Read Medumba 2 Fenfen 14 Bible Online

2 Fenfen 14 - Medumba bible

2 Fenfen 14

¹A lo be kum mbatte ngu'njù bàa mba Yoas nshum Yoakaz be mfen Israél là, Amatsia nshum Yoas be mfen Yuda, ntô.

²A lo be jù fen ndù a ghù ngu'njù ntshob tàn ṅam mbàa, ntô num ngu'njù ntshob bwe'e ṅam mbàa, nke ntswe Yérusalém. Lén màab na' mb'a Yoadan, mbe ngon Yérusalém.

³A ghù nu ndaṅndaṅ num miag Tshùaben. Nda' ndù ke kum njoṅ tàab David. A ghù à ndaṅndaṅ mba tàab Yoas na' ngù là.

⁴Là mbwe' ke mi tse ntùm ngô. Ngô nke nke' nton labinda ntùm ba mbwe'; nke ma' ndu' mbwe'.

⁵Ndùse fen na' ntsho bu i kua' mebwô là, a zwite tshe' tse tse bo na' nzwi tàab, mfen nà.

⁶Là, a ke zwite bon ghazwi benntùn, mb'a be ntùm ṅwa'ni ntshù' Mosé, dù' ze Tshùaben fà sen kàn ni ndù: Bo ke nsi zwi ba tà num nu bon, ke zwi bon num nu ba tà là; nummb'a bwô ndù mba we lo kwù à be num ko' ze nukebwô.

⁷Amatsia zwite benntùn ntsha' gham Edom, ntùm tômbo' ngwa; ndùs'a be tshwèt ntsho l'a lo' Séba, ntswi lén se Yokteél, sen lén nà bèn nke' mba sènni.

⁸Ndùlala Amatsia tum ba ntum Yoas nshum Yoakaz, nshum Yéhu, mfen Israél, bo tshob yi ndù: Se' be yente se se.

⁹Yoas mfen Israél tum bo tshob Amatsia mfen Yuda ndù: Ngô z'a be Liban nà lo tum bo tshob sédra z'a Liban nà ndù: Fà ngon o, nshum àm ghù nzwi i yi. Ndùlala nyàm tshwèt tse bo be Liban nà be tshùa nyiaṅte njô nku.

¹⁰O tshùa ba Edom ntsho ntù' ke nka'te. Tswe la' o ntsiaṅte ntùm nkuni mu. Numk'o nke nkô neto' nu z'a nsi sag o l'à? Yen nu là ghù neton mbu mu mba mi Yuda.

¹¹Là Amatsia ke bam mb'a tshob yi là. Ndùlala Yoas mfen Israél ko' nèn bwe; bo yente se se bo Amatsia mfen Yuda Bét-Shemesh z'a b'a dù' Yuda là.

¹²Israél tshùa Yuda ntsho, mba we lo kù mbèn ntùm ze ntàb.

¹³Yoas mfen Israél lo' Amatsia mfen Yuda Bét-Shemesh. Amatsia b'a nshum Yoas, nshum Akazia. Yoas lo' i nèn yi nkum Yérusalém, nto ta' fa ndù a ghù mbu nkù bàa num kàbngô z'a be Yérusalém nà, neto' num nzendà Efraim nèn nkum nzendà z'a tôg bwe là.

¹⁴A lo' njoṅ gol fa, ndo' njoṅ silba fa boa njoṅ tshu nebom fa ts'a be ntùm ndà Tshùaben, ntùm tshunkàb ndà mfen nà. A bèn ndo' mba benntùn nèn yi Samaria.

¹⁵Tshé' mfa' Yoas, tshu ts'a ghù là, ntsho ts'a le' Amatsia mfen Yuda yi là, bo kite ntùm ṅwa'ni Kronika fenfen Israél.

¹⁶Yoas nèn ntèt tà tse, bo tshoṅ i Samaria mbaṅ fenfen Israél.

¹⁷Yoas nshum Yoakaz, mfen Israél lo kwù, Amatsia nshum Yoas mfen Yuda bèn ntswe ntùm njù ngu'njù ntshob tàn gham.

¹⁸Bo kite tshé' mfa' Amatsia ntùm ṅwa'ni Kronika fenfen Yuda.

¹⁹Bo ze ntsham i Yérusalém, a kù nèn Lakis; là bo bwe i tà nèn nkum Lakis nzwi i bwe.

²⁰Bo ket fe i num ba nyàmdiaṅ nèn ntshoṅ Yérusalém mbaṅ tà tse, ntùm tusô David.

²¹Njoṅ ngô Yuda fa lo' Azaria ngom i fen num dù' tàab Amatsia. A lo be be ndù a ghù ngu'njù ntshob ntôg gham.

²²A b'a Azaria bèn mbèn nkut Elat, mbèn nso mum ngô Yuda. A lo be be ndù mfen à nèn ntèt tà tse.

²³A lo be kum mbatte ngu'njù ntshob tàn gham mba Amatsia nshum Yoas be mfen Yuda là, Yéroboam nshum Yoas mfen Israél nke ntô. A ke ntswe à Samaria. A tô Israél num ngu'njù ntshob ntshù' ṅam nkuà.

²⁴A ghù ju z'a ke' bwô là num miag Tshùaben; a ke tsho' ntù i num sàm nukebwô tse Yéroboam nshum Nebat na' ngù, ngù Israél ghù nukebwô là.

²⁵A bèn ntsiagte ndùnsi Israél, neto' ntshu Hamat tà nkum dibantse z'a tômbo' là. Yen nu là b'a mba Tshùaben, Nsi Israél na' ntshùa num ntshu ngafa' i Yona, ngatshob ntshob Nsi, nshum Amitai ze Gat-Hefer ntshob là.

²⁶Nummbe Tshùaben lo yen lèn nge' kebwô ze Israél be ntùm bwe, là sàm mèn ke be, nkuan ke ménla' lo neywimte Israél ntùm bwe là.

²⁷Là Tshùaben z'a na' mbe ke yoṅ njù' nebiagte lén Israél num nsitsha' là tshùa njam bu Yéroboam nshum Yoas ntshu' i.

²⁸Tshé' mfa' Yéroboam, njoṅ tshu fa ts'a ghù là, ntsho ts'a le'e, bo mb'a ghù Damas bo Hamat ts'a be tsha' Yuda bèn Israél là, bo kite ntùm ṅwa'ni Kronika fenfen Israél.

²⁹Yéroboam nèn ntèt tà tse, fenfen Israél. Nshum i Sakaria tô num ze dù'