Read Medumba 2 Fenfen 10 Bible Online

2 Fenfen 10 - Medumba bible

2 Fenfen 10

¹Nshumnshum Akab lo be Samaria ntu ṅam sammbàa. Yéhu kite ṅwa'ni ntum fenfen tse bo be Samaria là, ben ndùbndùb boa ngomna tse bo ke ndôte bon Akab là.

²A lo kite ntùm ṅwa'ni ndù: Ndonni a be ze yen ṅwa'ni li kum bu bin nà, mba bin à nshumnshum tàfa' zin bèn mbe, bin bèn ngù nkalig boa nyàmdiaṅe, ngù ngô ze bo kule, boa tshuntshùag là.

³Bin lôte nshum tàfa' zin z'a be ze ntùn, nku'ni là, nte i num diaṅkwa tàab, nde' ntsho ndo' ntshètte tunndà tàfa' zin yi!

⁴Mo' mà bwôg ndùb ghom yube, bo tshob ndù: Tshù là, fenfen bàa lo fùag mbw'é, be kua' be li b'a kua' ke mbw'é à?

⁵Ndùlala, tàndà mfen tusô, fenfen boa ngomna tse bo ke ndôte bon nà tum nèn ntshob Yéhu ndù: Bag b'a ghafa' tsho, bag nsi ghù mba ke lo z'o nsi tshob bag là; bag ke nsi te sàm mèn num fen, ghù ju z'a bwô num miag mu là.

⁶Yéhu kite mbatte ṅwa'ni bo, ntshob ntùm bwe ndù: A be ze bin b'a tshàm ben, mbe ndù bin a' ju' ntshu àm na', bin lo' tu bon nà, nshumnshum tàfa' zin nse' yi mbwe àm Yizréel ndamnjù num yen ngelaṅ ni. A lo be be ndù nshumnshum mfen ntu ṅam sammbàa b'a ju ben ndùbndùb tse bo na' nkwiagte yub là.

⁷Ndùse ṅwa'ni kum bu bo là, bo lo' tshen nshumnshum mfen nà, nkebte tu tshen benntùn ntu ṅam sammbàa là. Bo yabte tshen tu là ntùm ntsi, ntum Yéhu mà Yizréel.

⁸Ntum se' nsoṅ yen nu là ntshob ndù: Bo lo' tu nshumnshum mfen nse' yi. A tshob ndù: Bin tse'te tse tse bàa ntshu nsém tà nèn nkum nkebnjù.

⁹A be nkebnjù Yéhu tum ntsin mbwe ngô ntshob ndù: Bin b'a ben netsine! Tu wul àm lo ze ntsham tàfa' àm nzwi i; kua' we yôg mbèn nzwi ze tshen ben ni à?

¹⁰Bin lèn ndù be ntshob mi Tshùaben na' ntshob num tunndà Akab là ke be banban; Tshùaben nsi zwiagte ju z'a tshùa num ntshu ngafa' i Elia ntshob là.

¹¹Ndùlala Yéhu zwite njoṅ benntùn fa tse bo tù' ntùm ze tunndà Akab là Yizréel: Ben ndùbndùb, fèt tse, ghaka tse, ke faṅ sàm mèn mba ntshù' tum.

¹²Yen nà be tôg a lo nèn Samaria. Yéhu kum Bet-Eked-Haroim num manze,

¹³ntèt fèt Akazia mfen Yuda bwe, ntshob ndù: Bin b'a ba we? Bo bùnte ndù: Bag b'a fèt Akazia, bag ke nswe' nèn tsha't'a bon mfen boa bon màmfen.

¹⁴Yéhu tshob ndù: Bin ghomte yub ntùnntùn. Bo ghomte yub ntùnntùn, nkebte tu tshob ntu ntshob bàa ṅam nkuà tôntse Bét-Eked. Yéhu ke bam mba ta' i ntshù' tum.

¹⁵A lo nsen nà, mbumte bo Yonadab nshum Rékab z'a ke nse' mbw'é là. A tsha't'é, mbètt'é ndù: Ntù o b'a nelàn mba ntù àm be nelàn num o l'à? Yonadab bùnte ndù: A b'a nelàne. Yéhu tshob ndù: Fà bu o me, a be ze ntù o b'a nelàn nà. Yonadab fà bu i yi. Yéhu ghù Yonadab ko' nse' mbaṅ i ntùm kalig se;

¹⁶a tshob ndù: Se' be nène, o nsi yen njoṅ nkôni ze me ghù num Tshùaben nà. A kel i ntùm kalig se bo yi nèn.

¹⁷Ndùse Yéhu kum Samaria là, a biagte njoṅ tshé' ben Akab tse bo tù' Samaria là, mbiagte yub fafa mb'a be ntùm ntshob mi Tshùaben na' ntshob Elia là.

¹⁸A kùmte ngô ntshob bo ndù: Akab lo fa' Baal à metsili, Yéhu nsi fa' yi kua' mà yàme.

¹⁹Ndonni a bwô ndù bin tsiaṅ njoṅ tse ghatshob ntshob Nsi Baal fa mbaṅ àm, njoṅ ghafa' tse fa, njoṅ ghale'te fa. Kà sàm mèn mba ntshù' tag nsi, nummbe m'a' fà kua' jule'te ndùb Baal. Mba we lo z'a tag nsi là nsi lo' tu i tô yi. Yéhu lo' mfù ngù yi ndùlal'a netshùa bwe mbiagte ghafa' Baal.

²⁰Yen ni be tôg Yéhu tshob ndù: Bin ghù ta' jùa num lén Baal. Bo jù jùa num lén Baal.

²¹A tum ba ntum ntùm njoṅ ngô Israél fa, njoṅ ghafa' Baal fe bag bag nse'e, sàm ta' i mba ntshù' ke tag nsi. Bo tsho ntùm ndà Baal, ndà Baal dun njoṅ taṅ tse fa.

²²Yéhu tshob ngabéb dù' nelem tshu bwe ndù: Fà nzwe njoṅ ghafa' Baal fa. A fà nzwe njoṅ yub fa.

²³Yéhu tsho bo Yonadab nshum Rékab ntùm ndà Baal, ntshob njoṅ ghafa' Baal fa ndù: Bin lôte, kà ndèn mbe ze sàm ngafa' Tshùaben ke' be nsi, kà bin b'a be bin bin ghafa' Baal là.

²⁴Yen nà be tôge, bo tsho ndà mfà tshule'te, nton tse bo ton neton nà. A lo be be ndù Yéhu tete benntùn ṅam fom njù, ntshob bo ndù: A be ze mba we lo netèt bin kag mèn ze me nsi fà mum mbu min nà, mb'a nsi lo' tu i tô yi.

²⁵Ndùse bo fà tshule'te tse neton ton nà, Yéhu tshob ghabéb dù' boa sa'nde' ndù: Bin tsho ndà mbiagte yube, ke bam ndù sàm ta' i mba ntshù' tume. Bo watte yub ṅwi. Ghabéb dù' boa sa'nde' ma' fe tshob bwe, ntsho ntùm mbwe' ndà Baal.

²⁶Bo tsho ndà, ntsho' fébnsi fa' neghamte ntone.

²⁷Bo tèn bebun Baal ma' nsi, ntèn ba' Baal ma' nsi; bo lo' ngù tô nenà yi, ndù dù' i ke' tà nse' nkum sènni.

²⁸Yéhu biagte Baal netèt Israél;

²⁹nda' ndù ke tsho' ntù i num nukebwô Yéroboam nshum Nebat, z'a na' ngù Israél ghù nukebwô là. A ke tsho' ntù i num mfô gol ts'a be Bétél mba Dan nà.

³⁰Tshùaben tshob Yéhu ndù: Mb'o fa' ju z'a bwô num miag màm, ngù num tunndà Akab mba me kô là; nshumnshum tsho nsi be num diaṅkwa Israél num zwiaṅ njù kuà.

³¹Mba tà ndùlala, Yéhu ke lo' mba ju là neke nzin ntùm ntshù' Tshùaben Nsi Israél. A ke tsho' ntù i num nukebwô tse Yéroboam na' ngù Israél ghù là.

³²Num yen ngelaṅ nà, Tshùaben to' neke nsébte tse tsha' Israél. Hazaél ton ba Israél ntsho num njoṅ bag ngô fa.

³³Neto' Yordan nèn nkum ntumnyam, a ton njoṅ ngô Galad fa ntsho, ben Gad, tse Rubèn boa tse Manasé, neto' Aroer num fub Arnon nèn nkum Galad mba Basan.

³⁴Njoṅ tshé' mfa' Yéhu fa, tshu ts'a ghù là, ntsho ts'a le' là, bo kite ntùm ṅwa'ni Kronika fenfen Israél.

³⁵Yéhu nèn ntèt tà tse, bo tshoṅ i Samaria. Yoahaz nshum i tô num ze dù'.

³⁶Yéhu lo tô Israél ngu'njù ntshob fom ṅam mbàa, nke ntswe Samaria.