Read Medumba 2 Fenfen 7 Bible Online

2 Fenfen 7 - Medumba bible

2 Fenfen 7

¹Elisa tshob ndù: Bin ju' ntshob Tshùaben. Tshù mba Tshùaben tshob li: A nsi be ndamnjù num lèn yen ngelaṅ ni kesoṅ ngefet ke ntsho ta' ndô nkàb, nkesoṅ nsa mbàa tsho ta' ndô nkàb.

²Tàndà ntsho ze kwùntshaṅ mfen tshob mèn Nsi ndù: Tshùaben lo ntsho' be ntôndà kamànyam mb'a be lèn yen nu là bumt'à? Elisa bùnte ndù: O nsi yen kua' miag mu, là, o ke nsi zwi'te ju bwe.

³Tsemo' ghankin lo be ntshu nsém ntu kuà, ntshob bo bo ndù: Numke be ntswe nsen ni nke mbéb vùkob à?

⁴A be ze be tsho ntùm ngô là, mba be nsi kwù bwe, nummbe nziku' se ka mum ngô; be ngô be nsen ni mba be a' kwù be nekwù. Be tsho ntùm mbàn ba Siria, a be ze bo faṅ be ntùn nà, mba be nsi yôge; mbe ze bo zwi be là, mba be nsi kwù.

⁵Ndùlala njù be tamte bo tam manze, nèn ntùm mbàn ba Siria. Bo zin nkum ntshu mbàn. Bo yen ndù sàm mènntùn ke' be ntùm mbàn.

⁶Tshùaben lo ghù kua' mo' tshu'te tsho ntùm mbàn ba Siria; a na' mb'a tshu'te nkalige, ze nyàmdiaṅe, ze mo' ntshu ntsho ndùb, kà ba Siria tshob bo bo ndù: Mfen Israél tsho shun boa mfen Hit, mfen Egipto, num nese' ma' be ntsho.

⁷Ndùlala, ndùse njù sèn nà, bo tum nkù, njèn ntàb tshobe, nyàmdiaṅ tshobe, kekwèn tshobe. Bo na' mfaṅ mbàn à be kua' mal i, ndo' tu yub nkù yi.

⁸Tshen ghankin ni zin nkum tôg mbàn, ntsho ntùm ta' ntàb, njù mbèn nu, ndo' gol bo silba, ndo' ba nzwe nèn ndeme. Bo bèn mbèn njam ntsho ntùm mo' ntàb, ndo' njoṅ tshu fa ts'a be ntùm bwe là nèn ndeme.

⁹Bo tshob bo bo ndù: Yen nu li be ghù sènni là ke' bwô. A b'a lé'njù tshô ntùn, a be ze be lem yen nu li tà njù làn nà, mba nu nsi tshùa bwe ghù be. Ndonni a bwô ndù be bèn njam nsoṅ yen tshô li ntùm ndà mfen.

¹⁰Ndùlala bo nèn ntsiaṅ ghabéb nze fe', nsoṅ yub yen nu là ntshob ndù: Bag tsho ntùm mbàn ba Siria, ke tèt sàm mènntùn ntùm bwe, ke ju' mba nda' nze mènntùn. Bag yen à nyàmdiaṅe, nkekwène, ndù bo taṅte yube, bo ntàb be kua' mbe mi.

¹¹Ghabéb nze fe' kua', nèn nsoṅ yen nu là ntùm ndà mfen.

¹²Mfen lo nsi tèttswe', ntshob ghafa' tse ndù: Bin tsin me soṅ zin ju ze ba Siria ghù be là. Mba bo lèn mbe nziku' ya be là, bo tum mbàn ndem tshwèt, nke ntshob ndù: Bo nsi tum ntùm ntusô, be ghom yub ntùnntùn, kà ntsho ntùm tusô.

¹³Mo' ngafa' mfen bùnte ndù: Be lo' nyàmdiaṅ tàn ts'a tù' ntùm ngô là. Mba bo b'a mba bwoṅ ba Israél z'a tù' là; mba bo b'a mba bwoṅ ba Israél z'a tshwèt mbite là. Be tshag yub kà njen mb'a be là.

¹⁴Bo lo' nkalig mbàa boa nyàmdiaṅe, mfen tum ntum num ntshùa ntshu ntsho ba Siria ntshob ndù: Bin nèn njene.

¹⁵Bo bwe ba Siria tà nèn nkum Yordan, njen ndù nzwe boa tshu ts'a tum bo ndùse bo ke nkù là dun num manze. Ntum bèn njam nsoṅ mfen yen nu là.

¹⁶Ndùlala ngô tum, ndag ntsha' ntùm mbàn ba Siria, kà kesoṅ ngefet nke ntsho ta' ndô nkàb, nkesoṅ nsa mbàa tsho ta' ndô nkàb, mba Tshùaben na' ntshob là.

¹⁷Mfen lo yab kwùntshaṅ z'a ke njé'te num i là ntshu nsém. Ngô nyiaṅt'é nku ntshu nsém k'a kwù, ndaṅndaṅ mba mèn Nsi tshob ndùse mfen na' nswe' nse' mbaṅ i là.

¹⁸A lo be kua' ndùse mèn Nsi na' ntshob mfen ndù nkesoṅ nsa nsi tsho ta' ndô nkàb, kesoṅ ngefet tsho ta' ndô nkàb num lèn yen ngelaṅ ni ndamnjù, ntshu nsém Samaria là,

¹⁹kwùntshaṅ bùnte mèn Nsi ntshob ndù: Tshùaben lo ntsho' be ntôndà mfe kamànyam mb'a be lèn yen nu li bumt'à? Ndùlala Elisa lo tshob yi ndù: O nsi yen yen nu là kua' miag mu, là, o ke nsi zwi'te ju bwe.

²⁰A tum num i be ndaṅndaṅ. Ngô nyiaṅt'é nku ntshu nsém, a kwù.