Read Medumba 2 Fenfen 23 Bible Online

2 Fenfen 23 - Medumba bible

2 Fenfen 23

¹Mfen Yosias kùmte njoṅ ghakwé mbwe fa tse bo Yuda mba Yérusalém nà mbaṅ i.

²Yen nà be tôg a ko' nèn ndà Tshùaben boa njoṅ ba Yuda fa boa njoṅ ba Yérusalém fa, ghale'te Nsi, ba ghatshob ntshob Nsi mba njoṅ ngô fa neto' num tse nke' nèn nkum num tse ndùb. A siaṅ ntshob ṅwa'ni kàn ze bo fon ndà Tshùaben nà mbwe bo.

³Mfen tsin num dù' bo bom nà, ngwat kàn bo Tshùaben. A bam mb'a nsi ke tam njam Tshùaben, ke ze ntag mi, nkàn mi boa ntshù' mi njoṅ ngô ntù i fa bo njoṅ zwiag se fa, ndù a tshùa ndùlal'a lé' njoṅ ntshob sen kàn ni bo kite ntùm yen ṅwa'ni là là. Njoṅ ngô fa tsho ntùm sen kàn nà.

⁴Mfen tshob Hilkija ngale'te Nsi ze ndùb, ntshob ghale'te Nsi tse nke' boa ben bo ke mbéb nzendà là ndù bo sô tshu fa tse bo nabt'a num tu Baal, Astarté mba ntshu ntsho mfe kamànyam nà ntùm ndà Tshùaben. A tum nèn yi njam Yérusalém nton ntùm tômbo' Kédron; ngù bo lo' bwe tse nèn yi Bétél.

⁵A ta' ghale'te neto tse fenfen Yuda na' njab yub bo nke nton labinda mbwe' ntùm ntusô Yuda mba dù' ts'a ghebte Yérusalém nà. A ta' mba ben tse bo ke mfà labinda Baal, lagnyam, maṅwù, sa boa njoṅ ntshu ntsho mfe kamànyam nà.

⁶A sô neto Astarté ntùm ndà Tshùaben, nket nèn yi njam Yérusalém, nze fub Kédron; a ton neto là fub Kédron ngù a tù' bwembwôge. A lo' bwe tse ma' num ntufi bon ngô.

⁷A sate mba' kattù bènnzwi ts'a be ntùm ndà Tshùaben, bo ke ntswe bwe mba' ntàb Astarté là.

⁸A ghù njoṅ ghale'te fa fe ntùm ntusô Yuda nse'e. A sate mbwe' dù' ze ghale'te ke nton labinda bwe là, neto' Guiba nèn nkum Ber-Shéba; a sate mbwe' ts'a bete num ba nsém nà, z'a be ntshu nsém Yoshua, mfen tusô là bo z'a be bag nsém kwéb tusô là.

⁹Mba ndùlala ghale'te nsi mbwe' lo ke ko' nèn mbaṅ tômbwôg Tshùaben Yérusalém, là nke njù bàn ke te ywibte se netèt fèt tshobe.

¹⁰Mfen sate Tofét z'a be tômbo' bon Hinnom nà, ndùlala ndù kà sàm mèn bèn nton nshum i ke ngon i lo mbwôg num neghamte Molok yi.

¹¹A ghù bo biagte nyàmdiaṅ ts'a be nzendà ndà Tshùaben nà. Fenfen Yuda na' nte tshen nyàm nà bwe à num lén lagnyam mbaṅ to'ndà Netanmélek, njabmfenkune. Netanmélek nke ntswe ntùm mo' ba' mbaṅ ndà Tshùaben. Mfen ton nkalig lagnyam mbwôge.

¹²Mfen sate ntômbwôg mi a be ntùm to'ndà Akaz mfe tù là. Fenfen Yuda na' mbèn nte men ntômbwôg là. Mfen sate mba ntômbwôg mi Manasé na' nte ntùm bam ntshundà ndà Tshùaben tse bàa là. Ndùs'a be'te yub là, a ṅwat bwe tshob ma' ntùm fub Kédron.

¹³Mfen sate mbwe' ts'a be mbwe Yérusalém, num bag mbat bu ze zwim nà. Salomon mfen Israél na' mbèn nkut tshen dù' là num lén Astarté, neto nukebwô ba Sidon, num lén Kemosh neto nukebwô ba Moab, num lén Milkom neto nukebwô bon Ammon.

¹⁴A be'te ba bebune, mbe'te ba neto, naṅ mvôg benntùn dù' tse bo be là k'a dun.

¹⁵A sate mba tômbwôg s'a be Bétél là, nsate mbwe' ze Yéroboam nshum Nebat kule, Israél tshùa bwe ngù nukebwô là; a ton mbwe' k'a tù' à bwembwôge, nton mba neto.

¹⁶Ndùse Yosias kaṅ wul i njen mfi mi a be num mbat là, a tum bo nèn ṅwat mvôg mi a ntùm mfi là. A ton men mvôg là num tômbwôg ndo' nsagt'é yi ndaṅndaṅ mb'a ntùm ntshob mi Tshùaben tshùa num ntshu mèn Nsi ntshob tshen tshu là là.

¹⁷A tshob ndù: Sen tufi li me tshwèt njen nà b'a sil à? Ba tusô bùnte yi ndù: A b'a fi mèn Nsi z'a na' mfe Yuda, nse' nkua' ntshob tshu ts'o tshwèt nzwiagte sènni là.

¹⁸A bèn ntshob ndù: A bwô bin faṅ mvôg mi nsi ntùm fite; kà sàm mèn yab bu num bwe. Ndùlala bo lé' mvôg mi boa mi ngatshob ntshob Nsi z'a fe Samaria nse' là.

¹⁹Yosias biagte mba njoṅ mba' fa mi a be mbwe' ts'a ntùm ntusô Samaria là. Fenfen Israél bèn ngù tshen mbwe' là num nelo' nkamte yantù Tshùaben yi. A ghù num bo be ndaṅndaṅ mb'a na' ngù Bétél là.

²⁰A sete tô njoṅ ghale'te tse bo ke mfa' mbwe' là num tômbwôge; a ton mvôg benntùn bwe, ndo mbèn njam Yérusalém.

²¹Ndùlala mfen tshob ngô fa ndù: A bwô ndù bin jù Pasa num lén Tshùaben Nsi zin, mb'a be ntùm ṅwa'ni kàn nà.

²²Bo lo ke to' jù sàm Pasa a fute sen Pasa li fe ndùse ghatsho'te ntsha ke ntô ngô Israél, mba fe num ze ngelaṅ fenfen Israél boa tse Yuda.

²³Bo na' njù sen Pasa li a Yérusalém, mbe be ndù Yosias tswe num fen ngu'njù ntshob fom gham.

²⁴Yosias bèn mbiagte mba ben tse bo ke mbètte ywèt nu, tse bo ke ntshob nu ndamnjù là. A biagte ba térafim, ba neto boa njoṅ tshùaya'nu fa tse bo ke njen ntùm ngô Yuda bo Yérusalém nà. A ghù ndùlala nze ntshob mi a be ntùm ntshù', ntshob mi bo na' nkite ntùm ṅwa'ni ze ngale'te Nsi Hilkija na' mfon ntùm ndà Tshùaben nà.

²⁵Yosias lo be tum ze ndù mo' mfen ke' bèn mbe z'a fà wul i Tshùaben njoṅ ntù i fa, njoṅ zwiag se fa bo njoṅ ze neta fa mba yi mb'a be ntùm ntshù' Mosé là. Mba ngelaṅ mànjam mo' mèn lo ke tum z'a fut'i là.

²⁶Mba tà ndùlala tonkèt yantù ze Tshùaben ghù num Yuda là ke bot. Nummbe Manasé lo ghù nu ta, ndo' nkamte yantù i yi neshu.

²⁷Nummbe Tshùaben lo tshob ndù: Me nsi tshag mba Yuda ngùanesà num miag màm, mba me na' ngua' Israél là. Me nsi ghua' sen tusô Yérusalém ni se me na' ntsho' là bo ndà ze me na' ntshob ndù lén sàm nsi ke tswe a bwe là.

²⁸Tshé' mfa' Yosias, boa njoṅ tshu fa ts'a ghù là, bo kite ntùm ṅwa'ni Kronika fenfen Yuda.

²⁹A lo be num ze ngelaṅ Yosias, Faraon Néko mfen Egipto ko' nkam mfen Asiria ntsho, nze mbaṅ ta'ntse Efrat. Mfen Yosias nèn mbumte bo yi. Faraon yoṅ mbe yen i, nzwi i Megiddo.

³⁰Tshe' tse ket fe i ntùm ta' kalige, ndo Megiddo nèn Yérusalém, ntshoṅ i ntùm fi se. Ngô lo' nshum i Yoakaz njo' i fen, nte i num dù' tàab Yosias.

³¹Yoakaz lo be jù fen ndù a ghù ngu'njù ntshob tat ṅam mbàa. A tô num maṅwù tat, nke ntswe Yérusalém. Lén màab na' mb'a Hamutal. A na' mb'a ngon Yérémia, ze Libna.

³²A ghù ju z'a ke' bwô là num miag Tshùaben, kua' ndaṅndaṅ mba tà tse là.

³³Faraon Néko kul i tshan mà Ribla ntùm ngô Hamat, num netshètt'é ndù k'a bèn netô Yérusalém; a bètte ngô ntshub: Talaṅto silba nkù bo ta' talaṅto gol.

³⁴Faraon Néko ghom Eliakim, nshum Yosias fen num dù' tàab, mbate lén se njab ndù Yoyakim. A lo' Yoakaz nèn yi Egipto, a tsho bwe nkwù.

³⁵Yoyakim fà silba bo gol Faraon; a tam tagsi tu ngô ndù bo fà yen silba là, ndaṅndaṅ mba Faraon na' ntshob là. A yab mba ze njoṅ we lo, nke nkwé silba bo gol benntùn tse bo be ntùm ngô là, mfà ze Faraon Néko.

³⁶Yoyakim lo be jù fen ndù a ghù ngu'njù ntshob tàn ṅam mbàa. A tô num ngu'njù ntshob ntshù' gham, nke ntswe Yérusalém. Lén màab na' mb'a Zebudda, mbe ngon Pédaya ze Ruma.

³⁷Ndaṅndaṅ mba ba tà tse là, a fàn nu yàme mbwe Tshùaben.