Read Medumba 2 Fenfen 18 Bible Online

2 Fenfen 18 - Medumba bible

2 Fenfen 18

¹A lo be kum ngu'njù tat mba Osé nshum Ela be mfen Israél là, Ezékia nshum Akaz be mfen Yuda, nke ntô.

²A lo be jù fen ndù a ghù ngu'njù ntshob tàn ṅam mbàa: A tô num ngu'njù ntshob bwe'e ṅam mbàa, nke ntswe Yérusalém. Lén màab na' mb'a Abi, mbe ngon Sakaria.

³A ghù nu ndaṅndaṅ num miag Tshùaben, kua' mba tàab David na' ngù là.

⁴A biagte ba mbwe', mbe'te ba neto, mbagte njoṅ bebun fa, njab nyu tùn ze Mosé nabte là mfémfé; nummbe bon Israél lo ke nke' nton labinda mbw'é. Bo ke ntsiaṅ i à ndù Nehushtan.

⁵A yab njoṅ ntù i fa num Tshùaben Nsi Israél. Netèt njoṅ fenfen Yuda fa, ke tse bo be mbw'é ke tse bo tum njam i lo là, sàm ta' i mba ntshù' ke' to' fut'é.

⁶A lo so wul i num Tshùaben, ke tsho' ntù i num i, nke nze nkàn mi Tshùaben na' nkite Mosé là.

⁷Tshùaben be bo Ezékia, njoṅ tshu fa ts'a ke mfa' là nke nzin mebwô. A ta tu mbwe mfen Asiria, nga nebèn mbe nte' yi.

⁸A tshùa ba Filistia ntsho, nton yub ntsho tà nèn nkum Gaza, nsate yub ngô neto' fe dù' mba' nebéb dù' tà nkum num ntusô mi bo kut ndiaṅ mbum nà.

⁹A lo be kum ngu'njù kuà mba mfen Ezékia be num fen, mbe ngu'njù sammbàa mba Osé nshum Ela be mfen Israél là, Salmanasar mfen Asiria kam Samaria ntsho, ndo' Samaria.

¹⁰A lo' i num njù ngu' tat, mbe mbatte ngu'njù fen Ezékia ntôge; a na' mb'a mbatte ngu'njù bwe'e mba Osé be mfen Israél là. Ndùlala bo lo' ntsho nkwé Samaria yi.

¹¹Mfen Asiria lo' ba Israél nèn yi ndà kuan Asiria, ntete yub Shash num nkaṅ Shabor ta'ntse z'a Gozan nà boa ntusô mi a Media là;

¹²nummbe bo lo ke ju' ntshu Tshùaben Nsi yub, mbèn mfàn kàn se, mba ndù bo lo ke ju' nze Mosé ke nze ju ze Mosé ngafa' Tshùaben na' ntshob bo là lo.

¹³A lo be kum ngu'njù ntshob kuà gham mba Ezékia be mfen nà, Senakérib mfen Asiria ko' nkam njoṅ ntusô Yuda fa mi bo nkut ndiaṅ mbum nà, ndo' men ntusô là.

¹⁴Ndùlala Ezékia mfen Yuda tum bo tshob mfen Asiria Lakis ndù: Me lo fàn ta' nu! A bwô ndù o faṅ àm nà. Mba ke lo z'o nsi yab num àm nà mba m'a' fènte. Ndùlala mfen Asiria tam talaṅto silba nkù tat boa talaṅto gol ṅam ntat tu Ezékia mfen Yuda.

¹⁵Ezékia fà njoṅ silba fa z'a be ntùm ndà Tshùaben, ntùm tshunkàb ndà mfen nà fa.

¹⁶A ndùlala, Ezékia bètte gol ze tu wul i batte num nzendà ndà Tshùaben nà, mfà mfen Asiria.

¹⁷Mfen Asiria tsin Lakis ntum Tartan Rab-Saris bo Rabshaké mba mo' ntshu ntsho neta mbaṅ mfen Ezékia Yérusalém. Bo zin nkum Yérusalém. Ndùse bo ko' nkum nà, bo tsin mbaṅ kuntse z'a be mbaṅ diaṅnkat ntse nze mfe tu, num manze nà tsha' neṅab là.

¹⁸Bo tsiaṅ mfen. Eliakim nshum Hilkija, tàndà ndà mfen nèn mbaṅ bo boa Shebna ngakite bo Yoash nshum Asaf, ngatshob ntshob Nsi mfen.

¹⁹Rabshaké tshob bo ndù: Tshù ju ze bin nsi tshob Ezékia li: Mfen ndùb, mfen Asiria tshob ndù: Kua' yen dù' z'o tshwèt njé'te bwe là b'a yà?

²⁰O lo tshob mb'a bwô ndù zete bo neta be ndùse ntsho be nsi là. O yé't'a kua' num we kà nke nta tu me ndù à?

²¹Me lène, o ke njé't'a num Egipto, o ke njé't'a num yen nka'nesoṅ nà z'a be'e, nke nsob mbèn nto bu mba we lo z'a yé'te num i là. Tshù mba Faraon mfen Egipto be mbe num njoṅ benntùn fa tse bo be njé'te num i là.

²²Be mo' ndù o tshob me ndù: Bag ke njé't'a num Tshùaben Nsi yag. A ke b'a yi ze Ezékia na' mbiagte mbwe' tse boa ntômbwôg mi ndùs'a na' ntshob Yuda bo Yérusalém ndù: Bin nsi ke se' à Yérusalém mbwe nda' sen tômbwôg li vù nsi kabkab ké?

²³O kô nefiag nkuan bin tshùaben àm mfen Asiria ké? M'a' fà nyàmdiaṅ ntsha' mbùm, a be z'o ku'ni neyen ghako' là.

²⁴B'o ku'ni netèn mba nda' ta' tàmànjô tse tàmànjô tshùaben àm ké? O tshwèt njé'te num Egipto, mb'a nsi fà nkalig boa ghako' nyàmdiaṅ wù là!

²⁵Mba nebe, me ke' be ntshu ntshù' bag Tshùaben kà nko' nse' sate yen dù' li, sen tusô li ké? Tshùaben lo tshob me ndù: Ko' nèn num yen ngô là, nsat'é.

²⁶Eliakim nshum Hilkija, Shebna bo Yoash tshob Rabshaké ndù: Lo' ntshob Aram ntshob nu yi ghafa' tsho, nummbe bag be nju' i. Kà tshob bag ntshob Yuda, num ntoṅ ngô z'a be tù kàb là.

²⁷Rabshaké bùnte bo ndù: Tàfa' àm na' ntum àm ndù me se' ntshob men ntshob li tàfa' o mba wù ké? A ke na' ntum àm me tshob à tshen ben ni bo be tù kàb, nke njù mbèt mub mbèn nke nu netsin mub là ké?

²⁸Ndùlala Rabshaké kù' nèn mbwe nke nkua' neta ntshob ntshob Yuda ndù: Bin ju' ntshob mfen ndùb, mfen Asiria!

²⁹Tshù ju ze mfen tshob li: Be Ezékia ke tshu' zin mum mbu màm, k'a mi nefùte zine.

³⁰Kà Ezékia neghù bin mi nke njab ntù num Tshùaben, nke ntshob ndù: Tshùaben nsi tshu' yage, sen tusô li ke nsi vù ntùm mbu mfen Asiria.

³¹Kà bin ju' ju ze Ezékia tshob là; tshù ju ze mfen Asiria tshob li: Bag bin so mbu, bin bèn me, mba we lo jù ju z'a tum num se tù ndu' bo se tù mbatsi là, mba we lo nu ntse mi a tum ntùm se tôntse là;

³²tà nkum ndùse me se' lo' zin nèn yi ntùm ngô z'a fute zine, ntùm ngô ngefet bo ndu', ngô bàn bo ntù ndu', ngô nten mfèt bo ṅwa'a, dù' ze bin nsi yôge, ke kwù là. Kà bin ju' ju ze Ezékia tshob là, nummb'a ghù nefùte zin ntshob ndù: Tshùaben nsi tshu' be.

³³Tse nsi ngôngô lo tshu' ngô mum mbu mfen Asiria ké?

³⁴Tse nsi Hamat bo Arpad yà? Tse nsi Séfarvaim, Héna bo Iva yà? Bo lo tshu' Samaria mum mbu màm ké?

³⁵Netèt njoṅ tse nsi tshen ngô là, a tsit bèn ntshu' yub ngô mum mbu màm kà Tshùaben nku'ni netshu' Yérusalém mum mbu màm à?

³⁶Là ngô tswe ntshu mi'i, ke bùnte sàm nu yi; nummbe mfen lo tshob ndù kà bo bùnte sàm nu.

³⁷Eliakim nshum Hilkija tàndà ndà mfen, Shebna ngakite bo Yoash nshum Asaf ngatshob ntshob Nsi mfen nèn mbaṅ Ezékia, ndù bo fagte nzwe tshobe, nsoṅ i ntshob nu fa ze Rabshaké na' ntshob là.