Read Medumba 2 Fenfen 5 Bible Online

2 Fenfen 5 - Medumba bible

2 Fenfen 5

¹Naaman, tàndà ntsho mfen Siria na' mb'a mèn ndùb ntùm ngô, mba mbwe tàfa' i. Bo lo ke nyàmt'é nummbe Tshùaben lo tshùa mum mbu mi ngù ba Siria tshùa ntsho; là, yen ka'te mèn bo neta mèn ni na' mb'a ngakine.

²Tshù, mo' bwoṅ ba Siria lo tsho ntùm ngô Israél, ndo' mo' ménngon bwe nèn yi ndà kuan, ntsho a nke mfa' nzwi Naaman.

³A tshob màfa' i ndù: tshùaben àm lo mb'a mbaṅ ngatshob ntshob Nsi z'a Samaria là mb'a be ngatshob ntshob Nsi yate nkin mi!

⁴Naaman nèn nsoṅ tàfa' i ntshob ndù: Ngon Israél tshob ndù bo ndù.

⁵Mfen Siria tshob ndù: Nèn Samaria, m'a' tum ṅwa'ni mfen Israél. Naaman nèn, mbe nèn ndo' silba talaṅto gham, gol ndô nkàb ntsha' ntôge, boa nzwe nebate nzwe yi gham.

⁶A lo' ṅwa'ni mfen Israél ndù bo kite bwe ndù: Yen ṅwa'ni li b'a netshob wù ndù me bèn ntum ngafa' àm Naaman ndù o yate nkin mi.

⁷Ndùse mfen Israél miagte nesiaṅ ṅwa'ni là, a fagte nzwe tse ntshob ndù: Me b'a Nsi z'a ke nzwi mèn mbèn mbam i là ké k'a nke ntshob ndù me yate nkin num mèn à? A bwô bin lèn ndù a ke ndiag a nze kam àm ntanta.

⁸Ndùse Elisa mèn Nsi ju' mbe mfen fagte nzwe tse là, a tum bo nèn ntshob mfen ndù: Numk'o mfagte nzwe tsho à? Faṅ a se' ntèl àm, a nsi lèn ndù ta' ngatshob ntshob Nsi num Israél.

⁹Naaman se' boa nyàmdiaṅ tse, kalig se, ntsin nzendà Elisa.

¹⁰Elisa tum bo nèn ntshob yi ndù: Nèn nsôg wul o ntùm Yordan yoṅ sammbàa; wul o nsi be mebwô, o be nelàne.

¹¹Naaman ya ntù ndo nke nène, ntshob ndù: Me lo ke nkwate ndù a nsi tum se' mbaṅ àm se' mbwe àm ze tu, tsiaṅ lén Nsi i, se'te bu i dù' ze nkin be là yat'àm.

¹²Nta'ntse Damas, Abana, bo Parpar ke' bwô ntshùa njoṅ ntse fa mi a Israél là ké? Me ke ghù nesôg wul àm bwe ndàn ké? A bèn njam, nke mbèn bo tshùagntù.

¹³Là, ghafa' tse se' mbaṅ i ntshob nu yi ntshob ndù: Tàa, ngatshob ntshob Nsi lo mbètt'o mo' ju z'a ta neshu là mb'o ke' ghù ké? Ndonni a ke' bwô neju' ntshu mb'a tshob wù ndù: Sôg wul o ndàn nà ké?

¹⁴Ndùlal'a swe' nèn ntùm Yordan, nso wul i bwe yoṅ sammbàa mba mèn Nsi tshob là. Wul i be mba ze ménnshum nà; a làn.

¹⁵Naaman bèn mbaṅ mèn Nsi boa njoṅ ben tse fa. Ndùs'a kum nà, a tsin mbwe i ntshob ndù: Me lèn ndonni ndù Nsi ke' be mo' dù' num nsitsha'a, mb'a b'a nda' Israél. Ndonni a bwô ndù o kwé nda' ze ngafa' o fà wù là, me le't'o neshu.

¹⁶Elisa bùnte ndù: Num lén Tshùaben z'a be ntùn, me be ngafa' i là, me ke nsi kwé sàm ju. Naaman nànt'é ndù a kwé ju, l'a ke bam.

¹⁷Ndùlala Naaman tshob ndù: Mb'o gha là, a bwô o tshob bo fà dù' tsha' ngafa' o me, nguan dù' ze be kekwèn bàa ket là. Nummbe ngafa' o ke' bèn nkô neton nyàm ke nefà jule'te lo tsemo' nsi. A nsi tù' ke fà nyàm ts'a tone, boa tshule'te l'a nda' Tshùaben.

¹⁸Mba ndùlala tshù ju me tshwèt nde'te Tshùaben ndù a ke ndagte mfà ngafa' o li: Ndùse tàfa' àm tsho ndà Rimmon num nete ntunkekwi' mi nsi, (ntshùb) njé'te num bu àm nà, mb'a bwô ndù mba me yàm te ntunkekwi' màm nsi bwe, ntùm ndà Rimmon nà.

¹⁹Elisa tshob yi ndù: Nèn fite. Ndùse Naaman lo mbaṅ Elisa, mbe nguan mo' njoṅ nze là,

²⁰Guéhazi ngafa' Elisa mèn Nsi tshob ntù i ndù: Tshù, tàfa' àm kabte Naaman ze Siria, ke bam nekwé ju z'a lo ntshùb bu i nse' yi là. Nsi b'a ntùn! M'a' ta' i nkwé kua' meju yi.

²¹Ndùlala Guéhazi ta' Naaman. Naaman be yen mba Guéhazi tshwèt nta' i njam nà, ntsho' num kalig se ngwù nsi nèn mbumte bo yi mbètt'é ndù: Tshô fi à?

²²Guéhazi bùnte ndù: Tshô fi. Tàfa' àm bèn ntum àm ndù me tshob wù ndù: Be kua' ndonni tsemo' bonnshum bàa fe num mbat Efraim nse'e. Bo tum à netèt bon ba ghatshob ntshob Nsi, a bwô ndù o fà ta' talaṅto silba bo nzwe bàa tse nebate nzwe yi me.

²³Naaman tshob ndù: Bam nekwé talaṅto bàa. A saṅ laṅe, nso bu bàm nsô talaṅto bàa ntùm mbàm mbàa boa nzwe nebate nzwe yi. Naaman fà njoṅ i fa tshe' tse bàa ndù bo lo' nèn yi mbwe Guéhazi.

²⁴Ndùse bo kum num kônga Ofél là, Guéhazi kwé njoṅ i fa mum mbu mub njab ntùm ndà, ndé'te bandum nà bo nèn.

²⁵Mbe se' mba yi là, a bèn mbwe tàfa' i. Elisa bètt'é ndù: O fe à yà Guéhazi? A bùnte ndù: Ngafa' o me ke' kaṅ ku àm sènni, nèn nsen ni ke nsen nà lo.

²⁶Elisa tshob yi ndù: O ke nkwat'a mbe me fe ke yen ngelaṅ ze mandum nà fe nswe' num kalig se, nse' bin yi bumte là ké? Nda' ndù, ndonni ke' b'a ngelaṅ nekwé mbwô nzwe, ke bèn mba ngelaṅ nekwé silba nejun ntamntù boa nkùa mba ba mbwe boa nyàmna' yi, ke bèn mb'a ngelaṅ nekwé ndo' njun mba ghafa' tse bandum boa tse bènnzwi yi.

²⁷Nda' ndù nkin Naaman nsi tam num o mba num yu nzwit matmat! Guéhazi lo mbaṅ Elisa nène, ndù nkin tam num i, mbe fôgtab mba nywinmbaṅ nà.