Read Medumba 2 Fenfen 11 Bible Online

2 Fenfen 11 - Medumba bible

2 Fenfen 11

¹Atalia, mà Akazia be yen mba nshum i kwù là, ndo nsi, mbiagte njoṅ nzwit fen fa.

²Là, Yoshéba, ngon mfen Yoram mfèt Akazia, ze mènnzwi, lo' Yoas nshum Akazia, nsô i netèt bon mfen, ndùse bo ke nzwite yub là. A fà i nz'é ntùm to'ndà nkunndà. A tshùa ndùlal'a ntum ntshu vùkob, Atalia ke zwi i.

³Yoshéba lem i num ngu'njù ntôg ntùm ndà Tshùaben. Atalia na' mbèn nke ntô ntùm ngô.

⁴A lo be kum mbatte ngu'njù sammbàa Yéhoyada tum bo nèn ntsiaṅ tàmànjô ba Kérét z'a ke ntô benntùn nkù là boa ghakùnde, bo nèn mbaṅ i ntùm ndà Tshùaben. A wat kàn boa bo, ngù bo nu ngu ntùm ndà Tshùaben. A la'te mén mfen bo.

⁵A tshob bo ndù: Tshù ju ze bin nsi ghù li: Ta' kam benntùn num nkam mi ntat z'a fa' lé' Sabbat là nsi béb à ba' mfen;

⁶mbatte nkam mbàa tsinte num nzendà Sur, mbatte kam i z'a kum tat là tsinte njam ghakùnde. Bin béb ba' mfen, ke bam ndù sàm mènntùn tsho bwe.

⁷Tshé' nkam benntùn mbàa tse bo tù'ù, nke ntù' nenèn fite lé' Sabbat là nsi béb ndà Tshùaben mbaṅ mfen.

⁸Bin nsi lam mfen diaṅ bume, mba we lo bo se kô bu i. Bo nsi zwi mba we lo z'a tshwèt ndiag netsho nka là. Bin ke ntshètte mfen ndùs'a tshwèt ntum mba ndùs'a tsho là.

⁹Ndùlala tàmànjô tse bo ke ntô benntùn nkù là kua' ndaṅndaṅ mba ngale'te Nsi Yéhoyada tshob là. Mba ba we lo lo' yub dù', ben bo to' fa' là mba tse bo ke ntum fa' netum lé' Sabbat là. Bo nèn mbaṅ Yéhoyada ngale'te Nsi.

¹⁰Ngale'te Nsi fà nkô boa ntshètntsho mi a fe David, mbe ntùm ndà Tshùaben nà tàmànjô tse bo ke ntô benntùn nkù là.

¹¹Ghakùnde diaṅ mfen mbume, ndù mba we lo kô bu i, ntsinte nelo num bag ba' ze zwim nkum ze kwéb, mbaṅ tômbwôg mba mbaṅ ba'.

¹²Ngale'te Nsi ghù mén mfen kù'te nse' mbaṅ i, a so kwa bu i, mbèn mfà ntshù' yi. Bo yo' yi, mbu'te mbu tun i ntshob ndù: Mfen te ku i num nenàfi.

¹³Atalia be ju' tshu'te ghakùnde bo ze ngô, nèn mbaṅ ngô ntùm ndà Tshùaben.

¹⁴A lôte njen ndù mfen tsin tù mb'a be matnu là, num dù' ṅaṅa, tàmànjô boa nta be mbaṅ i, ngô tam ntsha' mbaṅ i, nke ntô nta. Ndùlala Atalia fagte nzwe tse, nkua' ntshob ndù: Bo ze ntsham àm! Bo ze ntsham àm!

¹⁵Ndùlala ngale'te Nsi Yéhoyada tshob tàmànjô tse bo ke ntô benntùn nkù, mbèn mbe tu num ntshu ntsho là ndù: Bin lo' i ntum yi ntùm nka, nzwi mèn z'a fi'te netam njam i là. A lo be be ndù ngale'te Nsi tshob ndù kà bo zwi Atalia ntùm ndà Tshùaben.

¹⁶Bo kab mbu num i, ngù a tshùa num nze ze nyàmdiaṅ ke ntsho yi kà nèn ntùm ba' mfen nà. A bwe là ze bo zwi i là.

¹⁷Yéhoyada wat kàn netèt Tshùaben, mfen bo ngô. Sen kàn nà b'a ndù Israél nsi b'a ze nzwit mèn Tshùaben. A bèn ngù mfen bo ngô wat kàn netèt bo.

¹⁸Njoṅ ngô fa tum nèn ntùm ndà Baal, nsat'é. Bo be'te ntômbwôg mi boa neto tse, nzwi Matan ngale'te Baal mbwe ntômbwôg mi. Yéhoyada ngale'te Nsi ghù bo nke mbéb ndà Tshùaben.

¹⁹A lo' tàmànjô ghatô benntùn nkù, ba Kérét, ghakùnde boa ngô, ngù mfen swe' ndà Tshùaben, ntshùa num nzendà ghabéb dù', ntsho ntùm ndà mfen. Yoas tswe num diaṅkwa fenfen.

²⁰Njoṅ ngô fa nke ntsiaṅte ntùm la', tusô tswe ndù kam. Bo na' ndo' ṅwi ngwat Atalia yi à ntùm ndà mfen.