Read Medumba 2 Fenfen 20 Bible Online

2 Fenfen 20 - Medumba bible

2 Fenfen 20

¹Num yen ngelaṅ nà, Ezékia tam ngokèl à vùvù. Ngatshob ntshob Nsi Esaya nshum Amots se' mbaṅ i ntshob yi ndù: Tshùaben tshob mb'o tag vù yu tunndà, nummb'o ke lo, o nsi kwù.

²Ezékia kaṅ se i ntshù njam, mfà yen le'te li Tshùaben ntshob ndù:

³Wù Tshùaben, kwimte ndù me lo zin num miag mu ntùm neju' ntshu, ntùm nefà wut nsi ntùm ntù. Bèn nkwimte ndù me lo ghù numebwô num miag mu! Ezékia fètte ntsenyà kua' yàme.

⁴Tshùaben tshob Esaya ndùs'a ke' netèt ntshundà ntùm bwe ke yoṅ ntum nà ndù:

⁵Bèn njam mbaṅ Ezékia mfen yàm nzwit mèn ntshob yi ndù me Tshùaben Nsi tàab David ju' le'te z'a le't'àm yi là, mbèn njen ntsenyà mi a fètte là. Ndùlala me nsi yat'é, a be kum lé'njù tat a ko' nèn ndà Tshùaben.

⁶Me nsi kwi'te lé'njù tse num ngu'njù ntshob tàn gham. Me nsi tshu' i bo sen tusô li mum mbu mfen Asiria. Me nsi tshu' sen tusô li num yàm tu, mba num lén ngafa' àm David.

⁷Esaya tshob ndù: Bin lo' ta' tu' makela' bo lo' mbatsi nabte yi là, bo lo', a tshob bo yab num mfaṅ mfen, mfen yate.

⁸Ezékia tshob Esaya ndù: A sit keki bèn la'te me ndù Tshùaben nsi yat'àm, a be kum lé'njù tat me ko' nèn ntùm ndà i à?

⁹Esaya bùnte yi ndù: Tshù keki se Tshùaben nsi la'te wù, o lèn ndù a nsi zwiagte nka'ni mi li: O kô ndù netshaṅ lagnyam ben mbwe nguan ta' kam mfi' ké' k'o kô ndù a ben njam nguan ta' mfi' à?

¹⁰Ezékia bùnte ndù: A kag mb'a b'a ben mbwe num nguan ta' kam mfi' là; a ywimte ndù a ben à njam nguan ta' kam mfi'.

¹¹Ndùlala Esaya ngatshob ntshob Nsi tsiaṅ Tshùaben, a ghù netshaṅ lagnyam ben njam ta' kam mfi' num nkam mfi' Akaz gham, dù' z'a na' nswe' bwe là.

¹²A lo be yen ngelaṅ nà Berodak-Baladan, mfen Babilon tum ta' ṅwa'ni bo ta' nda' Ezékia, nummb'a lo ju' mbe Ezékia tshwèt ngone.

¹³Ezékia tsiaṅte num ze nese' tshen ntum ni, ngù bo yen tse tshunkàb ts'a ntshwèl i là: Silba, gol, mfèt nelamte boa mi tanjoṅ mba dù' tse tshuntshùag, boa bon tshu ts'a be ntùm ze nta là. Sàm ju ke be ntùm ntshwèl i bo ntùm dù' z'a ghù là, ze Ezékia be ke la'te bo là.

¹⁴Ngatshob ntshob Nsi Esaya se' njen mfen mbètt'é ndù: Tshen ben nà tshob ndùke? Bo fe à yà kà nse' lôt'o à? Bo fe à ntùm ngô z'a sag là ké? Ezékia bùnte ndù: Bo fe à ntùm ngô z'a sag là, Babilon.

¹⁵Esaya bèn ntshob ndù: Ke ze bo yen ntùm ntshwèl o à? Ezékia bùnte ndù: Bo yen njoṅ tshu fa ts'a ntùm ntshwèl àm nà. Sàm ju ke ntùm yàm nta ze me ke' la'te bo là.

¹⁶Ndùlala Esaya tshob mfen ndù: Ju' ntshob mi Tshùaben tshob wù là.

¹⁷Tsemo' lé'njù bwe nse'e, tse njoṅ tshu fa tse tà tsho tse'te tà nse' nkum sènni nsi nèn Babilon nà. Sàm ju ke nsi tù'ù. Tshùaben bèn ntshobe.

¹⁸Bo nsi lo' mba ko' nshumnshum tsho tse yàm lo' ghù njabmfenkun yi ntùm ntshwèt mfen Babilon.

¹⁹Ezékia bùnte Esaya ndù: Ntshob Tshùaben mi o tshob là b'a mi ntùn. A bèn ntshob ndù: Be fite bo la' be tshaṅ be num ngelaṅ ze me ke' ntùn nà.

²⁰Tshé' mfa' Ezékia, ntsho ts'a le' là, me' bo kuntse z'a tswe' ntùm tusô là, bo kite ntùm ṅwa'ni Kronika fenfen Yuda.

²¹Ezékia nèn ntèt tà tse. Nshum i Manasé tô num ze dù'.