Read Medumba 2 Fenfen 4 Bible Online

2 Fenfen 4 - Medumba bible

2 Fenfen 4

¹Mo' mènnzwi netèt zwi nshumnshum ba ghatshob ntshob Nsi tum bo tsiaṅ Elisa, a tshob yi ndù: Ngafa' o, ndu àm kwù, o ne ndène, ngafa' o lo ke mbwôg Tshùaben. Tshù nganjo se' nelo' bon tshàm tse bàa mba kuan tse là.

²Elisa bètt'é ndù: Ze be me ghù wù b'a ke? Soṅ àm ju z'o ghù ntùm ndà là. Mènnzwi là tshob ndù: Ngafa' o ke' ghù sàm ju ntùm ndà k'a ke nda' ta' nda mfèt.

³Elisa tshob ndù: Nèn ndon nda mfèt njoṅ tsho ba ndùla' fa, nda tse ju ke ntùm bwe là; kà lon à kage.

⁴Ndùs'o nsi bèn njam nà, o nsi fùn nzendà num o mba num bon tsho; o nsi naṅ men mfèt là ntùm tshen nda là, tete nda ts'a dun nà njam.

⁵Ndùlal'a lo mbaṅ Elisa nène. A fùn nzendà num i mba num bon tse. Bon kette nda nke mfà yi, a nke naṅ mfèt bwe.

⁶Ndùse nda dunte là, a tshob nshum i ndù: Bèn mfà mo' nda me. L'a bùnte yi ndù: Nda ke' bèn mbe. Mfèt mi be ndùse.

⁷A nèn nsoṅ Elisa mèn Nsi, Elisa tshob yi ndù: Nèn nswèn mfèt, ntô njo; mi a nsi tù' là bin à bon tsho ke njôg yi.

⁸A lo be num mo' lé'njù Elisa nke ntshùa Sunem. Mo' nkum mènnzwi z'a be bwe là nànt'é ndù a bam nejù jujù ndà i.

⁹Mènnzwi là tshob ndu i ndù: Tshù, me lèn mbe yen mandum ni z'a be ntshùa la' be njoṅ ndù fa là b'a kua' mèn Nsi ze nelàne.

¹⁰Be ghù meto'ndà mfe tù, njab kunndà yi bwe, nte ta' téblé bwe bo ta' diaṅ mba ta' lambo ndù a ke mbe tshùa nzi bwe ndùs'a se' la' be là.

¹¹Ndùse Elisa se' Sunem nà, a ko' nô ntùm to'ndà là tù,

¹²ntshob ngafa' i Guéhazi ndù: Tsiaṅ yen ngon Sunem nà. Guéhazi tsiaṅ i, a se' mbwe Elisa.

¹³Elisa tshob Guéhazi ndù: Tshob yi ndù: Yen mb'o lab wul o num bag neshu njene; ke ze be bag ghù wù à? Be bag tshob nu mfen num lén so ké ke bag tshob nu tàndà ntsho num lén so à? L'a tshob ndù: Me ke njôg à ntùm ntshu ntshù' netèt yàm nzwit mèn.

¹⁴Elisa bèn ntshob ndù: Kua' ke ze be bo ghù yi di à? Guéhazi tshob ndù: Yen mb'a ke' ghù nshum, ndu i ne mbèn njwène.

¹⁵Elisa tshob ndù: Tsiaṅ i. A tsiaṅ i a se' ntsin nzendà.

¹⁶Elisa tshob ndù: O nsi lét ta' mén be kua' num sen lé'njù li ngumo'. Mènnzwi là bùnte ndù: Nga me tshùaben àm mèn Nsi, kà tatte ngafa' o me.

¹⁷Là, mènnzwi là lét, mbwe mén mandum be num sen lé'njù là, be num yen ngelaṅ njù là, ndaṅndaṅ mba Elisa na' ntshob là.

¹⁸Mén ku'. L'a be mo' lé'njù s'a nèn tshù tàab, mbaṅ ghatsho' tshu là,

¹⁹a tshob tàab ndù: Tu àm! Tu àm tshwèt nja àm! Tàab tshob ngafa' i ndù: Lo' i nèn mfà màab.

²⁰A lo' i nèn mfà màab; mén tswe num nku màab tà nkum njagnyam, nkwù.

²¹A ket fe i nko' nèn njab num kunndà mèn Nsi, ntum ntam nzendà tu num i.

²²Mènnzwi là tsiaṅ ndu i ntshob ndù: Me le't'o tum ta' ngafa' là me bo ta' kekwène, me kù nde nèn mbaṅ mèn Nsi kà nse'e.

²³Ndu i tshob ndù: O kô nenèn mbaṅ i sènni à numke? A ke' b'a ntshùa ṅwù li, ke be Sabbat. A tshob ndù: Me tsha't'o!

²⁴Mènnzwi ghù ngafa' nabte kekwène, a tshob ngafa' ndù: Nèn be nène, kà tsin manze ke be ndù me tshob wù.

²⁵Mènnzwi tam nze nèn dù' ze mèn Nsi be bwe, num mbat Karmél là. Mèn Nsi be yen i tà ngùanesà ntshob ngafa' i Guéhazi ndù: Tshù ngon Sunem din!

²⁶Kù nde nèn mbumte bin yi ntshob yi ndù: O tswe mebwô ké? Ndu o tswe mebwô ké? Mén tswe mebwô ké? Mènnzwi bùnte ndù: Ntswe mebwô num bwe.

²⁷Ndùs'a kum mbaṅ mèn Nsi num mbat là, a tshùb nku mi. Guéhazi kù'te nse' netèn i, là mèn Nsi tshob ndù: Faṅ i là, a b'a ntùm zwentù. Tshùaben ke' tshob yen nu là me, a lemt'àm yi.

²⁸Ndùlala mènnzwi là tshob ndù: Me lo lon mén tshùaben àm ké? Me lo ke tshob ndù k'o tatt'àm ké?

²⁹Elisa tshob Guéhazi ndù: Taṅ so kob tun o ndo' kôg sàm bu o nène. Bin mèn mbumte k'o tsha't'é; a be ze mèn tsha't'o là k'o bùnte. O nsi tsho yab kôg sàm num se mén.

³⁰Là mà mén tshob ndù: Me kàn mfe num lén Tshùaben bo lén so ndù me ke nsi kag ku o! Ndùlala Elisa lo ntam njam mènnzwi là.

³¹Guéhazi lo kwé mbwe bo, nèn njab kôg num se mén. L'a ke ju' nze mén, mén ke kumte. Ndùlal'a bèn njam, mbumte bo Elisa ntshob yi ndù mén ke' bam.

³²Elisa lo be kum ndà ndù mén a kwù, bo yab i num kunndà se.

³³Elisa tsho ndà, mfùn nzendà num bo ntu tshob bàa, ma' mbu Tshùaben!

³⁴A ko' num kunndà, nô num mén, nte ntshu i num ze, nte miag mi num mi, njab mbu mi num mi mén. A nyit num i ndùlala. A tshùa ndùlala wut mén bèn ndume.

³⁵Elisa lo, nkatte ntùm ndà, nèn bag bag, mbèn nko' nyit num mén. Ndùlala mén tswiag yoṅ sammbàa, nga' miag mi.

³⁶Elisa tsiaṅ Guéhazi ntshob ndù: Tsiaṅ ngon Sunem nà. Elisa tsiaṅ i, a se' mbaṅ Elisa, a tshob yi ndù: Lo' nshum o là!

³⁷A tshùb nku Elisa, ngwù mbw'é kabkab, ndo ndo' nshum i ntume.

³⁸Elisa bèn nse' Guilgal. Mo' nziku' lo be ntùm ngô. Mba nshumnshum ba ghatshob ntshob Nsi tswete mbw'é là, a tshob ngafa' i ndù: Te kab mbwôg na jujù yi mfà nshumnshum ba ghatshob ntshob Nsi.

³⁹Mo' ta' i netèt bo tum nèn kàb njab. A fon mo' nze'ntat ntùm mo' nkùa, nkàb t'a dun num nzwe i. Ndùs'a bèn njam nà, a kebte naṅ ntùm kab, nummb'a lo ke lèn tshaṅ i.

⁴⁰Bo sôte mfà benntùn ndù bo jù. Là ndùse bo jù là, bo to' nekua'a, nke ntshob ndù: Mèn Nsi, vùkob ntùm jujù li là, bo ke ku'ni nejù.

⁴¹Elisa tshob bo ndù: Bin diag mbab bàn mfà me. A ma' mbab bàn ntùm kab, ntshob ndù: Bin sôte mfà benntùn bo jù. Mo' ju kebwô lo ke bèn mbe ntùm kab.

⁴²Mo' mèn fe Baal-Shalisha nse'e. A lo' bàn mbwe tshu nse' mfà mèn Nsi, bàn nsa ntu' ṅam mbàa boa ko' ngefet nswe ntùm bàm i. Elisa tshob ndù: Fà tshen ben nà bo jù.

⁴³Ngafa' i bùnte ndù: Be me ghù à ndùke kà mfà benntùn nkù à? Là Elisa tshob yi ndù: Fà tshen ben nà, bo jù; nummbe tshù mba Tshùaben tshob li: Bo nsi jù, tshé' i bèn ntù'ù.

⁴⁴Ndùlal'a te bàn mbwe bo, bo jù kà tshé' i tù', ndaṅndaṅ mba Tshùaben tshob là.