Read Medumba 2 Fenfen 1 Bible Online

2 Fenfen 1 - Medumba bible

2 Fenfen 1

¹Ndùse Akab kwù là, Moab tù' nkam num Israél.

²Akazia tum num seba' to'ndà i z'a be tù là ngwù nsi, nket mfaṅe. A na' mb'a mà Samaria. A tum ba ntum, ntshob bo ndù: Bin nèn mbètte Baal-Zebub, nsi ba Ekron, mbe ze me nsi lo num yen ngokèt li là.

³Là Angél Tshùaben tshob Elia ze Tisbite ndù: Lo nsi nko' nèn mbumte bin ngantum mfen Samaria ntshob bo ndù: Nsi ke' be Israél kà bin nke nèn bètte Baal-Zebub, nsi ba Ekron nu ké?

⁴A ndùlala Tshùaben tshob ndù: B'o ke swe' num kunndà s'o nô bwe là, nummb'o nsi kwù. Ndùlala Elia lo nène.

⁵Ghantum bèn njam mbaṅ mfen Akazia, a bètte yub ndù: Numke bin mbèn njam à?

⁶Bo bùnte yi ndù: Bag à mo' mèn bumte, a tshob bag ndù: Bin bèn njam mbaṅ mfen z'a tum zin nà ntshob yi ndù: Tshù ju ze Tshùaben tshob li: Nsi ke' be Israél k'o nke nèn bètte Baal-Zebub nsi ba Ekron nu ké? A ndùlala b'o ke swe' num kunndà s'o nô bwe là, nummb'o nsi kwù.

⁷Akazia tshob bo ndù: Mèn ze bin à bo bumte, a tshob men tshob là bin nà ke ntshù à ndùke?

⁸Bo bùnte yi ndù: A mèn ndù a ket nzwe nyiaṅnyiaṅ, ntaṅ kob ngub tun i. Akazia tshob ndù: A b'a Elia ze Tisbite.

⁹Akazia tum ta' mfen soyé z'a ghù benntùn ṅam ntàn nà boa tshen ben nà mbaṅ Elia. Mfen soyé là ko' nèn mbaṅ Elia z'a tswe mfe tu mbat là, ntshob yi ndù: Mèn Nsi, mfen mb'o swe'e.

¹⁰Elia bùnte mfen soyé ntu ṅam ntàn ndù: A be ze me b'a mèn Nsi là mbwôg swe' mfe kamànyam nkù o bin à ben tsho tse ṅam ntàn. Mbwôg swe' mfe kamànyam nkù i boa ben tse tse ṅam ntàn.

¹¹Akazia bèn ntum mo' mfen soyé boa ben tse ntu ṅam ntàn mbaṅ Elia. Mfen soyé tshob Elia ndù: Mèn Nsi, mfen mb'o nànte nswe'e.

¹²Elia bùnte ntshob bo ndù: A be ze me b'a mèn Nsi là, mbwôg swe' mfe kamànyam nkù o bin à ben tsho tse ntu ṅam ntàn.

¹³Akazia bèn ntum mbatte mfen soyé tat boa ben ntu ṅam ntàn. Yen mbatte mfen soyé li nèn. Ndùs'a kum mbaṅ Elia là, a te ntunkekwi' mi nsi mbw'é ntshob yi ndù: Mèn Nsi, me le't'o ndù o lo' yôg sàm bo yôg ben ntu ṅam ntàn tse bag à bo be là tanjoṅ!

¹⁴Yen ndù mbwôg lo nswe' mfe kamànyam nkù mbwe soyé bàa, mba we lo boa tse ben ntu ṅam ntàn. Ndonni a bwô o yen yôg sàm mba ju tanjoṅ nà num miag mu.

¹⁵Angél Tshùaben tshob Elia ndù: Swe' nèn bin yi, kà bwôg i num sàm nu. Ndùlala Elia lo nswe' nèn bo yi mbaṅ mfen.

¹⁶Elia tshob yi ndù: Tshù ju ze Tshùaben tshob li: mb'o tum ghantum ndù bo nèn mbètte Baal-Zebub nu mba Nsi ke ntùm ngô Israél ze be bo bètt'é nu là, o ke nsi lo num kunndà ngokèt s'o nô bwe là, nummb'o nsi kwù.

¹⁷Akazia kwù mb'a be ntùm ntshob Tshùaben mi Elia tshob là. Mb'a na' mbe ke ghù mén nà, mfèl i Yoram tô num ze dù'; yen nà na' mb'a mbatte ngu'njù bàa mba Yoram nshum Yosafat be mfen Yuda là.

¹⁸Tshé' mfa' Akazia bo tshu ts'a ghù là, bo kite njoṅ i fa ntùm ṅwa'ni Kronika fenfen Israél.