Read Medumba 2 Fenfen 8 Bible Online

2 Fenfen 8 - Medumba bible

2 Fenfen 8

¹Elisa tshob mènnzwi z'a na' mbam nshum i num vù là ndù: Lo nsi, bin tunndà o nèn ntswe mba yà lo z'a fà bu wù là. Nummbe Tshùaben nsi lo' nziku' se' yi ntùm ngô, nziku' là nsi tswe ntùm ngô ngu'njù sammbàa.

²Mènnzwi là lo nsi ngù ndaṅndaṅ mba Mèn Nsi tshob là. A nèn bo tunndà i, ntswe ntùm ngô Filistia ngu'njù sammbàa.

³Ngu'njù sammbàa be tôge, mènnzwi là fe ntùm ngô Filistia. A nèn mbwe mfen nele't'é num nu ba' i bo nà i.

⁴A lo be be mfen nke ntshobte bo Guéhazi ngafa' mèn Nsi, nke mbètt'é ndù: Netsho'o, soṅ àm tshu ndùbndùb tse Elisa na' ngù là.

⁵Ndùs'a ke nsoṅ mfen mba Elisa na' ngù fe mèn lo num vù là, mènnzwi ze Elisa bam nshum i num vù là se' nele'te mfen num nu ba' i bo nà i. Ndùlala Guéhazi tshob ndù: Wù mfen àm, tshù mènnzwi mbit ze Elisa bam nshum i num vù li bo nshum i mbile.

⁶Mfen bètte mènnzwi là, a soṅ i tshô. Ndùlala mfen fà ta' nkim ntshwèt yi, ntshob nkim ntshwèt là ndù: Ghù bo ba' mba ke lo z'a be ze yen mènnzwi li là yi, boa njoṅ tshu fa ts'a num nà i là, neto' fe lé'njù s'a tum ntùm ngô là tà nse' nkum sènni.

⁷Elisa nèn Damas. Ben-Hadad mfen Siria lo ke ngone. Bo te bu num mfen ntshob ndù: Mèn Nsi se' tà nkum nsen ni.

⁸Mfen tshob Hazaél ndù: Lo nsi ndo' nda' nèn bin mèn Nsi bumte. Ghù a bètte Tshùaben mbe ze me nsi lo num yen ngokèt li là.

⁹Hazaél nèn mbwe Elisa, mbe nèn ndo' njoṅ tshu ntùn fa ts'a be Damas là. A be njoṅ ju ze be kamél ṅam nkuà ket là. Ndùs'a kum bwe là, a nèn mbwe Elisa ntshob yi ndù: A nshum o Ben-Hadad bèn ntum àm ndù me se' mbètt'o mbe z'a nsi lo num ngokèl i là.

¹⁰Elisa bùnte yi ndù: Nèn ntshob yi ndù a nsi lo num ngokèl i. Là, Tshùaben la'te me ndù a nsi kwù.

¹¹Mèn Nsi te lag num Hazaél, ndôt'é num ngelaṅ yàme, nkua'a,

¹²Hazaél tshob ndù: Numke tshùaben àm nke nkua' à? Elisa tshob ndù: A b'a nummbe me lèn nge' z'o nsi yab num bon Israél là. O nsi te mbwôg num ntusô mub mi kàbngô diaṅ i mbum nà. O nsi lo' ṅwi zwite tse bonnshum yi, zwite tse bon bônke', to bam tshob bènnzwi jùm.

¹³Hazaél bùnte ndù: Ngafa' o z'a b'a mba mén mbù là b'a ke, kà nku'ni neghù lèn tshen màmà tshu li à? Elisa tshob ndù: Tshùaben la'te me mb'o nsi be mfen Siria.

¹⁴Hazaél lo mbaṅ Elisa, mbèn njam mbaṅ tàfa' i; mfen bètt'é ndù: Elisa tshob wù mbe ke? Hazaél bùnte ndù: O nsi lo num yu ngokèt.

¹⁵A be ndamnjù Hazaél lo' belangé nyu' ntùm ntse, nyitte num se mfen, a kwù. Hazaél tô num ze dù'.

¹⁶A lo be kum ngu'njù tàn mba Yoram nshum Akab be mfen Israél là, Yoram nshum Yosafat be mfen Yuda.

¹⁷A lo be jù fen ndù a ghù ngu'njù ntshob bàa ṅam ntat; a tswe Yérusalém, ntô ngô ngu'njù fome.

¹⁸A zin num nze fenfen Israél, ndaṅndaṅ mba tunndà Akab là, nummbe nzwi i na' mb'a ngon Akab. A ghù nukebwô num miag Tshùaben.

¹⁹Là Tshùaben ke kô nesate Yuda num lén ngafa' i David, mba num nka'ni mi a na' nka' yi ndù a' ke mfà ta' nka' netèt nshumnshum tse njoṅ ndù fa là.

²⁰A lo be num ze ngelaṅ Yoram Edom kam ntanta, ngom ze mfen.

²¹Yoram tshùa Tsair boa njoṅ nkalig mi fa; mb'a lo nsi nkebnjù là, a lab ba Edom tse bo lam i mbum nà boa tàndà ntsho nkalige, ndùlala ngô kù nèn ntùm tse ntàb.

²²Ntanta z'a netèt Edom bo Nsa'ngô Yuda là ke' tà nse' nkum sènni. Mba Libna kam ntanta be num yen ngelaṅ nà.

²³Tshé' mfa' Yoram, boa tshu ts'a ghù là, bo kite njoṅ i fa ntùm ṅwa'ni Kronika fenfen Yuda.

²⁴Yoram nèn ntèt tà tse, bo tshoṅ i mbaṅ tà tse tusô David. Akazia nshum i tô num ze dù'.

²⁵A lo be kum ngu'njù ntshob bàa gham mba Yoram nshum Akab be mfen Israél là, Akazia nshum Yoram be mfen Yuda.

²⁶Akazia lo be jù fen ndù a ghù ngu'njù ntshob bàa ṅam mbàa. A tswe Yérusalém, ntô num ta' tamngu'. Lén màab na' mb'a Atalia, mbe ngon Omri mfen Israél.

²⁷A zin num nze tunndà Akab, ngù nukebwô num miag Tshùaben mba tunndà Akab là, nummbe bo tunndà Akab lo tshùa ntùm nu nandà mbe shune.

²⁸Bo Yoram nshum Akab ma' Hazaél mfen Siria ntsho Ramot z'a b'a dù' tsha' Galad là. Ba Siria kag mfaṅ num Yoram.

²⁹Mfen Yoram bèn Yizréel netshwinte mfaṅ ba Siria kag num i Rama ndùs'a ke ma' Hazaél mfen Siria ntsho là. Akazia nshum Yoram, mfen Yuda swe' nèn lôte Yoram nshum Akab Yizréel, nummb'a lo ke ngone.