Read Medumba 2 Fenfen 13 Bible Online

2 Fenfen 13 - Medumba bible

2 Fenfen 13

¹A lo be kum mbatte ngu'njù ntshob tat ṅam mbàa mba Yoas nshum Akazia be mfen Yuda là, Yoakaz nshum Yéhu tô Israél ngu'njù ntshob sammbàa gham, nke ntswe Samaria.

²A ghù ju z'a ke' bwô là num miag Tshùaben. A ghù be lèn nukebwô tse Yéroboam nshum Nebat na' ngù, mbèn ngù Israél ghù nukebwô là. A ke tsho' ntù i num bwe.

³Yantù Tshùaben kam num Israél, a swèn yub ntùm mbu Hazaél mfen Siria mba mbu Ben-Hadad nshum Hazaél num njoṅ ngelaṅ fa ze tshen fenfen tat li be ntùn nà.

⁴Yoakaz ma' mbu Tshùaben. Tshùaben ju' nz'é, nummb'a lo yen ngùtni ze mfen Siria yab Israél ntùm bwe là.

⁵Ndùlala Tshùaben fà ta' mèn z'a tshu' Israél là. Bon Israél tum ntshu ba Siria, mbèn ntswe ntùm tshob ntàb mb'a be mbwembwe là.

⁶Là bo ke tsho' ntù yub num nukebwô tunndà Yéroboam, z'a na' ngù Israél ghù nukebwô là. Bo tsho bwe nkunku, mbèn nte mba neto Astarté tù Samaria.

⁷Num njoṅ tse ben Yoakaz fa Tshùaben lo faṅ ghako' nyàm yi ntu ṅam ntàn, nkalig gham, neta benntùn ntu ntsha' gham; nummbe mfen Siria lo zwite yube, kà bo tù' b'a mbab mi bo ke nyiaṅte nku là.

⁸Tshé' mfa' Yoakaz, njoṅ tshu fa ts'a ghù là, ntsho ts'a le' là, bo kite ntùm ṅwa'ni Kronika fenfen Israél.

⁹Yoakaz nèn ntèt tà tse, bo tshoṅ i Samaria. Nshum i Yoas tô num ze dù'.

¹⁰A lo be kum mbatte ngu'njù ntshob sammbàa ṅam ntat mba Yoas mfen Yuda be num fen nà, Yoas nshum Yoakaz tô Israél, nke ntswe Samaria. A tô num ngu'njù ntshob ntôg gham.

¹¹A ghù ju z'a ke' bwô là num miag Tshùaben. A ke tsho' ntù i num sàm nukebwô Yéroboam nshum Nebat z'a na' ngù Israél ghù nukebwô là. A tsho bwe nkunku mba yi là.

¹²Tshé' mfa' Yoas, njoṅ tshu fa ts'a ghù là, njoṅ ntsho fa bo ntsho z'a le' Amatsia mfen Yuda yi là, bo kite ntùm ṅwa'ni Kronika fenfen Israél.

¹³Yoas nèn ntèt tà tse. Yéroboam tswe num diaṅkwa se. Bo tshoṅ Yoas Samaria mbaṅ fenfen Israél.

¹⁴Ngokèt z'a tshùb Elisa là na' mb'a z'a nsi zwi i là. Yoas mfen Israél swe' nèn mbaṅ i, nkua' mbw'é ntshob ndù: Tàa, tàa, wù z'o b'a kalig Israél mbèn mbe ze bwoṅ ghako' nyàm nà;

¹⁵Elisa tshob yi ndù: Lo' ngoṅkét boa nkét. A lo' ngoṅkét boa nkét.

¹⁶Elisa bèn ntshob mfen Israél ndù: Lo' bu o nkut ngoṅkét yi. Ndùs'a lo' bu i nkut yi là, Elisa yab mbu mi num mi mfen ntshob ndù:

¹⁷Gha' tôndà s'a shù bag ntumnyam nà. A b'a két se Tshùaben lo' tshu' zin yi là, két s'a nsi tshu' zin yi bu ba Siria là. O nsi tshùa ba Siria ntsho Afék, kà biagte njoṅ yub fa.

¹⁸Elisa bèn ntshob ndù: Lo' nkét. A lo' nkét. Elisa tshob mfen Israél ndù: Lab num tsha'a. Mfen lab num tsha' yoṅ tse tat ntsine.

¹⁹Ndùlala mèn Nsi ya ntù num i ntshob ndù: A lo mbwô ndù o lab yoṅ tse tàn ke yoṅ ntôg lo. A lo mb'a ndùlala mb'o lab ba Siria tà mbiagte yube. Ndonni o nsi lab yub à yoṅ tse tat.

²⁰Elisa kwù, bo tshoṅ i. A be be tamngu', bwoṅ soyé ba Moab tsho ntùm ngô.

²¹A lo be be bo nke ntshoṅ mo' mèn. Ndùlala bo yen mo' bwoṅ soyé là, ntshag fe i ma' ntùm fi Elisa nkù nène. Mèn swe' nkwag mvôg Elisa, mbèn ntù' mènntùn, ndo ntsin tù num nku mi.

²²Hazaél mfen Siria lo ghùtni Israél njoṅ ngelaṅ fa ze Yoakaz be ntùn nà.

²³Là Tshùaben ghù kondèn num bo, ntshàm ndèn mube; a kaṅ se i ndôte yub num nu kàn s'a wat bo Abraham, Isak mba Yakob là. A ke kô nebiagte yube. Tà nse' nkum mba ndonni a ke' tsho' lag num bo.

²⁴Hazaél mfen Siria kwù, nshum i Ben-Hadad tô num ze dù'.

²⁵Yoas nshum Yoakaz bèn nkwé ntusô mi Hazaél lo' ntsho nkwé yi Yoakaz là Ben-Hadad nshum Hazaél. Yoas ton i ntsho yoṅ tat, nkwé ntusô Israél.