Read Medumba 2 Fenfen 6 Bible Online

2 Fenfen 6 - Medumba bible

2 Fenfen 6

¹Bon ba ghatshob ntshob Nsi tshob Elisa ndù: Yen mbe dù' ze bag be ntswe bwe mbaṅ o là kag num bag.

²Bam bag, bag nèn nkum mà Yordan, mba we lo keb ta' saṅ bwe, bag lo' nkut dù' yi nke ntswe bwe! A tshob ndù bo nène.

³Là, mo' ta' i netèt bo tshob ndù: Bam ndù bin à ghafa' tsho bèn nèn! A tshob ndù: Me nsi nène.

⁴Ndùlal'a nèn boa bo. Bo kum mà Yordan, nkeb ntù bwe.

⁵Tshù, ndùse mo' ke nkeb ta' nta' tù là, ṅwi tsho' num ngwùl i ngwù ntse. A to' nekua'a, nke ntshob ndù:

⁶Ah! Tshùaben, ṅwi àm vù ntse. A vù à zit dù' à? A la'te dù' i yi. Ndùlala Elisa keb ta' kam tù ma' num dù' i, ngù ṅwi se' num ntse.

⁷Elisa tshob ndù: Sô ṅwi! A tshag bu i ngom ṅwi.

⁸Mfen Siria na' mb'a tù ntsho bo Israél. A tsin tsham boa ghafa' tse ntshob bo ndù: Tshù lèn dù' me nsi ghù mbàn àm bwe li.

⁹Là mèn Nsi tum bo tshob mfen Israél ndù: Zete netshùa yen dù' là, nummbe ba Siria tshwèt nse' bwe.

¹⁰Ndùlala mfen Israél tum mènntùn, a nèn ntsin kua' num dù' ze mèn Nsi la'te yi là, nke nya'a. A ke tsin bwe à nda' yoṅ ntshù' ke yoṅ bàa lo.

¹¹Ntù mfen Siria tum num yen nu là. A tsiaṅ ghafa' tse ntshob bo ndù: Be bin soṅ ze mèn mfen Israél z'a be netèt bin nà ké?

¹²Ngafa' bùnte ndù: Mfen àm, sàm lèn yen mèn nà ke netèt bag. A b'a Elisa, ngatshob ntshob Nsi z'a Israél là bèn nke nsoṅ mfen Israél ntshob mi o tshob ntùm to'ndà z'o be nzi bwe là.

¹³Mfen Siria tshob ndù: Bin nèn ndôte dù' z'a be là, me tum bo nèn ngom i. Bo te bu num mfen ntshob ndù: Tshù i là mà Dotan.

¹⁴Mfen tum ba nyàmdiaṅ bwe, nkalige, mba mo' ntshu ntsho ndù a yàm; bo kum bwe tèttswe', ndam tusô mbume.

¹⁵Ngafa' mèn Nsi lo nsi kua' mà nkebnjù ntume. A yen mo' bwoṅ soyé ndù bo lam tusô mbume, boa nyàmdiaṅe, nkalige. A bèn njam ntshob Elisa ndù: Tshùaben àm, be à kwù, be a' ghù à ndùke?

¹⁶A tshob ndù: Kà bwôg, nummbe ben tse bag à bin bo be là yàm ntshùa tse bo à bo be là.

¹⁷Ndùlala Elisa le'te Nsi ntshob ndù: Tshùaben gha' miag ngafa' a yen mba nyàmdiaṅ boa nkalig mbwôg be num mbat ndiaṅ Elisa mbum nà.

¹⁸Ba Siria swe' nse' mbaṅ Elisa. Ndùlal'a le'te Tshùaben ntshob ndù: A bwô ndù o kag fù miag tshen ben ni! Tshùaben kag fù miag bo mba Elisa bètte là.

¹⁹Elisa tshob bo ndù: Yen ni ke b'a manze, sen ni ke be tusô; bin tam njam àm m'a' lo' zin nèn mfà mèn ze bin tshwèt ndiag i là. A lo' yub nèn yi Samaria.

²⁰Ndùse bo tsho Samaria là, Elisa tshob ndù: Tshùaben, gha' miag tshen ben ni bo yen nze. Tshùaben gha' miag mub bo yen ndù bo b'a tèt Samaria.

²¹Mfen Israél be yen yub ntshob Elisa ndù: Tàa, me zwite ké, me zwite yub ké? Elisa bùnte ndù:

²²Kà zwite yube. B'o bèn nzwite ben tse bo tù' b'a ghandàtsha là ṅwi ke netam yub két lo ké? Fà jujù bo ntse bo, bo jù mbèn nu, mbèn njam mbaṅ tàfa' yub.

²³Mfen Israél ghù bo fà jujù yàm bo; bo jù mbèn nu. Yen nà be tôge, a lé'te yube, bo bèn njam mbaṅ tàfa' yub. Bwoṅ soyé ba Siria ke bèn nzi nese' num tse tsha' ba Israél.

²⁴Yen nà lo be tshùa, Ben-Hadad, mfen Siria tse'te njoṅ ze ntshu ntsho fa nko' Samaria.

²⁵Mo' nziku' ndùb be Samaria. Soyé lo' dù' kà bo nke nswèn tu kekwèn ndô nkàb ṅam fome, nke nswèn bontsit miag nju ndô nkàb tàn.

²⁶Tshù, ndùse mfen Israél ke ntshùa tù kàbngô là, mo' mènnzwi kua' ntshob yi ndù: Mfen àm, ywimt'àm.

²⁷A tshob ndù: A be ze Tshùaben ke' ywimt'o là, mba me nsi ywimt'o à ke? Me lo' à dù' neyen nsa ké, ke me lo' à dù' tshab à?

²⁸Mfen bèn ntshob yi ndù: A nu ke? Mènnzwi là bùnte ndù: Yen mènnzwi din lo ntshob me ndù: Fà yu nshum be fèl i sènni, ntshag ndamnjù mfèt yàm yàm.

²⁹Ndùlala bag yi lo na yàm nshum mfèle. Njù làn me tshob yi ndù: Fà yu nshum be fèle! L'a lem ze nshum.

³⁰Mfen yoṅ mbe ju' ntshob mènnzwi là mfagte nzwe tse. Ndùs'a ke ntshùa tù kàbngô là, ngô yen ndù a ma' à nke'bàm num i.

³¹Ndùlala mfen tshob ndù: A bwô ndù Tshùaben yab nge' num àm ntshùate, a be ze tu Elisa nshum Shafat ke' tù sen lé'njù li là.

³²Tshù Elisa na' mb'a ntùm ndà i ndù a tswe bwe, ghakwé mbwe tswete mbaṅ i. Mfen tum mèn mbaṅ i; là, yen ntum nà be kum mbaṅ Elisa ndù a tshob ghakwé mbwe ndù: Tshù ngazwi mèn nà z'a tum mèn ndù a se' ntsho' tu àm nà. Bin zete, mfùn nzendà, ndo' ghabndà ntèn i yi ndùs'a nsi ṅwag là. Bin ke' ju' nku tàfa' i là njam i ké?

³³Mb'a ke nke' ntshob là, bo be yen ntum ṅwag, ntshob Elisa ndù: Yen nge' li fe à Tshùaben, ze be me bèn nywinte Tshùaben nà b'a ké?