Read Medumba 2 Fenfen 3 Bible Online

2 Fenfen 3 - Medumba bible

2 Fenfen 3

¹Yoram nshum Akab nke ntô Israél, nke ntswe Samaria. A na' mb'a mbatte ngu'njù ntshob fom gham mba Yosafat mfen Yuda be num fen nà. Yoram tô num ngu'njù ntshob bàa gham.

²A ghù nukebwô num miag Tshùaben, là ke yôg mbe mba tàab bo màab là. A lo sate njoṅ neto Baal fa tse tàab na' ntete là.

³Là, nso wul i num nukebwô Yéroboam nshum Nebat z'a na' ngù Israél vù ntùm bwe là. A ke tam yen nu là mvèn i.

⁴Mesha mfen Moab lo ghù mbwe yàme. A lo ke mfà ntshub mfen Israél njùmbwe ntsha' nkù boa nkomnjù ntsha' nkù boa nyiaṅ tshobe.

⁵Akab lo kwù, mfen Moab tù' nta tu mfen Israél.

⁶Be num sen lé'njù là mfen Yoram tum mà Samaria, nte njoṅ ngô Israél fa tù,

⁷ntam nze, mbèn ntum bo tshob Yosafat mfen Yuda ndù: Mfen Moab ta tu me, b'o se' be kam i me ntsho ké? A tshob ndù: Me nsi ko' se' bag wù nène, be b'a ta' ju ntshù', yàm nzwit mèn b'a yu nzwit mèn, tshàm nyàmdiaṅ be tsho.

⁸Yoram tshob ndù: Be nsi ko' à num zit manz'à? Yosafat tshob ndù: Be tshùa num manze z'a kônkwa Edom nà.

⁹Mfen Israél, mfen Yuda bo mfen Edom nèn. Bo zin num lé'njù sammbàa nto' nebwoṅ ntse mi bo fà soyé tse boa bo be là, mba mi nyàm tse bo ket tshu njam bo là.

¹⁰Ndùlala mfen Israél tshob ndù: Wé! Tshùaben tsiaṅ tshen fenfen tat li nsen ni faṅ yub à ntùm mbu Moab ké?

¹¹Là Yosafat tshob ndù: Ndù sàm ngatshob ntshob Nsi Tshùaben ke nsen ni ze be bag tshùa njam i mbètte Tshùaben nu là ké? Mo' ngafa' mfen Israél bùnte ndù: Elisa nshum Shafat z'a ke naṅ ntse ntùm mbu Elia là num nsi.

¹²Yosafat tshob ndù: Ntshob Tshùaben num i. Ndùlala mfen Israél, Yosafat bo mfen Edom swe' nèn mbaṅ i.

¹³Elisa tshob mfen Israél ndù: A nu ke netèt be bag wù à? Nèn ntèt tse ghatshob ntshob Nsi tàan boa tse màan. Mfen Israél tshob yi ndù: Be mo' ndù Tshùaben ke ntsiaṅ tshen fenfen tat li nsen ni faṅ yub à mum mbu Moab k'à?

¹⁴Elisa tshob ndù: Me lo' lén Tshùaben tàndà ntsho z'a be ntùn, ze me tsin mbw'é là, nkàn mfe yi, ntshob wù ndù a lo mbe ke b'a num ze tu Yosafat mfen Yuda, mba me ke' lôt'o, ke bam nete mba lag num o.

¹⁵Ndonni bin fà ta' ngabu' loṅ me. Ndùse ngabu' loṅ ke mbu' loṅ nà, bu Tshùaben yab num Elisa.

¹⁶A tshob ndù: Tshù mba Tshùaben tshob li: Bin tswe' ba nsam, ntswe' ba nsam ntùm sen tômbo' li!

¹⁷Nummbe Tshùaben tshob ndù: Bin ke nsi ju' ntshùa fetmbaṅ, ke yen mbaṅ, nda' ndù ntse nsi dun ntùm sen tômbo' li, bin nu bin à bwoṅ nyàm tsin mba nyàm tsin tse bo ket tshu là.

¹⁸Yen nà ke b'a mo' ju num miag Tshùaben, nummb'a nsi fà Moab ntùm mbu mine.

¹⁹Bin nsi lo' tusô bo kut kàbngô bwe là bo tusô s'a be se ntùn nà. Bin keb ntù ntùn ndo' ntshèt ntôntse yi, ndo' ndoṅ ndo' mbagte njoṅ nà ntùn yi fa.

²⁰Tshù, a be nkebnjù num ngelaṅ bo be mfà ju bwôntù là, bo be yen ntse fe nze Edom, ndo' ngô fa.

²¹Ba Moab ju' mbe fenfen tshwèt nko' nse' le' yub ntsho. Ndùlala njoṅ benntùn fa tse bo ku'ni netshùb kô boa ben tse ntse mub kôgte là tum ntsinte num ndùnsi.

²²Bo lo nsi mà bam nkebnjù, njen ntse be mba lem nà ndùse nyam ke nké' bwe là. Ba Moab yen mi a be mbwe bo là, a tswe mba lem nà.

²³Bo tshob ndù: A b'a lem. Fenfen zwite wut tshobe, ntshu'te wut tshob bo bo. Moab, a bwô ndù be lag ntsha' ndonni.

²⁴Bo tsho ntùm ze mbàn Israél, là ba Israél lo nsi nzwite yube. Ba Moab kù mbwe bo nène. Israél be tsho Moab nke nzwite benntùn.

²⁵Bo sate ntusô yàme, nsate nà tse ntùn; mba we lo ma' se loṅ bwe, mbèn nkabt'é. Bo zwiag njoṅ ntôntse fa, nkeb njoṅ ntù ntùn fa. Ghama' shùmte lam ngô mbume, ndo' Kir-Haréset, kà mfaṅ à nda' ndoṅ bwe.

²⁶Mfen Moab be yen mb'a vù ntsho là, ndo' bandum ntu nkù sammbàa tse bo lèn netsho' ṅwi, num neto nze tà nèn nkum num mfen Edom; là bo ke ku'ni.

²⁷Ndùlala, a lo' tuswe i z'a na' mbwô ndù a bèn ntô num ze dù' là, nton i num kàbngô num jule'te. Yen nu là kam mo' yantù ndùb num ba Israél, bo lo mbaṅ mfen Moab nkù mbèn ntùm yub ngô.