Read Medumba 2 Fenfen 24 Bible Online

2 Fenfen 24 - Medumba bible

2 Fenfen 24

¹A lo be num ze ngelaṅ fen Yoyakim, Nébukanetsar mfen Babilon kam ntsho. Yoyakim bam nte' yi num ngu'njù tat; yen nà be tôg à ta tu yi.

²Ndùlala Tshùaben tum bwoṅ soyé Kaldéa, Siria, Moab boa tse Ammon num i. Tshùaben tum yub num Yuda ndù bo nèn nsat'é mb'a na' ntshùa num ntshu ghafa' tse ghatshob ntshob Nsi ntshob là.

³Yen nu là na' ntsho Yuda à mba Tshùaben kô là. A tshùa num nukebwô tse Manasé na' ngù là, Tshùaben tshag Yuda ngùanesà num miag mi.

⁴Nummbe Manasé lo fètte lem mbu'u, ndo' ndàm dù' yi Yérusalém. A tshùa ndùlala Tshùaben gha nelagte yen nu là.

⁵Tshé' mfa' Yoyakim boa njoṅ tshu fa ts'a na' ngù là, bo kite ntùm ṅwa'ni Kronika fenfen Yuda.

⁶Yoyakim nèn ntèt tà tse, bo lo' nshum i Yoyakin ngom fen yi, a tô num ze dù'.

⁷Mfen Egipto tsin, ke bèn netshag ntsho njam ntshundà, nummbe mfen Babilon lo lo' tsha' tse mfen Egipto ghù ntshundà là, neto' fub s'a Egipto là nèn nkum Efrat

⁸Yoyakin lo be jù fen ndù a ghù ngu'njù ntshob fom gham. A tô num maṅwù tat, nke ntswe Yérusalém. Lén màab b'a Nehushta. A na' mb'a ngon Elnatan, mbe ze Yérusalém.

⁹A ghù ju z'a ke' bwô là num miag Tshùaben, kua' ndaṅndaṅ mba tàab na' ngù là.

¹⁰A lo be num ngelaṅ nà tshe' Nébukanetsar mfen Babilon ko' nkam ntsho Yérusalém, ndo' tusô.

¹¹Nébukanetsar mfen Babilon ṅwag mbwe tusô ndùse tshe' tse ke ndo' tusô là.

¹²Ndùlala Yoyakin mfen Yuda nèn mbaṅ mfen Babilon bo màab mba tshe' tse, kamkam tse boa tse njabmfenkune. Mfen Babilon lo' i ngù ngandàtsha yi. A lo be be ndù a tswe num fen ngu'njù fome.

¹³A sô njoṅ tshunkàb ndà Tshùaben boa tshunkàb ndà mfen fa; a tsit njoṅ tshundà gol fa tse Salomon mfen Israél na' njabte ntùm ndà Tshùaben nà, a ghù à ndaṅndaṅ mba Tshùaben na' ntshob là.

¹⁴A lo' njoṅ ngô fa nèn yi ndà kuan, njoṅ kamkam fa boa njoṅ neta benntùn fa. Njoṅ benntùn bo nèn bo ndà kuan nà be ntu ntsha' gham. Njoṅ ghalo' tuba' fa boa ghanabte fùnndà nèn, k'a tù' à nda' ntshe'ma' bèn mbe ntùm ngô.

¹⁵A lo' Yoyakin nèn yi Babilon; a lo' màmfen Yérusalém nèn yi ndà kuan Babilon, ndo' zwi mfen boa tse njabmfenkun nèn yi boa ben ndùbndùb ntùm ngô;

¹⁶njoṅ ghankàb fa benntùn ntu ntsha' sammbàa boa ghalo' tuba', ghanabte fùnndà benntùn ntu ntsha' mbùm, njoṅ neta benntùn fa tse bo ku'ni nele' ntsho là. Mfen Babilon lo' yub nèn yi ndà kuan Babilon.

¹⁷Mfen Babilon ghom mo' mfèl i lén se Matania fen num ze dù' Yoyakin, mbate lén se njab ndù Sédékia.

¹⁸Sédékia lo be jù fen ndù a ghù ngu'njù ntshob ntshù' ṅam mbàa. Lén màab na' mb'a Hamutal. A na' mb'a ngon Yérémia, mbe ze Libna.

¹⁹A ghù ju z'a ke' bwô là num miag Tshùaben, kua' ndaṅndaṅ mba Yoyakim na' ngù là.

²⁰Yen nu là se' à num yantù ze Tshùaben na' ngù num Yérusalém bo Yuda, nkô nema' yub ngùanesà num miag mi là. Sédékia ta tu mfen Babilon.