Read Medumba 1 Kronika 14 Bible Online

1 Kronika 14 - Medumba bible

1 Kronika 14

¹Hiram, mfen Tiro tum benntùn David, ntum ntshwèn sédra. A tum mba ghatshua'te ndoṅ boa ghalo' tuba' yi, num nekut ta' ba'.

²Ndùlala David lèn ndù Tshùaben tshwèt ngù fen se nke ngum ntùm ngô Israél. Nummb'a lo ke ngù nufen i nke ntshùa njam ze nzwit mèn Israél nke nkuni.

³David so bènnzwi Yérusalém, mbwe tsemo' nshum boa ngon.

⁴Tshù ndèn nshum tse bo bwe yi Yérusalém ni: Shammua, Shobab, Natan, Salomon,

⁵Yibar, Elishua, Elfélét,

⁶Noga, Nefég, Yafia,

⁷Elishama, Beéliada bo Elifélét.

⁸Ba Filistia ju' ndù bo yo' David fen num njoṅ ba Israél fa, ndùlala bo ko' nèn num i. Bo soṅ David yen nu là, a lo nèn mbwe bo.

⁹Ba Filistia kum, nsa ntùm tômbo' ben Refaim.

¹⁰David bètte Nsi nu ntshob ndù: Me nsi ko' nèn num ba Filistia ké? O nsi swèn yub mum mbu màm ké? Tshùaben bùnte yi ndù: Ko'o, m'a' swèn yub mum mbu mu.

¹¹Bo ko' nèn Baal-Pératsim, dù' ze David tshùa yub ntsho là. A bèn ntshob ndù: Nsi sate ghakeban tshàm, ntshùa njam bu àm, a sate yub bo nèn à mba ntse num mbùn nèn nà. A ndùlala ze bo tswi lén dù' là ndù Baal-Pératsim nà.

¹²Bo ghua' nsi tshob bwe, David tshob bo ton tshen nsi là mbwôge.

¹³Ba Filistia sate ntùm tômbo' mo' yoṅ i.

¹⁴David bèn mbètte Nsi nu. Nsi bùnte yi ndù: O ke nsi ko' à njam bo; lo njam bo, o nsi tum num bo à se se, mbwe ntù mbù.

¹⁵Ndùs'o nsi ju' nze ntshùa ju mfe num tshaṅ mbù là, mb'a bwô ndù o tum nde' ntsho, nummbe mb'a b'a Nsi bèn nke nzin mbwe o nebiagte ntshu ntsho ba Filistia.

¹⁶David ghù ju ze Nsi tshob yi là, ntshùa ntshu ntsho ba Filistia neto' Gabaon nèn nkum Guézer.

¹⁷Lén David ju'ni, nsa ntùm ngôngô fa, Tshùaben ghù a tum kuni mèn num miag njoṅ ngôngô fa.