Read Medumba 2 Fenfen 2 Bible Online

2 Fenfen 2 - Medumba bible

2 Fenfen 2

¹Tshùaben lo be ket Elia ntùm Zim nèn yi mfe kamànyam ndù bo Elisa ke nèn Guilgal.

²Elia tshob Elisa ndù: Me le't'o ndù o tswe nsen ni, nummbe Tshùaben tum àm Bétél. Là Elisa tshob ndù: Me lo' lén Tshùaben bo lén so nkàn mfe yi ndù me ke nsi kag ku o. Ndùlala bo swe' nèn nze Bétél.

³Bon ba ghatshob ntshob Nsi tse bo be Bétél là se' mbaṅ Elia ntshob yi ndù: O lèn ndù Tshùaben nsi ket tàfa' o sènni nèn yi mfe tù num tu o à? A bùnte ndù: Bin mi ntswe, mba me lène.

⁴Elia tshob yi ndù: Elisa, me le't'o ndù o tswe nsen ni, nummbe Tshùaben tum àm Yériko. Là Elisa tshob ndù: Me lo' lén Tshùaben bo lén so nkàn mfe yi ndù me ke nsi kag ku o. Ndùlala bo zin nkum Yériko.

⁵Bon ghatshob ntshob Nsi tse bo be Yériko là se' mbaṅ Elisa ntshob yi ndù: O lèn ndù Tshùaben nsi ket tàfa' o sènni nèn yi mfe tù num tu o à? A bùnte ndù: Bin mi ntswe, mba me lène.

⁶Elia tshob yi ndù: Me le't'o ndù o tswe nsen ni, nummbe Tshùaben tum àm Yordan. Là Elisa tshob ndù: Me lo' lén Tshùaben bo lén so nkàn mfe yi ndù me ke nsi kag ku o. Bo nèn ntu tshob bàa fa.

⁷Benntùn ṅam ntàn netèt bon ba ghatshob ntshob Nsi nèn ntsinte mbwe bo, num nguan mo' mèn njoṅ nze. Tu wut tshob tsin mbaṅ Yordan.

⁸Ndùlala Elia lo' kummbaṅ se mbote, ndab ntse yi, ntse ghabte wul i nèn bag bag, bo dut bwe nku ndù dù' jumte.

⁹Ndùse bo dut là, Elia tshob Elisa ndù: Bètte ju z'o kô ndù me ghù wù, kà bo lo' àm mbaṅ o, bag wù fagte là. Elisa bùnte ndù: Me le't'o ndù lèn Ywèt ts'o ghù là be num àm yoṅ tse bàa.

¹⁰Elia tshob ndù: Ju z'o bètte là ta neshu. L'a be z'o yen àm ndùse Ywèt nsi lo' àm nèn yi là, mba yen nu là nsi bumte num o ndùlala, ntag ndùlala mb'a ke nsi bumte.

¹¹Mba bo be num manze nke ntshobte bo bo là, mo' kalig mbwôg boa nyàmdiaṅ fagte Elia bo Elisa, Elia ko' ntùm zim nèn mfe kamànyam.

¹²Elisa nke ndôte nke nkua' ntshob ndù: Tà! Tà! Kalig Israél boa nyàmdiaṅ tse! A ke bèn neyen i. Ndùlal'a ghom nzwe tse mfag bag tse bàa;

¹³a lo' kummbaṅ s'a tum num Elia ngwù nsi là, ndo mbèn njam, ntsin mbaṅ Yordan.

¹⁴A lo' kummbaṅ s'a tum num Elia ngwù nsi là ndab ntse yi mbètte ndù: Tshùaben Nsi, Elia b'a yà? Mba yi ze lab ntse, ntse ghabte wul i bag bag, Elisa dut bwe.

¹⁵Bon ba ghatshob ntshob Nsi tse bo be Yériko là lo yen i se se ntshob bo bo ndù: Ywèt Elia tswe num Elisa. Ndùlala bo nèn mbumte boa Elisa ngwù nsi mbwe i,

¹⁶ntshob yi ndù: Tshù neta bon bandum ni netèt ghafa' tsho ntu ṅam ntàn. O kô ndù bo nèn ndiag tàfa' o ké? Mo' ndù Ywèt Tshùaben kel i nèn ma' num mo' mbat ke ntùm mo' tômbo' lo. Elisa bùnte ndù: Kà bin tum yube.

¹⁷Là bo nànt'é neshu, a tshob ndù: Bin tum yube. Bo tum tshen benntùn ṅam ntàn nà, bo diag Elia num lé'njù tat ke fon i.

¹⁸Ndùse bo bèn njam mbaṅ Elisa mà Yériko là, a tshob bo ndù: Me lo ke tshob bin ndù kà bin nèn ké?

¹⁹Ba ntùm ngô tshob Elisa ndù: Yen mbe netswe mum ngô bwô mba tshùaben tshwèt njen nà; nda' ndù ntse ke' bwô, ngô bèn njume.

²⁰Elisa tshob ndù: Bin lo' ta' ka nswe' nse' yi, naṅ ngwa ntùm bwe. Bo lo' ka nse' mfà yi.

²¹Elisa nèn tôntse naṅ ngwa bwe ntshob ndù: Tshù ju ze Tshùaben tshob li: Me lànte men ntse li. Vùkob ke nsi bèn tum bwe, nebe kebwe ke bèn ntum bwe.

²²Ntse làn tà nse' nkum sènni, ndaṅndaṅ mba Elisa na' ntshob là.

²³Elisa ko' nèn Bétél. Ndùs'a be num manze nke nko' là, bontsit bon bandum tum ntùm ngô ntshag i. Bo nke ntshob yi ndù: Nkomtu ko'o! Nkomtu, ko'o!

²⁴A kaṅ wul i ndôte yub ndo' lén Tshùaben nso ndon yi tu bo. Ndùlala nzwimàntô bàa tum ntùm fèn mfagte ben ntshob bàa ṅam nkuà netèt bon nà.

²⁵A lo bwe nèn num mbat Karmél, dù' z'a lo bwe mbèn njam Samaria là.