Read Medumba 2 Fenfen 9 Bible Online

2 Fenfen 9 - Medumba bible

2 Fenfen 9

¹Elisa, ngatshob ntshob Nsi, tsiaṅ mo' nshum ba ghatshob ntshob Nsi ntshob yi ndù: Taṅ kob tun o, ndo' yen ndô mfèt li nèn Ramot z'a b'a dù' tsha' Galad là.

²Ndùs'o nsi kum bwe là, o nèn njen Yéhu nshum Yosafat, nshum Nimshi. O nsi nèn sô i netèt fèt tse, lo' i nèn yi ntùm ta' to'ndà njamnjam.

³O nsi lo' ndô mfèt, naṅ num tu i tshob ndù: Tshù ju ze Tshùaben tshob li: Me yo' o mfen Israél! Yen nà mbe tôg o tsho' nzendà ntum nkù, ke tsin manze.

⁴Ménnshum nà, ngafa' ngatshob ntshob Nsi nèn Ramot z'a be dù' tsha' Galad là.

⁵Ndùs'a kum bwe là, a yen tàndà ntsho ndù bo tswete nsi. A tshob ndù: Tàndà ntsho, me ghù ju netshob wù: Yéhu tshob ndù: A zit mèn netèt njoṅ yag fa à? A bùnte ndù: Me tshob a wù, me tàndà ntsho.

⁶Yéhu lo nsi ntsho ntùm ndà, yen ménnshum ni naṅ mfèt tu i ntshob yi ndù: Tshù ju ze Tshùaben Nsi Israél tshob li: Me yo' o mfen Israél, nzwit mèn Tshùaben.

⁷O nsi lab tunndà Akab, tàfa' o, me yagte mba' lem ghafa' tshàm ghatshob ntshob Nsi bo lem njoṅ ghafa' Tshùaben fa num Yézabél.

⁸Njoṅ tunndà Akab fa nsi bi. Me nsi biagte mba we lo z'a b'a ze mèn Akab là, nkuan bo ménla' ntùm ngô Israél.

⁹Me nsi ghù tunndà Akab tù' mba ze Yéroboam nshum Nebat, bo tunndà Baesha nshum Akiya là.

¹⁰Mbù nsi fèt Yézabél tshwèt Yizréel; sàm mèn ke nsi tshoṅ i. Yen nà be tôg ménnshum nà tsho' nzendà nkù nène.

¹¹Ndùlala Yéhu tum nèn mbaṅ ghafa' tàfa' i, bo tshob yi ndù: Tshô fi mebwô ké? Yen mbabun nà se' mbaṅ o à numke? Yéhu bùnte ndù: Bin lèn yen mèn nà, mbèn ndèn ju z'a b'a tshob là.

¹²Bo bùnte ndù: Tatte, tshù mba bag bùnte là! Yéhu tshob ndù: A tshob bon ntshob me, ntshob ndù: Tshù ju ze Tshùaben tshob li: Me yo' o mfen Israél.

¹³Be ndùse, mba we lo netèt bo lo' kummbaṅ se njab tun nku mi tù tuko', ntô nta ntshob ndù: Yéhu b'a mfen Israél.

¹⁴Ndùlala Yéhu nshum Yosafat, nshum Nimshi lèn ntsham Yoram. A lo be be ndù Yoram bo ngô Israél b'a tshwèt ntsho, netshètte Ramot z'a be dù' tsha' Galad là ntùm mbu Hazaél mfen Siria;

¹⁵mfen Yoram bèn njam Yizréel netshwinte mfaṅ tse ba Siria kag num i ndùs'a ke nde' Hazaél mfen Siria ntsho là. Yéhu tshob ndù: A be z'a mb'a ko' ntù o là, kà bam ndù sàm mèn tum tusô, nèn Yizréel nsoṅ tshô bwe.

¹⁶Yéhu ko' ntùm kalig se nèn Yizréel, nummbe Yoram na' mb'a bwe nke ngone; Akazia mfen Yuda lo swe' nèn bwe.

¹⁷Ntom z'a be num dù' netswe bwe mbéb ngô mà Yizréel là yen mba bwoṅ soyé Yéhu tshwèt nse' là, ntshob ndù: Me yen mo' bwoṅ soyé. Yoram tshob ndù: Lo' ta' ngako' nyàmdiaṅ ntum i mbwe bo, a bètte yub mbe ze bo lo' à fite nse' yi là.

¹⁸Ngako' nyàmdiaṅ nèn mbwe Yéhu ntshob ndù: Tshù ju ze mfen tshob li: A b'a num fite ké? Yéhu ndù: Fite ywimt'o à ke? Tshùa ntsin njam me. Ngabéb dù' tshob yen nu là ntshob ndù: Ngantum nèn tà nkum num bo, l'a ke' bèn njam.

¹⁹A tum mbatte ngako' nyàmdiaṅ bàa, a kum mbaṅ bo ntshob ndù: Tshù ju ze mfen tshob li: A num fite ké? Yéhu tshob ndù: Fite ywimt'o à ke? Tshùa ntsin njam me.

²⁰Ngabéb dù' tshob yen nu là ntshob ndù: A nèn tà nkum num bo, l'a ke' bèn njam. Mba nu tshwèt ndo' nse' yi là fut'a ze matnu Yéhu nshum Nimshi, nummbe mat nese' fut'a ze mat mbabune.

²¹Ndùlala Yoram tshob ndù: Nabte kalige! Bo nabte kalig se. Yoram mfen Israél bo Akazia mfen Yuda tum, mba we lo ko' ntùm se kalige, bo nèn mbwe Yéhu. Bo à bo bumte ntùm nà Nabot ze Yizréel.

²²Ndùse Yoram yoṅ njen Yéhu là, a tshob ndù: Yéhu, a num fite ké? Yéhu bùnte ndù: Ke di, fit'a, ndùse tse kat màan Yézabél boa nka mi ke' njàm nèn a be mbwe là ké?

²³Yoram kaṅ ntshu kalig nkù, ntshob Akazia ndù: Akazia, bo ze ntsham àm nà!

²⁴Là Yéhu lo' ngoṅkél i, ntam Yoram num nka'mvèn mi: Két tam ntù i ntôge, Yoram tum ngwù ntùm kalig se.

²⁵Yéhu tshob Bidkar ze tàndà ntsho ndù: Lo' i ma' ntùm nà Nabot ze Yizréel; nummb'a bwô o kwimte ndùse bag wù na' mbe num nyàmdiaṅ njam tàab Akab là; Tshùaben lo tshob yen nu li num i ndù:

²⁶Me Tshùaben yen lem Nabot boa tse bon tse, tu wul àm, me nsi yagte yen nu là wù be nsen ni ntùm yen nà li. Ndùlala lo' i ma' ntùm nà Nabot mba Tshùaben na' ntshob là.

²⁷Akazia be yen ndùlala nkù ntshùa num manze ba' z'a be ntùm nka' là. Yéhu yab njam i, ntshob ndù: Bin lab mba yi ze ma' ntùm kalige. Bo lab i ndùs'a ke nko' Gur, mbaṅ Yibleam nà. A kù ndem Megiddo, nkwù bwe.

²⁸Ghafa' tse kel i mum kalig nèn yi Yérusalém, ntshoṅ i ntùm fi se mbaṅ tà tse, ntùm tusô David.

²⁹Akazia lo be be mfen Yuda ndù Yoram nshum Akab tswe num fen ngu'njù ntshob ntshù' gham.

³⁰Yéhu tsho Yizréel. Yézabél be ju' nse' miag mi, nkwi tu i, ntsin nke ndôte tôndà.

³¹Ndùse Yéhu ke ntôg nzendà là, a tshob ndù: A num fite ké Zimri ze nswe, ngazwi tàfa' i?

³²A bù' se i ndôte nze tôndà, ntshob ndù: We z'a be yàm mèn à? A we? Nkim ntshwèt bàa ke tat lo lôt'é, nèn mbaṅ i tôndà.

³³Yéhu tshob ndù bo lo' Yézabél ma' i mànsi. Bo ma' i mànsi lem tse tum nsa num kàbngô boa num ba nyàmdiaṅe. Yéhu nyiaṅt'é nku;

³⁴yen nà be tôge, a tsho ndà njù mbèn nu, ntshob ndù: Bin nèn ndôte ngandon nà ntshoṅ i, nummb'a b'a ngon mfen.

³⁵Bo nèn netshoṅ i, là, njen nda' katu i mba nku mi boa ntô mbu mi.

³⁶Bo bèn njam nsoṅ Yéhu, a tshob ndù: Tshùaben lo tshob yen nu là ngafa' i Elia ze Tisbite, ntshob ndù: Ba mbù nsi fèt mbàb Yézabél ntùm nà mà Yizréel;

³⁷fe Yézabél tù' ju netshab dù' yi num nà, ntùm nà mà Yizréel, kà mèn ke ku'ni nebèn ndèn ndù a b'a Yézabél.