Read Medumba 2 Fenfen 12 Bible Online

2 Fenfen 12 - Medumba bible

2 Fenfen 12

¹Yoas lo be jù fen ndù a ghù ngu'njù sammbàa.

²Yéhu lo be ghù num fen ngu'njù sammbàa Yoas be mfen, ntô num ngu'njù ṅam nkuà, nke ntswe Yérusalém. Lén màab na' mb'a Tsibja; a na' mb'a ngon Ber-Shéba.

³Yoas ghù nu ndaṅndaṅ num miag Tshùaben num njoṅ ngelaṅ fa z'a ke nzin num ntag Yéhoyada ngale'te Nsi là.

⁴Nda' ndù ba mbwe' lo ke mi ntùm ngô; ngô lo ke nke' mfà tshule'te, nke nke' ma' ndu' mbwe'.

⁵Yoas tshob ghale'te Nsi ndù: Njoṅ nkàb fa ze bo yab nelo' nse' yi ndà Tshùaben, nkàb ze njoṅ bon Israél fa bo siaṅ yub se' yi là, nkàb ze bo lo' ntshu' benntùn yi, ndù bo à lèn njoṅ i là, ke nkàb ze benntùn fà ntùm bwôntù ntùm ndà Tshùaben nà,

⁶a bwô ndù ghale'te Nsi ke nkwé ben tse bo lèn yub là, là nke ndo' nabt'a ba' yi, mba num zit dù' i lo z'a bwô nenabte là.

⁷Là, a lo be kum mbatte ngu'njù ntshob tat ṅam mbàa mba Yoas be mfen nà, ghale'te Nsi ke yoṅ nabte sàm ju num ba'.

⁸Ndùlala mfen tsiaṅ ngale'te Nsi Yéhoyada boa tsemo' ghale'te Nsi ntshob bo ndù: Numke bin ke nabte dù' ba' ts'a bwô nenabte l'à? Ndonni bin ke bèn nekwé nkàb ben tse bin lèn yub là; là, bin nsi ke fà yen nkàb là num nelo' nabte ba' yi.

⁹Ghale'te Nsi bam nebe ke bèn nkwé nkàb ngô, mba ndù nu nenabte ba' ke bèn nke ndôt'a bo.

¹⁰Ndùlala Yéhoyada ngale'te Nsi lo' mo' nkub, nto tô num kabt'é, nte mbaṅ tômbwôge, num bag i ze zwim, num manze ze bo ke ntshùa bwe kà ntsho ndà Tshùaben nà. Ghale'te Nsi tse bo ke ndôte nzendà là lo ke ma' njoṅ nkàb fa bo ke nse' yi ndà Tshùaben nà ntùm bwe.

¹¹Ndùse bo yen ndù nkàb yàm ntùm nkub là, ze ngakite mfen bo ngale'te Nsi ze ndùb ko' nèn nsiaṅte nkàb z'a ntùm ndà Tshùaben nà.

¹²Ndùse bo miagte là, bo fà nkàb bu ben tse bo fà fa' nenabte ndà Tshùaben bo là. Bo nke mfà yen nkàb là ghakwim tuba', boa tsemo' ghafa' tse bo ke mfa' ntùm ndà Tshùaben nà;

¹³nke mfà mo' ghabom ba', ghatshua'te ndoṅ, nke ndo' mo' njun ntshwèn yi boa ndoṅ ntùn mi bo à tshua'te là, num nelo' nabte ndà Tshùaben yi, mba tsemo' nzenze nkàb tse bo ke mbagte num nelo' nabte ba' yi là.

¹⁴Là bo ke lo' nkàb ze bo se' yi ndà Tshùaben nà nabte ndet silba yi, mbi, ntu', nta, ke sàm ju gol ke silba lo;

¹⁵bo ke mfà njoṅ i f'a ghafa', ndù bo lo' mfa' yi num ba' Tshùaben.

¹⁶Bo lo ke be bètte ndù ben bo fà nkàb bu bo là tote mba bo lo' nkàb mfa' yi là, nummbe gha tse lo ke mfà nkàb ghafa' ke ṅu'te sàm ju num bwe.

¹⁷Bo lo ke be lo' nkàb jule'te Nsi ze Koṅ bo nkàb jule'te Nsi ze netamte fa yi nse' yi ndà Tshùaben. Yen nkàb là b'a ze ghale'te Nsi.

¹⁸Hazaél mfen Siria ko' nèn ma' Gat ntsho, ndo' i. Hazaél ghù nkwate nekam Yérusalém ntsho.

¹⁹Ndùlala Yoas mfen Yuda, lo' njoṅ tshu nelàn fa, tse Yosafat, Yoram, Akazia tà tse fenfen Yuda na' ndé' Tshùaben ntùm ndà i boa tse tu wul i lé' là, njoṅ gol fa, ntum njoṅ i fa Hazaél mfen Siria. A ke kam Yérusalém ntsho.

²⁰Njoṅ tshé' mfa' Yoas fa, njoṅ tshu fa ts'a ghù là, bo kite ntùm ṅwa'ni Kronika fenfen Yuda.

²¹Tshe' tse ze ntsham i, nkam num i. Bo lab Yoas Bét-Millo, z'a be Silla dù' swe'swe' là.

²²Yozakar nshum Shimeat bo Yozabad nshum Shomer, tshe' tse lab i a kwù. Bo tshoṅ i mbaṅ tà tse, ntùm tusô David. Nshum i Amatsia tô num ze dù'.