Read Medumba 1 Kronika 22 Bible Online

1 Kronika 22 - Medumba bible

1 Kronika 22

¹David tshob ndù: Ndà Tshùaben Nsi a' be nsen ni. Tômbwôg neton ba nyàm bwe nsi be nsen ni num ze tu Israél.

²David tshob bo kùmte ba ghùn tse bo be ntùm ngô Israél là. A tshob ghatshua'te ndoṅ ndù bo nabte ndoṅ ntshua'te bo lo' nkut Ndà Nsi yi.

³A tse'te mba tùne, mi ntùn nekwim ba mbatndà boa mi nelo' mfét ju yi. A ghù tùn fôgtab yàm kà nefi' sag mènntùn.

⁴Ntshwèn ntù sédra yàm nga' mbu, nummbe ba Tiro boa ba Sidon lo fà ntshwèn sédra David kua' yàm yàme.

⁵David lo ke ntshob ndù: Nshum àm Salomon ke' à mônke', ngu'njù tse bèn nkag neshu; ba' ze bo nsi kut Tshùaben nà nsi b'a ze ndùb, lén se ju'ni, a be ba' nenyàmte ntùm njoṅ ngô fa; a ndùlala, me kô nenabte tshu tse kua' mebwô. David nabte tshu ba' là yàm kà nkwù.

⁶David tsiaṅ nshum i Salomon ntshob yi ndù a kut ta' ba' Tshùaben, Nsi Israél.

⁷David tshob Salomon ndù: Nshum àm, me lo ghù nkwate nekut ta' ba' num lén Tshùaben Nsi àm.

⁸Là Tshùaben tshob me ndù: O fètte lem yàme, o ma' ntsho ndùbndùb; o ke nsi kut ta' ba' num lén sàm, nummb'o fètte lem yàm mbwe àm num nsitsha'a.

⁹Tshù, o nsi ghù ta' ménnshum, a be mèn z'a nsi ghù fite là. Me nsi fà fite yi, tshu' i mum mbu ghakeban tse fa, tse bo diaṅ i mbum nà; nummbe lén se nsi b'a Salomon. Me nsi ghù fite bo mbétni be Israél num ze ngelaṅ yôg.

¹⁰A b'a yi nsi bèn kut ta' ba' num lén sàm. A nsi be nshum àm, tu wul àm be tàab, me nsi ghù diaṅkwa se fen ghum nsi ntùm ngô Israél matmat.

¹¹Nshum àm, ndonni a bwô ndù bin Tshùaben bèn mbe, ndù o sine, nkut ba' Tshùaben Nsi o, mb'a na' ntshob mfà num o là!

¹²A bwô nda' ndù Tshùaben fà zenu bo nesiaṅte wù, ngù o tô Israél, nke nze ntshù' Tshùaben Nsi o.

¹³A be ndùlala mb'o nsi sine, a be z'o ke nze ntshù' boa ntag mi Tshùaben na' nkite Mosé ndù a fà Israél là. Fèn ntù, ngom wul o, kà bwôg, ke bèn mvètte.

¹⁴Tshù, me kagtùn nabte bon tshu num ba' Tshùaben: Talaṅto gol ntsha' mbùm, talaṅto silba ta' ntshu', ngù tùn fôgtab bo tùne, a yàm kà mènntùn ke ku'ni nefi'i, nummb'a yàm neshu. Me nabte mba ntshwèn boa ndoṅ; a bwô ndù o bèn nkwi'te.

¹⁵O ghù ghafa' mbaṅ o yàme, ghatshua'te ndoṅ, ghalo' tuba', boa ghave tse bo lèn nzenze mfa' là.

¹⁶Gol, silba, tùn fôgtab bo tùn yàm wù nsi neshu. Lo nsi mfa' fa'; a bwô ndù bin Tshùaben bèn mbe.

¹⁷David tshob fenfen Israél fa ndù bo ywimte nshum i Salomon.

¹⁸Bin à Tshùaben Nsi zin ke bèn mbe ké? A ke' fà fite bin njoṅ bag tse fa ké? Tshù, a lo swèn ba ntùm ngô mum mbu màm, ngô bèn mbam nte' mbwe Tshùaben mba mbwe ze nzwit mèn.

¹⁹Ndonni a bwô bin yab ntù zin bo zwiag sin neke ndiag Tshùaben Nsi zin. Bin lo nsi nkut dù' nelàn Tshùaben Nsi, ndo' Koṅ Kàn boa tshundà tse bo yab Nsi là, nèn ntete ntùm ba' ze bo nsi kut num lén Tshùaben nà.