Read Medumba 2 Fenfen 19 Bible Online

2 Fenfen 19 - Medumba bible

2 Fenfen 19

¹Ndùse mfen Ezékia ju' men ntshob là là, a fagte nzwe tse, ma' nke'bàm num i nèn ntùm ndà Tshùaben.

²A tum Eliakim tàndà ndà mfen, Shebna ngakite boa ywèn benntùn netèt ghale'te Nsi mbaṅ Esaya ngatshob ntshob Nsi, nshum Amots. Bo be nèn ndù bo ma' nke'bàm num bo.

³Bo tshob yi ndù: Tshù ju ze Ezékia tshob li: Sen lé'njù li b'a se nge', se nenaṅ ntsha bo se tuswe. Nummbe ngelaṅ nebwe bon ku'u, nda' ndù ngù' nebwe yub yi ke be.

⁴Mo' ndù Tshùaben Nsi o ju' ntshob mi mfen Asiria tum Rabshaké ngafa' i ndù a se' ntute Nsi z'a be ntùn yi là; be mo' ndù Tshùaben Nsi o naṅ ntsha num nu men ntshob là mi a ju' là. Ndùlal'a bwô ndù o le'te Nsi num metshé' i z'a ke' là.

⁵Tshe' (ghafa') Ezékia nèn mbaṅ Esaya.

⁶Esaya tshob bo ndù: Tshù ju ze bin tshob tàfa' zin ni: Tshù mba Tshùaben tshob li: Kà bwôg num ntshob mi o ju'u, mi ghafa' mfen Asiria tshùa njam bwe nke ntut'àm nà.

⁷M'a' ghù tu i tshu' num tshô z'a nsi fe ntùm ngô i là; a nsi ju' yen tshô là bèn njam ntùm ngô i nefa'te, tsho bwe kwù num ntshùag ṅwi.

⁸Ndùse Rabshaké bèn mbaṅ mfen Asiria là, a tèl i a nke ma' Libna ntsho. Nummb'a lo ju' ndù mfen lo Lakis.

⁹Ndùlala tshô se' mfen Asiria num nu Tiraka mfen Etiopia, bo tshob yi ndù: Tshù i là z'a lo nsi nke ma' o ntsho là. Mfen Asiria bèn ntum ba ntum Ezékia ntshob ndù:

¹⁰Bin tshob Ezékia mfen Yuda ndù kà Nsi i z'a be njab ntù num i là fùt'é ntshob ndù Yérusalém ke nsi be ntùm mbu màm, me mfen Asiria.

¹¹O ju' ju ze fenfen Asiria ghù njoṅ ngôngô fa là, nju' mat ze bo sate yub yi là; o kwate mb'o nsi bèn tum bwe ké?

¹²Tse nsi ngô tse tà tshàm na' nsate là lo tshu' yub ké? Gozan, Karan, Retsef boa bon Edèn tse bo be Télasar là.

¹³Mfen Hamat, mfen Arpad bo mfen tusô Séfarvaim, Héna bo Iva b'a yà?

¹⁴Ezékia kwé ṅwa'ni bu ba ntum nsiaṅe. A lo' nko' nèn yi ntùm ndà Tshùaben, nga'te mbwe Tshùaben,

¹⁵nde't'é ntshob yi ndù: Tshùaben Nsi Israél, wù z'o tswe num ba kérubim nà! A b'a wù bèn mbe Nsi njoṅ nufen fa ts'a num nsitsha' l'a. A b'a wù bèn nabte kamànyam bo tsha'a.

¹⁶Tshùaben, ben toṅ o nsi nju'u. Tshùaben, gha' miag mu njene. Ju' ntshob mi Senakérib tshob là, a bèn ntum Rabshaké ndù a se' ntute Nsi z'a be ntùn nà.

¹⁷Tshùaben, a b'a nenùn ndù fenfen Asiria sate ngôngô, mbagte ngô yube,

¹⁸ma' nsi tshob ntùm mbwôge; là bo na' ke b'a ba nsi, a na' mb'a mbufa' mènntùn, mb'a tù bo loṅ; tshù tshu tse bo na' mbiagte là.

¹⁹Tshùaben Nsi yag, tshu' yag mum mbu Senakérib ndonni, njoṅ nufen fa num nsitsha' lèn ndù o bèn mbe nkwi Nsi ntshù', mb'a wù Tshùaben.

²⁰Ndùlala Esaya nshum Amots tum bo tshob Ezékia ndù: Tshù ju ze Tshùaben Nsi Israél tshob li: Me ju' le'te z'o le't'àm yi num nu Senakérib mfen Asiria là.

²¹Tshù ntshob mi Tshùaben tshob num i li: Asiria tshwèt ngwag o, nke ntshabt'o. Wù Ménngon ze bo ke' tabt'o là, wù ngon Sion. Ngon Yérusalém, a be me tôg mbaṅ o nke nko' ngem nkembe' mi.

²²A wù z'o na' ntut'é à? O tshag nz'o tù à num we? O lo bù' miag mu tù, num ze Mèn Nelàn Israél!

²³O lo tshùa njam ntum ts'o tum nà, ntute Tshùaben ntshob ndù: Me nsi lo' bwoṅ nkalig mi me ghù là ko' num ntshùa mbale, num ntshùa Liban; me nsi ke' sédra mi, mi a sag neshu là ke' ntshalon mi, mi a bwô neshu là, zin tà kum num miagte ntshùa i, fèn se s'a fute nten z'a tshwèt nte' là.

²⁴Me lo nu ntse tum mi me na' ntswe' là, ndo' nku màm nyiaṅte nta'ntse mi a Egipto là yi.

²⁵O lo ke ju' mbe me na' nabte tshen tshu l'a tà ndùke lo, ntsiagte tshen tshu l'a tà ngelaṅ mbwe ké? Ndonni me bam ndù tshen nu là bumte, mbam ndù o ghù ngô bo kut ndiaṅ mbum nà tù' fam.

²⁶Ba la' tshen ngô là b'a ben nebole, ndù nu ghù yube, tuswe ghom yube. Bo b'a mba nenà tshwèt là, mba ntemntem nenà fi là; bo b'a mba nenà mi a bitte num ntuba' là, mb'a mba ngefet z'a be jum ndù kô i ke' yoṅ mfi' là.

²⁷Me lèn ngelaṅ z'o be ntswe nsi là ndèn ngelaṅ z'o be ntum nà, ndèn ngelaṅ z'o be mbèn njam nà; me lèn tshùagntù z'o ghù num àm nà.

²⁸Mb'o ghù tshùagntù num àm, nka'te mbwe àm, kà tsho ka'te ko' ntam toṅ àm nà, me nsi ma' kwa sàm ntselag o, ma' tùn sàm num nkub ntshu mu, ghù o bèn nzin num manze z'o zin bwe nse' là mbèn njam.

²⁹A bwô ndù yen nu li be keki wù: Bo nsi jù tshu ts'a bit num nà be ze tu là yen ngu'njù li, be ngumo' jù tshu ts'a vù mum nà mbit là. Là, a nsi be mbatte ngu'njù tat bin ywit kà mbèn ntsho'o. Bin nsi bwe nkùa ze bin nsi nu ndu' mi là.

³⁰Tshé' ben tse bo nsi tù' ntùm tunndà Yuda là nsi taṅ nga nswe nsi, bèn yàm ntàm mub tù.

³¹Nummbe tshé' i nsi tum Yérusalém, ben bo tum ntshu vùkob là tum num mbat Sion. Tshù ju ze nkôni Tshùaben tàndà ntsho nsi ghù là.

³²A ndùlala Tshùaben tshob num mfen Asiria ndù: A ke nsi tsho ntùm sen tusô li, a ke nsi ma' kô ntùm bwe. A ke nsi shù tshètntsho yi, ke tswe' sàm nsàm bwe.

³³A nsi be fe tshùa num manze z'a tshùa bwe kà nse' là, ke be ndù a tsho tusô. Tshùaben bèn ntshobe.

³⁴Me nsi tshètte sen tusô là num netshu' i, ngù ndùlal'a num yàm tu mba num ngafa' àm David.

³⁵Tshù, be num yen tèttswe' là, Angél Tshùaben ṅwag ntùm mbàn ba Asiria nzwite benntùn bwe ntsha' ntshob tàn ṅam fome. Njù be làn nda' fe ben tù' bèn ndo' dù'.

³⁶Senakérib mfen Asiria tsho' mbàn bwe; a tam nze mbèn ntùm ngô i, ntswe Ninive.

³⁷A be num mo' lé'njù a vù nsi kabkab ntùm ndà nsi i Nisrok, nshumnshum tse Adrammélék bo Sharetser wal i ṅwi, nkù nèn ngô Ararat. Nshum i Esar Haddon tô num ze dù'.