Read Medumba 2 Fenfen 17 Bible Online

2 Fenfen 17 - Medumba bible

2 Fenfen 17

¹A lo be kum ngu'njù ntshob bàa gham mba Akaz be mfen Yuda là, Osé nshum Ela tô Israél, nke ntswe Yérusalém. A tô num ngu'njù bwe'e.

²A ghù ju z'a ke' bwô là num miag Tshùaben, là ke kote njoṅ fenfen Israél bo be mbw'é là.

³Salmanasar mfen Asiria lo nsi num i. Osé bam nte' yi, nke mfa' yi njoṅ ndù fa.

⁴Là mfen Asiria ghom mo' nkùnkù ju Osé, ndù a ze ntsham i, ntum ba ntum So, mfen Egipto, ndùlala ke bèn nefa' mfen Asiria njoṅ ndù fa mb'a ke mfa' tamngu' là. Ndùlala mfen Asiria ghù bo ghom i ma' ndàtsha, ntaṅ i tshan.

⁵Mfen Asiria zinte ntùm ngô, ndo nsi nko' nèn num Samaria, ndo' i, ntswe bwe num ngu'njù tat.

⁶Osé lo be ghù num fen ngu'njù tat, mfen Asiria lo' Samaria, ndo' ba Israél nèn yi ndà kuan Asiria. A ghù bo tswe Shalash mba mbaṅ Shabor ta'ntse z'a Gozan, mba ntùm ntusô Media là.

⁷Yen nu là be, nummbe bon Israél lo ghù nukebwô Tshùaben Nsi yub, z'a na' nsô yub Egipto, mum mbu Faraon mfen Egipto là. A bèn mb'a nummbe bo lo ke mbwôg tsemo' nsi.

⁸Bo zin à num matnu ngôngô tse Tshùaben na' nta' yub mbwe bon Israél là. Mbèn nzin à ntùm matnu tse fenfen Israél na' nte là.

⁹Bon Israél ghù tshu ts'a ke' bwô là num miag Tshùaben Nsi yub, ngù ntùm tsham. Bo kut ba mbwe' ntùm njoṅ ntusô mub fa, neto' fe num dù' ba' nebéb dù' be là tà nkum mum ngô tse bo kut ndiaṅ mbum nà.

¹⁰Bo lo tete ba neto boa bebun num tu nkônga mi a ṅate là mba tun ntù fi.

¹¹Bo ton labinda ntùm njoṅ mbwe' fa, ndaṅndaṅ mba ngô tse Tshùaben na' nta' yub mbwe bo là; bo bèn ngù tshu ts'a ke' bwô là ndo' nkamte yantù Tshùaben yi.

¹²Bo fa' neto tse Tshùaben na' nga ndù kà bo fa' yi là.

¹³Tshùaben lo tshùa njam ghatshob ntshob Nsi boa ghayente tse mbem Israél bo Yuda ntshob bo ndù: Bin kag manze kebwô tse bin tshùb là, nze nkàn màm boa ntag màm, nke nzin mba ntshù' ze me na' nkite tà tsine, ntum bin ghafa' tshàm ba ghatshob ntshob Nsi be ntshob là.

¹⁴Là bo ke ju' ntshu i, ngù kekot tshob ta mba tà tshob tse bo na' mbe ke bam Tshùaben Nsi yub là.

¹⁵Bo ghua' ntshù' mi, kàn s'a na' ngwat boa tà tshobe, mba mb'a na' mbem yub là; bo tam njam tshu banban, ntù' ben banban; bo tam njam ngôngô tse bo diaṅ yub mbum nà, mbe ndù Tshùaben tshob ndù kà bo fi'te yube.

¹⁶Bo ghua' njoṅ nkàn Tshùaben Nsi yub fa, nabte mfô tùn bàa, nabte bebun Astarté. Bo vù nsi mbwe maṅwù boa nsa, nke mfa' Baal.

¹⁷Bo ton bon tshob tse bandum boa tse bènnzwi mbwôge, mfà wut yub num ngàme, nke ntshaṅ ka; bo swèn tu yub num neghù nukebwô num miag Tshùaben, ndùlala ndù bo kamte yantù i.

¹⁸A ndùlala, Tshùaben ya ntù num Israél neshu, ntshag i ngùanesà num miag mi. Nda' tunndà Yuda bèn ntù' tù' i.

¹⁹Mba kua' Yuda lo ke ze nkàn Tshùaben Nsi i. A lo zin ntùm matnu tse Israél na' nte là.

²⁰Tshùaben ghua' njoṅ nzwit Israél fa, a tam tuswe tu bo, a swèn yub mum mbu ba fimntshu, mbe miagte nta' yub num miag mi ntshag ngùanesà.

²¹Nummbe Israél lo sô wul i num tunndà David, ndo' Yéroboam nshum Nebat ngù mfen yi. Yéroboam sô yub njam Tshùaben, ngù Israél ghù nukebwô ndùb.

²²Bon Israél lo so wut yub num njoṅ nukebwô fa tse Yéroboam ghù là, ke tsho' ntù yub num bwe;

²³tà nkum ndùse Tshùaben ta' yub num miag mi ntshag ngùanesà mb'a na' ntshob num ntshu ghafa' tse ba ghatshob ntshob Nsi là. Bo lo lo' Israél nèn yi ndà kuan Asiria, ngùanesà mbaṅ ze ngô. A ke' à bwe tà nse' nkum sènni.

²⁴Mfen Asiria ghù benntùn fe Babilon, Kuta, Ava, Hamat mba Séfarvaim nse' a tete yub Samaria, num ze dù' bon Israél.

²⁵Bo lo' dù' ke bwôg tshob Tshùaben, ndùlal'a tum ba ngwayit num bo, bo zwite yube.

²⁶Bo tshob mfen Asiria ndù: Ngô ts'o na' ndo' yub nèn ntete ntùm ntusô Samaria là ke' lèn mat mb'a be bo fa' nsi ngô là; ndùlala nsi ngô tum ba ngwayit netèt bo, bo nke nzwite yube, nummbe bo ke' lèn mat mb'a be bo fa' nsi ngô là.

²⁷Mfen Asiria tshob ndù: Bin ghù mo' ngale'te Nsi netèt tse bin se' bo nsen ni ndà kuan nà bèn Israél nte bwe, nke ntswite yub mat mb'a bwô nefa' nsi ngô là.

²⁸Mo' ngale'te Nsi netèt tse bo nèn bo ndà kuan nà bèn njam nte Bétél, nke ntswite yub mb'a bwô neke mbwôg Tshùaben nà.

²⁹Là tshen ngô là, mba zit lo ghù tse nsi ntùm ntusô mi bo ke ntswe bwe là, ntete yub ntùm mba' mbwe' mi ba Samaria na' nkut là.

³⁰Ba Babilon nabte Sukkot-Benot, ba Kut nabte Nergal, ba Hamat nabte Ashima,

³¹tse Ava nabte Nibshaz bo Tartak; tse Séfarvaim nke nton bon tshob mbwôg ndo' ngamte Adrammélék, tse nsi Séfarvaim yi.

³²Bo lo ke mbwôg mba Tshùaben ze, ndùlala bo nabte ghale'te nsi mbwe', ndo' yub à netèt ngô. Tshen ghale'te nsi li lo ke nton labinda ntùm mba' mbwe' num yub tu.

³³Ndùlala bo nke mbwôg Tshùaben, mbèn nke mfa' nsi tshob ndaṅndaṅ mb'a be ntùm matnu ngô tse bo sô yub bwe ntum yi là.

³⁴Bo ke nke' nzin à be num yub mat z'a be là mba sènni. Bo ke' be bwôg Tshùaben, ke be ghù mb'a be ntùm ntshù' mub ke ntag mub lo là, ke be ze ntshù' boa nkàn mi Tshùaben na' nkite bon Yakob z'a tswi lén sob Israél là.

³⁵Tshùaben lo wat kàn boa bo, ntshob men ntshob li bo ndù: Bin ke nsi bwôg tsemo' nsi, ke vù nsi mbwe bo, ke fa' bo, ke fà tshule'te bo.

³⁶Là bin nsi bwôg Tshùaben z'a lo' ngù' nsô zin yi Egipto bu i ze neta là.

³⁷Bin nsi ke ze, ke tshùb men nkàn nà, men ntag là, men ntshù' là boa ntag a na' nkite bin nà, ke bèn nke mbwôg tsemo' nsi.

³⁸Bin ke nsi lag kàn bag bin na' ngwat là, ke bèn nke mbwôg tsemo' nsi.

³⁹Là, a bwô ndù bin bwôg Tshùaben Nsi zin; a nsi tshu' zin num njoṅ ghakeban tsin fa.

⁴⁰Nda' ndù bo ke ju' ntshu, nzin à be mba bo ke nto' nzin nà.

⁴¹Tshen ngô là lo ke mbwôg Tshùaben, nke mfa' ko' tshob neto. Tà nse' nkum sènni bon tshob boa bon bon tshob ke nke' ngù à ju ze tà tshob ke ngù là.