Read Medumba 2 Fenfen 25 Bible Online

2 Fenfen 25 - Medumba bible

2 Fenfen 25

¹Mfen Sédékia lo be tswe num fen ngu'njù bwe'e, a be mum lé'njù gham num maṅwù gham, Nébukanetsar mfen Babilon se' nte mbàn njoṅ ze ntshu ntsho fa mbwe Yérusalém. A te mbàn mbwe i, ntswe' ba nsam ndiaṅ i yi mbume.

²Bo lo' tusô à num mbatte ngu'njù ntshob ntshù' gham mba Sédékia be num fen nà.

³A lo be kum lé'njù bwe'e ntùm ṅwù, nziku' ta ntùm tusô, lèn jujù ke bèn mbe ngô.

⁴Ndùlala bo to fa num kàbngô tusô, njoṅ ghama' ntsho fa tum tèttswe' nkù ntshùa num manze z'a be num nzendà z'a be netèt nkummba' mbàa là. Yen dù' là b'a mbaṅ nka' mfen. Yen ngelaṅ nà ba Kaldéa nke ndam ntusô mbume. Ben bo kù là tshùa num manze z'a be tômbo' là.

⁵Là ntshu ntsho ba Kaldéa te njam mfen, nkot'é tômbo' Yériko, njoṅ ze ntshu ntsho mfen fa sate mfaṅ i nkù nèn nesà mbaṅ i.

⁶Bo ghom mfen, ndo' i nèn yi mbaṅ mfen Babilon Ribla, dù' z'a keb ntsha i bwe là.

⁷Bo watte bon Sédékia num miag mi, nto miag Sédékia, nkul i tshan, ndo' i nèn yi Babilon.

⁸A lo be num lé'njù sammbàa ntùm ṅwù tàn, num ngu'njù ntshob bwe'e gham mba Nébukanetsar mfen Babilon be num fen nà, Nebuzaradan tà ghabéb dù' tsho Yérusalém. A na' mb'a tshe' mfen Babilon.

⁹Nebuzaradan ton ba' Tshùaben, nton ba' mfen boa njoṅ mba' fa Yérusalém; a ton njoṅ bon mba' ntùn fafa.

¹⁰Njoṅ ntshu ntsho ba Kaldéa fa tse bo be njam tàndà ghabéb dù' là sate kàbngô z'a lam Yérusalém mbum nà.

¹¹Nebuzaradan tà ghabéb dù' lo' tshé' benntùn tse bo tù' là nèn yi ndà kuan, ben tse bo bam nebe ze njam mfen nà. A lo' mba tshé' bwoṅ benntùn nèn yi.

¹²Mba tà ndùlala tà ghabéb dù' faṅ bon ndô ghadù' ntù ndu' boa ghadù' nà tse bo b'a ntshe'ma' là ntùm ngô.

¹³Ba Kaldéa be'te ntom tùn ts'a be ntùm ndà Tshùaben nà, mbe'te bon miag ntse bo dibantse tùn z'a be ntùm ndà Tshùaben nà, ndo' tùn nèn yi Babilon.

¹⁴Bo lo' ntsi bwembwôge, nsofa', mbi, nkob boa njoṅ tshundà fa tse bo ke mfa' fa' yi là.

¹⁵Tà ghabéb dù' bèn ndo' mba ntu' neton labinda yi bo ntu' tse bo lo' gol bo silba nabte yi là.

¹⁶Ntom bàa, dibantse boa bon miag ntse tse Salomon na' nabte num ndà Tshùaben nà, njoṅ tshundà fa na' mb'a tse tùne, mèn ke lèn mb'a lèt yi là.

¹⁷Ta' ntom lo ke nsag nguan mbu bwe'e, tu ntom be mfe num ntom ndù a ghù nguan kam bu; ntàm tshu lo be mbaṅ tu ntom ndù a taṅte num ngùl i. Njoṅ i fa na' mb'a tùne. Mbatte ntom na' mb'a be ndaṅndaṅ.

¹⁸Tà ghabéb dù' lo' Séraja ngale'te Nsi ze ndùb bo Sofoni nkwébo i boa ghabéb nzendà tat.

¹⁹A lo' njabmfenkune tusô, z'a na' mbèn nke ndôte ghama' ntsho là boa benntùn tàn tse bo ke ntag mfen, bo tèt yub tusô là. A lo' ze ngakite tà ntshu ntsho z'a be ndo' benntùn fa' soyé ntùm ngô là boa benntùn ntu ṅam sammbàa tse bo be ntùm tusô là.

²⁰Nebuzaradan tà ghabéb dù' lo' yub nèn yi mbaṅ mfen Babilon Ribla.

²¹Mfen Babilon lab yube, nzwite yub Ribla, ntùm ngô Hamat.

²²Ndùlala Yuda nèn ndà kuan tà ngùanesà mbaṅ ze ngô. Nébukanetsar mfen Babilon tete tshé' benntùn ts'a faṅ ntùm ngô là bwe, njab Guedalia a nke ntô yube. A b'a nshum Ashikam, nshum Shafan.

²³Ndùse tàndà ntsho boa ben tshob ju' ndù mfen Babilon lo' Guedalia ngù ngomna yi là, bo nèn ntèl i Mitspa. A na' mb'a ba: Ismaél nshum Netania, Yokanan nshum Karéash, Séraja nshum Tanumèt, Netofa bo Gaazania bon Maaka, bo boa njoṅ ben tshob fa.

²⁴Guedalia kàn mfe tshen ben ni boa ben tshob ntshob ndù: Kà bin bwôg sàm ju num ghafa' ba Kaldéa; bin tswe ntùm ngô, nke mfa' mfen Babilon; a be ndùlala mba bin nsi tswe mebwô.

²⁵Là, a be num ṅwù sammbàa, Ismaél nshum Netania, nshum Elishama, mèn ntùm nzwit fen, se' boa benntùn gham njam i, ndab Guedalia nzwi i boa ba Kaldéa tse bo be mbaṅ i Mitspa là.

²⁶Ndùlala njoṅ ngô fa neto' num bon nèn nkum num dùb boa tàndà ntsho bwôg ba Kaldéa, nkù nèn Egipto.

²⁷Yoyakin mfen Yuda lo be tswe ndà kuan ngu'njù ntshob sammbàa ṅam ntat, a be mum lé'njù ntshob sammbàa ṅam mbàa, mum ṅwù ntshob bàa gham, Evil-Merodak mfen Babilon ghù mebwô Yoyakin mfen Yuda, nsô i ndàtsha. A lo be be ndù Evil-Merodak ghù num fen tamngu'.

²⁸A tshob nu ntùn Yoyakin kua' mebwô, nso diaṅkwa tun i a tshùa se njoṅ fenfen fa tse bo be Babilon boa bo là.

²⁹A sô nzwe ngandàtsha num i; Yoyakin nke njù be num téblé mfen Babilon tà nzi nkwù.

³⁰Njoṅ ngelaṅ fa z'a be ntùn nà, njoṅ mba ze ke lo fa nke mfe a mfen Babilon mba sit lé'njù lo.