Read Medumba 2 Fenfen 22 Bible Online

2 Fenfen 22 - Medumba bible

2 Fenfen 22

¹Yosias lo be jù fen ndù a ghù ngu'njù fome. A tô num ngu'njù ntshob ntshù' ṅam ntat. Lén màab na' mb'a Yedida, mbe ngon Adaja ze Botskat.

²A ghù nu ndaṅndaṅ num miag Tshùaben, nzin num njoṅ ze manze tàab David fa; a ke kaṅ wul i, nenèn bu zwim ke bu kwéb lo.

³Mfen Yosias tum Shafan ngakite, nshum Atsalia, nshum Meshullam ntùm ndà Tshùaben ndùs'a ghù ngu'njù ntshob fom gham num fen nà, ntshob yi ndù:

⁴Ko' nèn mbaṅ ngale'te Nsi ze ndùb Hilkija ntshob yi ndù a kùmte nkàb ze ngô se' yi ntùm ndà Tshùaben, ben bo be nkwé ntshub mum mbu mub là.

⁵Bo fà yen nkàb là ben bo tshwèt nabte ndà Tshùaben nà bo lo' mbé ghafa' yi:

⁶Ghalo' tuba', ghama' tun ba' boa ghabom ba', mba nelo' njun ntù boa ndoṅ netshua'te mi bo nsi lo' nabte ba' yi là.

⁷Mba bo b'a ben nenùn nà, a ke' ywimte ndù bin bètte ndù bo soṅ zin mba nkàb tsho yi là.

⁸Ndùlala *gi*Hilkija ngale'te Nsi ze ndùb tshob ngakite Shafan ndù: Me fon ṅwa'ni Ntshù' ntùm ndà Tshùaben. Hilkija fà ṅwa'ni Ntshù' Shafan, a siaṅ.

⁹Ngakite Shafan nèn nsoṅ mfen yen nu là ntshob ndù: Tshe' tsho kùmte nkàb z'a ndà là mfà ben tse bo fà fa' nenabte ba' Tshùaben bo là.

¹⁰Shafan ngakite bèn ntshob mfen ndù: Hilkija ngale'te Nsi fà mo' ṅwa'ni me. A tshob ndùlala nsiaṅ yen ṅwa'ni Ntshù' là mfen.

¹¹Ngelaṅ ze mfen Yosias na' nju' ntshob yen ṅwa'ni kàn nà là, tu i tshu', a fagte nzwe tse.

¹²Mfen tshob Hilkija ngale'te Nsi, ntshob Ashikam nshum Shafan, Akbor nshum Mika, Shafan ngakite bo Esaya ngafa' mfen ndù:

¹³Bin nèn mbètte Tshùaben nu num yàm tu mba ze ngô, num tu njoṅ Yuda fa num nu ntshob yen ṅwa'ni li ze bo fon nà; nummbe yantù Tshùaben b'a ze ndùb, yantù i kamte num be, nummbe tà be lo ke ju' ntshob mi a be ntùm yen ṅwa'ni li là, ke bèn nze njoṅ tshu fa tse bo kite ntùm bwe là.

¹⁴Ngale'te Nsi Hilkija, Ashikam, Akbor, Shafan bo Esaya nèn mbaṅ ngatshob ntshob Nsi ze mènnzwi Hulda, nzwi Shallum nshum Tikva, nshum Harhas ngalé' nzwe. Ngatshob ntshob Nsi ze mènnzwi là ke ntswe à Yérusalém, ntùm mo' taṅla' tusô. Ndùse bo tshob yi là,

¹⁵a bùnte bo ndù: Tshù ju ze Tshùaben Nsi Israél tshob li: Bin nèn ntshob mèn z'a tum zin mbaṅ àm nà

¹⁶ndù Tshùaben tshob ndù a nsi lo' nge' se' yi num yen dù' li mba num ba la' tse ndaṅndaṅ mb'a be ntùm ṅwa'ni ze mfen Yuda lo nesiaṅ nà.

¹⁷Nummbe bo ghua' àm, mfà labinda tsemo' nsi, ndo' nkamte yantù àm yi. Bo tshùa njam mfa' mbu mub nkamte yantù àm, mbe ndù a ke nsi fite num yen dù' li.

¹⁸Mbe se' mba mfen Yuda z'a tum zin bin se' mbètte Tshùaben nu là, bin nsi tshob yi ndù: Tshù ju ze Tshùaben tshob num ntshob mi o ju' li:

¹⁹Mba yen nu là kwag ntù o, o fà wul o nsi mbwe Tshùaben, nju' ju me tshob num yen dù' li boa ba la' tse, naṅ ntsha tu bo, nso ndon nelo' nyi'te yub yi là, me Tshùaben ju'. Nummb'o fagte nzwe tsho, nkua' num miag màm.

²⁰A ndùlala, me nsi lo' o mbaṅ tà tsho ntùm fite, bo tshoṅ o ntùm fi so. Miag mu ke nsi yen njoṅ nge' fa tse me nsi se' yi num yen dù' li là. Bo bèn njam mfà mbùn ntshob mfen.