Read Medumba 1 Kronika 12 Bible Online

1 Kronika 12 - Medumba bible

1 Kronika 12

¹Tshù ben tse bo na' nèn mbaṅ David Tsiklag ngelaṅ z'a ke nkù Saulo nshum Kis li. Bo b'a ba tsemo' benntùn netèt ba neta nduku tse bo ywimte i ngelaṅ ntsho là.

²Bo na' mb'a ghama' ndoṅ bu zwim mba bu kwéb mbèn mbe ghalaṅ ju nkét. Bo na' mb'a ben Benjamin ndù bo tum à netèt fèt Saulo.

³Mfen Ahiézer bo Yoash, tse nshum Shemaa ze Guibéa, Yéziél bo Pélet, tse nshum Azmavét, Béraka, Yéhu ze Anatot;

⁴Yishmaéya ze Gabaon, neta nduku netèt ben ntu ṅam ntat, mbe mfen ben ntu ṅam ntat,

⁵Yérémia, Yahaziél, Yohanan, Yozabad ze Guédéra;

⁶Eluzai: Yérimot, Béalia, Shemaria, Shepadia ze Harof;

⁷Elkana, Yikia, Azareél, Yoézer bo Yashobéam, Koreit,

⁸Yoéla bo Zébadia nshum Yéroam ze Guedor.

⁹Netèt ba Gadita, tsemo' neta nduku ghama' ntsho lo nèn ntèt David dù' z'a ke ntswe bwe num kônkwa là. Bo na' mb'a ghama' ntsho ndù bo lèn netshùb tshètntsho boa nkô, ndù bo fute ba ngwayit boa njuanyàm.

¹⁰Ezer, mfen: Abdia mbatt'é, Eliab, mbatte tat;

¹¹Mishamana, mbatte kuà, Yérémia mbatte tàn;

¹²Atai, mbatte ntôge; Eliél, mbatte sammbàa;

¹³Yohanan, mbatte fome; Elzabad, mbatte bwe'e;

¹⁴Yérémia, mbatte gham; Makbanai mbatte ntshob ntshù' gham;

¹⁵bo na' mb'a nshumnshum Gad, ba tàndà ntsho, ze ta' metsili ntshù' ku' nele' benntùn nkù; ze ndùb le' benntùn ntsha' mbùm nà.

¹⁶Tshù ben tse bo na' ndut Yordan num mbwe maṅwù ndùs'a na' ndun nja' nkaṅ mi, mbèn nta' ben tse bo ke ntswe yoṅ ntumnyam bo yoṅ mbinyam nà.

¹⁷Mba tse bon Benjamin bo tse Yuda lo nèn mbaṅ David num ze dù'ntswe kônkwa.

¹⁸David tum nse' mbwe bo, ndo' ntshobe, ntshob bo ndù: a be ze bin se' à ntùm fite neywimt'àm nà, mba bag à bin b'a ntshu ntshù', là, a be ze bin nese' fùt'àm, swèn àm ghakeban tshàm, ndùse me ke' ghù sàm nkwate kebwô là, mb'a bwô ndù Nsi ba tà be yene, mbèn nkeb ntsha!

¹⁹Be ndùse, ywèt tsho num Amasai mfen benntùn ṅam ntat: David, nshum Isaï, a bwô ndù fite be wù, a bwô ndù kua' fite be wù. A bwô ndù fite be mèn z'a tshwèt njwimt'o là, nummbe Nsi o ywimt'o. David lo' yub ghùn, nte yub netèt fenfen ghasa' benntùn.

²⁰Tse ben Manasé yab njam David ngelaṅ ze boa ba Filistia ke nèn nema' Saulo ntsho là. Là, bo ke ywimte ba Filistia, nummbe ngelaṅ ben ndùbndùb ba Filistia na' nsiaṅte nu bo bo là, bo ta' David ntshob ndù: A' tsho mbèn ntam à njam tshùaben i Saulo ngù be vù ntsho.

²¹Ngelaṅ z'a bèn njam Tsiklag là, tshù ben Manasé tse bo tam njam i li: Adna, Yozabad, Yediaél, Mikaél, Yozabad, Eliu bo Tsiltai, fenfen ghatô ben ntsha' mbùm ju Manasé.

²²Bo ywimte David z'a be tàndà ntsho là, nummbe njoṅ yub fa na' mb'a ba neta nduku ntshùa ndùlala, ntù' ghatshagte ntsho.

²³Njoṅ lé'njù fa, bo nke nse' ywimte David tà nkum ngelaṅ ze yub ntshu ntsho na' njàm mba ze ntshu ntsho Nsi là.

²⁴Tshù njoṅ fenfen tse bo na' mfà tshu ntsho bo num ntshu ntsho li. Bo lo, nèn Hébron mbaṅ David num nekwé nufen Saulo mfà yi ndaṅndaṅ mba Tshùaben na' ntshob là.

²⁵Nshumnshum Yuda tse bo ghù tshètntsho mba nkô là, be ntu 6 800 num yub ntshu ntsho.

²⁶Nshumnshum Siméon, ba nduku ghama' ntsho be ntu 7 100.

²⁷Nshumnshum Lévi be ntu 4 600,

²⁸mbèn ngù Yéhoyada ze mèn Aron z'a na' nke ntshagte ben 3 700 là.

²⁹Mbèn ngù Tsadok, kua' nduku neta nguanmèn bo ze tunndà, be ntu ntshob bàa ṅam mbàa tse bo ke nsa' là.

³⁰Nshumnshum Benjamin, ben Saulo be ntu 3 000, nummbe, tà nse' nkum ndonni tse yàm netèt bo na' mb'a njam Saulo.

³¹Nshumnshum Efraim, kum benntùn ntùm tunndà yub be ba neta nduku 20 000.

³²Mo' bag tunndà Manasé be ben 18 000 tse bo na' ntsho'te yub ntum ndù bo nèn ngom David fen nà.

³³Nshumnshum Isakar, ghalèn ngelaṅ mba mfa' bon Israél, be fenfen ntu 200, mbe be fètfèt njoṅ yub fa.

³⁴Nshumnshum Zabulon be ntu 50 000 tse bo ku'ni neket tshu ntsho nèn yi tshwèt ntsho mbèn nku'ni nele' ntsho njoṅ ntù yub fa là.

³⁵Tse ben Néftali ghù ghatshagte ntsha' mbùm, mbèn ngù benntùn ntu 37 000 tse bo ghù tshètntsho mba nkô là.

³⁶Ben Dan tse bo ghù tshu nelo' nde' ntsho yi là be ntu 28600.

³⁷Tse Aser tse bo ku'ni nele' ntsho, mbèn nke nzin nka là be ntu 40 000.

³⁸Mbe kum yoṅ ntse Yordan, tse ben Rubèn tse Gad mba mo' bag nzwit tunndà Manasé boa njoṅ tshu ntsho fa be ntu 120 000.

³⁹Njoṅ tshen bwoṅ ghale' ntsho là fa tse bo na' nabte wut yub, ngù tshu ntsho, mbèn ngù ntù nelàn num nema' ntsho là, zin nkum Hébron, ndo' David ngom mfen yi netèt njoṅ ba Israél fa. Njoṅ tshé' ba Israél fa be ntshu ntshù' nelo' David ngù mfen yi netèt bo.

⁴⁰Bo tswe bwe lé'njù tat, nke njù mbèn nke nu nummbe fèt tshob lo nabte jujù bo.

⁴¹Mba ben tse bo ke ntswe mbaṅ bo fe num Isakar nèn nkum num Zabulon mba Néftali là, nke nket jujù num ba kekwène, ba kamél mba num tamte mén kekwèn bo nyàmdiaṅe, mba ba nyàmna' nke nse' yi. A fà bu bo nejù bàn, nefinte ntàm mbatsi bo ntàm tù ndu' mba ndu', mba mfèt, mba bontsit nyàm mba tse ndùbndùb yàme, nummbe Israél na' mb'a ntùm tsiaṅte.