Read Medumba 2 Fenfen 16 Bible Online

2 Fenfen 16 - Medumba bible

2 Fenfen 16

¹A lo be be mbatte ngu'njù ntshob sammbàa gham mba Pékash nshum Remalia be num fen nà, Akaz nshum Yotam tô Yuda.

²Akaz lo be jù fen ndù a ghù ngu'njù ṅam mbàa, ntô num ngu'njù ntshob ntôg gham, nke ntswe Yérusalém. A ke ghù nu ndaṅndaṅ num miag Tshùaben Nsi i, mba tàab David na' ngù là.

³A zin num nze ze fenfen Israél na' nzin bwe là. A ton mba nshum i ntùm mbwôge, ndo' fi'te num tshùaya'nu tse ngôngô tse Tshùaben na' nta' yub mbwe bon Israél na' nke ngù là.

⁴A fà tshule'te, ma' ndu' mbwe', num nkônga mba tun ntù fi.

⁵Ndùlala Retsin mfen Siria bo Pékash nshum Remalia, mfen Israél ko' nèn kam ntsho Yérusalém. Bo lab Akaz, nda' ndù ke ku'ni netshùa i ntsho.

⁶Be num yen ngelaṅ nà Retsin mfen Siria ghù Elat bèn njam ntùm nesa' ngô Siria. A ta' ba Yuda Siria, ba Siria se' nke ntswe Elat, dù' bo be tà nkum sènni là.

⁷Akaz tum ba ntum Tiglat-Piléser mfen Asiria bo tshob yi ndù: Me b'a ngafa' o, mbe nshum o; ko' nse' ntshu' àm bu mfen Siria mba bu mfen Israél tse bo lo nsi num àm nà.

⁸Akaz lo' silba bo gol z'a be ntùm ndà Tshùaben, mba ntùm tshunkàb ndà mfen nà, ntum nda' yi mfen Asiria.

⁹Mfen Asiria bam mb'a tshob là; a lo nsi num Damas, ndo' i. A lo' ba la' nèn yi ndà kuan Kir, nzwi Retsin.

¹⁰Mfen Akaz nèn Damas mbwe Tiglat-Piléser mfen Asiria. Ndùse mfen Akaz yen tômbwôg s'a be Damas là, a tum netshaṅ sen tômbwôg là bo mba bo lo' nkul i yi là Uria ngale'te Nsi.

¹¹Uria ngale'te Nsi kut ta' tômbwôg ndaṅndaṅ mba se mfen Akaz tsin Damas ntum yi be là. Ngale'te Nsi Akaz fa' sen fa' là kà mfen Akaz mfe Damas.

¹²Ndùse mfen fe Damas là, a tèt tômbwôg ndù bo yà kule, a kù'te nèn mbaṅ bwe, nko' num bwe.

¹³A ghù bo ton ze nyàm jule'te Nsi bwe, mfà ze ju bwôntù, ma' mi ndu' bwe. A miag mba lem tse tshule'te tse nenyàmte num tômbwôge.

¹⁴Mbe se' mba tômbwôge tùn s'a ke mbe mbwe Tshùaben nà, a tsho' i num ze dù' mbwe ndà Tshùaben, netèt tômbwôg nswe bo ndà Tshùaben; a kel i nèn nte nze mfe tu tômbwôg nswe.

¹⁵Yen nà be tôge, mfen Akaz fà ntshù' Uria ngale'te Nsi ndù: O nsi ke ton nyàm jule'te Nsi nkebnjù, ju bwôntù mfetnjù, ton nyàm jule'te Nsi mfen bo ze ju bwôntù num tômbwôg ndùb. Ton tse nyàm jule'te Nsi ngô boa tshob tshu bwôntù be bwe, naṅ mub ndu', naṅ lem tshàm tshule'te tse bo tone, boa tshule'te Nsi tshob be num tômbwôg ndùb. Mbe se' mba tômbwôg tùn nà, me nsi lôte nu bwe.

¹⁶Uria ngale'te Nsi ghù à kua' ndaṅndaṅ mba mfen Akaz na' ntshob yi là.

¹⁷Yen nà lo tôg mfen Akaz be'te ba ntshèt ntse, nket ndet mi a be ntùm bwe là. A ket dibantse tùn z'a be num ba nyàmna' tùne, bo nke nket là, nte num ntom ndoṅ.

¹⁸A bate mba nzendà Sabbat ze bo na' nkut num nzendà mfen ze njam njù ntùm ndà Tshùaben nà. A ghù ndùlal'a num tu mfen Asiria.

¹⁹Tshé' mfa' Akaz, njoṅ tshu fa ts'a ghù là, bo kite ntùm ṅwa'ni Kronika fenfen Yuda.

²⁰Akaz nèn ntèt tà tse. Bo tshoṅ i ntùm tusô David, mbaṅ tà tse. Nshum Ezékia tô num ze dù'.