Read Medumba 2 Fenfen 15 Bible Online

2 Fenfen 15 - Medumba bible

2 Fenfen 15

¹Yéroboam mfen Israél lo be ghù ngu'njù ntshob sammbàa ṅam mbàa num fen, Azaria nshum Amatsia be mfen Yuda.

²A lo be jù fen ndù a ghù ngu'njù ntshob ntôg gham. A tô num ngu'njù ntshob bàa ṅam ntàn, nke ntswe Yérusalém.

³A ghù nu ndaṅndaṅ num miag Tshùaben, kua' mba tàab Amatsia na' nke ngù là.

⁴Nda' ndù mbwe' ke mi ntùm ngô. Ngô nke nke' nton labinda ntùm ba mbwe', nke ma' ndu' ntùm ba mbwe'.

⁵Tshùaben lab mfen, a tù' ngankin tà nkum ndùs'a kwù là. A nke ntswe ntùm mo' ba' tà njamnjam. Yotam nshum mfen be tu ntùm ndà, nke nsa' kam ntùm ngô.

⁶Tshé' mfa' Azaria, njoṅ tshu fa ts'a ghù là, bo kite ntùm ṅwa'ni Kronika fenfen Yuda.

⁷Azaria nèn ntèt tà tse, bo tshoṅ i mbaṅ tà tse ntùm tusô David. Nshum i Yotam tô num ze dù'.

⁸Azaria mfen Yuda lo be kum ngu'njù ntshob fom ṅam ntat, Sakaria nshum Yéroboam tô Israél, nke ntswe Samaria. A tô num maṅwù ntôge.

⁹A ghù ju z'a ke' bwô là num miag Tshùaben mba tà tse na' ngù là. A ke tsho' ntù i num nukebwô Yéroboam nshum Nebat, z'a na' ngù Israél ghù nukebwô là.

¹⁰Shallum nshum Yabesh ze ntsham i, ndab i mbwe ngô, nzwi i, ntô num ze dù'.

¹¹Tshé' mfa' Sakaria, bo kite ntùm ṅwa'ni Kronika fenfen Israél.

¹²A tshùa ndùlala ntshob mi Tshùaben tshob Yéhu ndù bon tse nsi tô num zwiaṅ benntùn kuà, tswe num diaṅkwa Israél là bumte.

¹³Shallum nshum Yabesh be tô ndù Ozias mfen Yuda ghù ngu'njù ntshob bwe'e ṅam ntat num fen. Shallum tô num ta' maṅwù, nke ntswe Samaria.

¹⁴Menahém nshum Gadi lo Tirtsa nko' ndab Shallum Samaria nzwi i, ntô num ze dù'.

¹⁵Tshé' mfa' Shallum bo ntsham z'a ze là, bo kite ntùm ṅwa'ni Kronika fenfen Israél.

¹⁶Ndùlala Menahém bagte Tifsash boa njoṅ benntùn fa tse bo be bwe là, mbagte ngô neto' fe Tirtsa. A bagte ngô nummbe bo lo ke fà nze a tshùa. A ghù bo to mbam njoṅ bènnzwi jùm fafa.

¹⁷Azaria mfen Yuda lo be ghù num fen ngu'njù ntshob bwe'e ṅam ntat, Menahém nshum Gadi tô Israél. A tô num ngu'njù gham, nke ntswe Samaria.

¹⁸A ghù ju z'a ke' bwô là num miag Tshùaben; njoṅ ngelaṅ fa z'a ke' ntùn nà, a ke tsho' ntù i num nukebwô Yéroboam nshum Nebat ts'a na' ngù, ngù Israél ghù nukebwô là.

¹⁹Pul mfen Asiria se' ntùm ngô, Menahém fà talaṅto silba yi ntsha' mbùm, ndù a ywimt'é, a ghù ze nufen ghum ntùm mbu mi.

²⁰Menahém kwé yen silba l'a num silba njoṅ benntùn fa tse bo ghù tshunkàb ntùm ngô Israél là, kà mfà mfen Asiria. A tam ndô nkàb silba tu mba we lo ṅam ntàn. Mfen Asiria bèn njam ke tsin ntùm ngô mba netsine.

²¹Tshé' mfa' Menahém, tshu ts'a ghù là, bo kite ntùm ṅwa'ni Kronika fenfen Israél.

²²Menahém nèn ntèt tà tse, nshum i Pékashia tô num ze dù'.

²³Azaria mfen Yuda lo be ghù ngu'njù ṅam ntàn num fen Pékashia nshum Menahém be mfen Israél, ntswe Samaria nke ntô. A tô num ngu'njù bàa.

²⁴A ghù ju z'a ke' bwô là num miag Tshùaben. A ke tsho' ntù i num nukebwô Yéroboam nshum Nebat z'a na' ngù Israél ghù nukebwô là.

²⁵Pékash nshum Remalia ze tàndà ntsho ze ntsham i; a lab i Samaria ntùm ntshwèt, mum ndà mfen, ngù be ndùlala num Argob bo Arié; a lo ghù benntùn ntu ṅam ntàn njam i, tse bo tum Galad là. Ndùlal'a zwi Pékashia, ntô num ze dù'.

²⁶Tshé' mfa' Pékashia,, tshu ts'a ghù là, bo kite ntùm ṅwa'ni Kronika fenfen Israél.

²⁷Azaria mfen Yuda lo be ghù ngu'njù ntshob bàa ṅam ntàn num fen, Pékash nshum Remalia tô Israél, nke ntswe Samaria. A tô num ngu'njù ṅam mbàa.

²⁸A ghù ju z'a ke' bwô là num miag Tshùaben. A ke tsho' ntù i num nukebwô Yéroboam nshum Nebat, z'a na' ngù Israél ghù nukebwô là.

²⁹A lo be num ze ngelaṅ Pékash mfen Israél, Tiglat-Piléser mfen Asiria se' ndo' ntsho ndo' Ijon, Abél-Bét-Maaka, Yanoash, Kédesh, Hatsor, Galad bo Galiléa yi; a b'a njoṅ ze ngô Néftali fa, a lo' benntùn mba kuan ntsho là nèn yi Asiria.

³⁰Osé nshum Ela ze ntsham Pékash nshum Remalia, ndab i nzwi, ntô num ze dù', num mbatte ngu'njù ṅam mbàa Yotam, nshum Ozias.

³¹Tshé' mfa' Pékash, njoṅ tshu fa ts'a ghù là, bo kite ntùm ṅwa'ni Kronika fenfen Israél.

³²A lo be mbatte ngu'njù bàa mba Pékash nshum Remalia be mfen Israél là, Yotam nshum Ozias be mfen Yuda, nke ntô.

³³A lo be jù fen ndù a ghù ngu'njù ntshob tàn ṅam mbàa, ntô num ngu'njù ntshob ntôg gham, nke ntswe Yérusalém. Lén màab na' mb'a Yérusha, mbe ngon Tsadok.

³⁴A ghù nu ndaṅndaṅ num miag Tshùaben. A ghù a be ndaṅndaṅ mba tàab Ozias na' ngù là.

³⁵Nda' ndù mbwe' ke bi ntùm ngô. Ngô lo ke nke' nton labinda ntùm ba mbwe'. Yotam bèn nkut mbwe nzendà ndà Tshùaben.

³⁶Tshé' mfa' Yotam, njoṅ tshu fa ts'a ghù là, bo kite ntùm ṅwa'ni Kronika fenfen Yuda.

³⁷A lo be num yen ngelaṅ nà, Tshùaben to' netum Retsin mfen Siria num Yuda bo Pékash nshum Remalia.

³⁸Yotam nèn ntèt tà tse, bo tshoṅ i ntùm tusô David. Nshum Akaz tô num ze dù'.