen ba' li be ndù a kuni be ndùke lo, mba mba we lo z'a nsi tshùa mbaṅ bwe là nsi tshàme, tôte fin. Bo nsi ke tshob ndù: Numke Tshùaben ngù num yen ngô li bo yen ba' li ndù à?

⁹Bo ke mbùnte ndù: Nummbe bo lo ghua' Tshùaben Nsi yub, z'a na' nsô tà tshob ntùm ngô Egipto là, nummbe bo tam njam tsemo' nsi, ngwù nsi mbwe bo, mfa' bo; tshù ju z'a ghù Tshùaben ghù tshen nge' li kab mbu num bo là.

¹⁰A lo be kum ngu'njù ṅam mbàa ndù Salomon kut mba' mbàa: Ba' Tshùaben bo ba' mfen.

¹¹Ndùlala Salomon fà ntumla' ṅam mbàa Hiram mum bag ngô Galiléa. Nummbe Hiram mfen Tiro lo fà ntù sédra boa ntù tô, mba ntu'ntu' gol Salomon kua' njoṅ z'a ke nkô là.

¹²Hiram tum Tiro nèn yen ntumla' mi Salomon na' mfà yi là.

¹³Là, men ntumla' là ke bwô i, ndùlal'a tshob Salomon ndù: Mfèl àm, a ke lèn ntumla' li mi o fà m'à? A tswi lén sob ndù ngô Kabul. Sen lén nà bèn nke' tà nse' nkum sènni.

¹⁴Hiram lo tum ntu'ntu' gol mfen Salomon bon bàa nkù.

¹⁵Tshù bag z'a lôte benntùn tse mfen Salomon lo' yub nefa' njôgmasi num nekut ba' Tshùaben bo ko' ze ba', kàbngô z'a Millo, Yérusalém, Hatsor, Megiddo bo Guézer li.

¹⁶Faraon, mfen Egipto lo ko' nse' ndo' Guézer, nton i ndùs'a zwite ba Kanaan tse bo ke ntswe tusô là. Yen nà be tshùa, a fà dù' là ngon i z'a be nzwi Salomon nà mba nkàb ghu là.

¹⁷Ndùlala Salomon kut Guézer, Bét-Horon z'a tunnsi là,

¹⁸Baalat bo Tadmor z'a be bag ngô z'a ghù kônkwa là.

¹⁹A kut njoṅ ntusô fa, mi nta ts'a be ntùm bwe na' mb'a tse là, ntusô nkalig ntsho, ntusô ghako' nyàm bo njoṅ tshu fa ts'a bwô Salomon nekut Yérusalém, Liban, bo njoṅ ngô fa z'a be mfen ntùm bwe là.

²⁰Njoṅ nzwit benntùn fa tse bo na' ntù'ù: Ba Amor, ba Hit, ba Férésia, ba Hévia boa ba Yébusia là, tse bo na' mbe ke b'a bon Israél là;

²¹njoṅ yub nzwit fa tse bo na' ntù' ntùm ngô, bon Israél ke zwite yub là. Salomon lo lo' yub ngù kuan yi num nu njôgmasi; bo ke' be yi tà nse' nkum sènni.

²²Là Salomon lo ke lo' bon Israél ngù kuan yi; nummbe bo na' mb'a ghale' ntsho; mbe ghafa' tse, mbe kamkam tse, mbe tse tàndà ntsho, ghatshagte nkalig mi bo tse ghako' nyàm.

²³Ghatshagte fa' tse Salomon tsho' yub neke ndôte ghafa' là na' mb'a benntùn bon tàn nkù tàn.

²⁴Ngon Faraon lo ntùm tusô David nko' nèn ntùm ba' ze Salomon kut yi là. A yen ngelaṅ nà ze bo kut Millo là.

²⁵Salomon lo ke nton tshule'te Nsi yoṅ tat tamngu' boa tshule'te Nsi tse nelàbte Nsi yi num tômbwôg s'a kut Tshùaben nà. A nke nton ba labinda num tômbwôg s'a be mbwe Tshùaben nà. A miagte nekut ndà Nsi.

²⁶Mfen Salomon nabte nsitima mà Etsjon-Guéber, mbaṅ Elot, num nkaṅ dibantse meba, ntùm ngô Edom.

²⁷Hiram tum ko' tse ghafa', ghafa' ntùm mi nsitima tse bo lèn dibantse mebwô là mbaṅ tse ghafa' Salomon mba mbaṅ mi nsitima Salomon.

²⁸Bo nèn Ofir ndo' gol bwe, ntu'ntu' mi bon bàa nkù kuà nèn ntèt mfen Salomon yi, mfà yi.