Read Medumba 2 Fenfen 21 Bible Online

2 Fenfen 21 - Medumba bible

2 Fenfen 21

¹Manasé lo be jù fen ndù a ghù ngu'njù ntshob bàa gham. A tô num ngu'njù ntshob tàn ṅam ntàn, nke ntswe Yérusalém. Lén màab na' mb'a Heftsiba.

²A ghù ju z'a ke' bwô là num miag Tshùaben, mfi'te tshùaya'nu ngôngô tse Tshùaben na' nta' yub mbwe bon Israél là.

³A bèn nabte mbwe' tse tàab Ezékia na' nsate là. A bom ntômbwôg Baal, nkom ta' neto Astarté ndaṅndaṅ mba Akab mfen Israél là, a vù nsi mbwe ntshu ntsho z'a mfe kamànyam nà, nke mfa' yi.

⁴A bom ntômbwôg ntùm ndà Tshùaben, yen ndà Tshùaben nà ze Tshùaben na' ntshob nu num bwe ndù: Me nsi te lén sàm à mà Yérusalém nà.

⁵A bom ntômbwôg ntshu ntsho mfe kamànyam ntùm bam ntshundà ndà Tshùaben bàa,

⁶nton kua' ko' ze nshum mbwôge. A fà wul i num nu ghalèn nsa, num nu ngàme, a te nu ghasab nsôgmbu, ghatshaṅ ka. A ghù tshu ts'a ke' bwô Tshùaben nà kua' mà yàm yàme, ndo' nkamte yantù i yi.

⁷A lo' neto Astarté z'a na' nkom nà nte ntùm ndà Tshùaben, ndà ze Tshùaben na' ntshob David bo nshum i Salomon ndù: Me nsi te lén sàm matmat là ntùm yen ndà li, ntùm sen tusô Yérusalém ni se me tsho' netèt njoṅ tunndà Israél fa là.

⁸Me ke nsi bèn ghù bon Israél ke ntsha nèn njam ntshundà. Bo nsi ghô ntùm ngô ze me na' mfà tà tshob là, a be ze bo tshùb ntag màm bo ntshù' ze me na' ngù ngafa' àm Mosé kite bo là.

⁹Là bo ke ke ju' ntshu. Manasé tènte yub bo ghù nukebwô ntshùa mba ngôngô tse Tshùaben na' mbiagte yub mbwe bon Israél là.

¹⁰Ndùlala Tshùaben tshùa num ntshu ghafa' tse ba ghatshob ntshob Nsi ntshob ndù:

¹¹Mba Manasé mfen Yuda ghù tshen tshùaya'nu li; mb'a fàn lèn nu tse ba Amor na' mfàne, mb'a ghù Yuda ghù nukebwô njam neghamte ba neto là,

¹²me Tshùaben Nsi Israél tshob ndù m'a' ghù nge' kebwô tsho Yérusalém mba Yuda. Mba we lo z'a nsi ju' tshô yen nge' là là, tu i tshu'u, ntoṅ mi tam njame.

¹³Me nsi lo' nkù Samaria tshùa yi Yérusalém, lo' mfi' tunndà Akab tshùa yi bwe. Me nsi sôg Yérusalém mba bo be nsôg ka nkaṅt'é là.

¹⁴Me nsi ghua' tshé' ntsi' màm, me nsi swèn yub ntùm mbu ghakeban tshobe; bo nsi tù' ntsha' ntsho mum mbu ghakeban tshobe, mbe bo mba nyàm tse bo ghom nà.

¹⁵Ndùlala nummbe bo ghù ju z'a ke' bwô là num miag màm fe mum lé'njù se tà tshob na' ntum mà Egipto là.

¹⁶Manasé fètte mba lem mbu' kua' yàm neshu, ndo' ndam Yérusalém yi neto' mo' taṅ nèn nkum num mo'o, nkwi'te nukebwô ts'a na' ngù mbèn ngù Yuda ghù, ndo' ngù nukebwô yi num miag Tshùaben nà.

¹⁷Tshé' mfa' Manasé, njoṅ tshu fa ts'a ghù là, nukebwô ts'a so wul i num bwe là, bo kite ntùm ṅwa'ni Kronika fenfen Yuda.

¹⁸Manasé nèn ntèt tà tse, bo tshoṅ i ntùm nka' z'a be mbaṅ ba' i là, ntùm nka' Uzza. Nshum i Ammon tô num ze dù'.

¹⁹Ammon lo be jù fen ndù a ghù ngu'njù ntshob bàa ṅam mbàa. A tô num ngu'njù bàa, nke ntswe Yérusalém. Lén màab na' mb'a Meshulémet, mbe ngon Haruts ze Yotba.

²⁰A ghù ju z'a ke' bwô là num miag Tshùaben, ndaṅndaṅ mba tàab Manasé là.

²¹A zin be kua' num manze ze tàab zin bwe là, mfa' neto tse tàab fa' bo là, nke ngwù nsi mbwe bo;

²²a ghua' Tshùaben Nsi tà tse, ke zin num ze manze Tshùaben.

²³Tshe' Ammon ze ntsham i, nzwi mfen ntùm ndà i.

²⁴Là ngô ya ntù nzwite njoṅ benntùn fa tse bo ze ntsham mfen Ammon nà; ngô te Yosias num fen num ze dù'. A na' mb'a nshum mfen Ammon.

²⁵Tshé' mfa' Ammon bo ju z'a ghù là, bo kite ntùm ṅwa'ni Kronika fenfen Yuda.

²⁶Bo tshoṅ i ntùm fi se, ntùm nka' Uzza. Nshum i Yosias tô num ze dù'.