Read Medumba 1 Kronika 28 Bible Online

1 Kronika 28 - Medumba bible

1 Kronika 28

¹David tse'te njoṅ fenfen Israél fa Yérusalém: Fenfen tunndà, tse nkamnkam benntùn, tse bo ke mfa' fa' mfen nà, fenfen benntùn ntsha' mbùm boa tse benntùn nkù, ghalôte njoṅ tshu mfen boa tse bo num ndôte nyàm mfen boa tse nshum mfen nà, ghafa' tse bo be ntshufe' là, tàndà ba neta nduku fa.

²Mfen David lo ntsin tù num nku mi ntshob ndù: Fèt tshàm, ngô àm, bin ju' àm! Me lo jù' nekut ba' nete Koṅ Kàn Tshùaben bwe a fite, mba nekut nko' nku Nsi be; ndùlala me nke nabte wut kut yen ba' là.

³Là Nsi tshob me ndù: O ke nsi kut ta' ba' num lén sàm, nummb'o b'a ngama' ntsho, mbe ndù o fètte lem.

⁴Tshùaben, Nsi Israél lo tsho' àm ntùm tunndà tàa, ndù me be mfen Israél njoṅ ndù fa; nummb'a lo tsho' Yuda ngù mfen yi, ntsho' ze tunndà tàa ntùm tunndà Yuda. A lo se' netèt tse nshum tàa ntsho' à me, nkô ndù me bèn ntô num njoṅ ba Israél fa.

⁵A nèn netèt tshàm nshum ntsho' nshum àm Salomon num netswe num diaṅkwa nufen Tshùaben, num njoṅ ba Israél fa. Tshù, Tshùaben lo fà nshumnshum me yàme.

⁶A lo tshob me ndù: Nshum o Salomon a' kut ta' ba' me boa bam ntshundà tse; nummbe me tsho' i ngù yàm nshum yi, mbe ndù me nsi be ze tà.

⁷Me nsi ghù ze nufen ghum nsi matmat, a be z'a ke' sô wul i num neke nze ntshù' màm boa ntag màm mba ndonni là.

⁸Ndonni, a bwô bag bin ze njoṅ ntshù' Nsi be fa, nummbe be b'a mbwe njoṅ ba Israél fa, mbwe Nsi ben z'a tshwèt nju' mba be tshob là. A nsi tshùa ndùlala mbwô ngô li ghô be, be tshag mbe tôg ze be mfaṅ tse be nshum matmat.

⁹Wù nshum àm Salomon, lèn Nsi tàan nke mfa' yi ntùm nenùne, ntùm ntù ntshù', nummbe Tshùaben num ntswe' ntun num ntù benntùn fa, nke ntswe' ntun mba num ntàmtenu ywèle. A be z'o diag i là, mb'a nsi la'te wul i wù; là, a be z'o wag i là, mb'a nsi ghua' o matmat.

¹⁰Ndùlala bàm nà, ndèn ndonni ndù Tshùaben tsho' o, ndùlala ndù o kut ta' ba', a be dù' nelàne. Ghù tànntù nto' fa'.

¹¹David fà netshaṅ lèn ba' ze bo nsi kut là nshum i Salomon: Lèn nzendà, boa mba', nto'ndà junkàb, nto'ndà mi a mfe tù là, nto'ndà mi ntùm ndà bo to'ndà kabte Koṅ.

¹²A fà netshaṅ mba ke lo z'a kwate tu i, a kwag tse bam ntshundà ba' Tshùaben nà yi, njoṅ nto'ndà tshunkàb fa mi njam njù num tshunkàb ndà Nsi bo tshunkàb dù' nelàne,

¹³ts'a kwag nkamnkam ghafà tshule'te boa ben Lévi là, njoṅ mba ke lo z'a lôte fa' ndà Tshùaben nà, boa njoṅ tshu ndà fa num fa' ndà Tshùaben.

¹⁴David fà lèn tshundà gol Salomon, boa njoṅ mfi' gol z'a nsi ghù là, num njoṅ tshundà mba sit fa' lo; mfà lèn tshundà silba boa njoṅ mfi' silba z'a nsi ghù là, num njoṅ tshundà mba sit fa' lo.

¹⁵A fà njoṅ mfi' z'a bwô ndù tshu neghette ndambo bwe lèt là. Tshen tshu là boa ndambo b'a gol fafa. Mba zit ju neghette ndambo bwe lo lo ghù mfi' nelèle, boa mi ndambo. A fà mba mfi' mb'a bwô ndù tshu neghette ndambo, tse bo lo' silba nabte yi lo' ndèt yi là. Mfà njoṅ ze mba zit ju neghette ndambo bwe boa ndambo mi nsi lèt là. Mba zit ju neghette ndambo bwe lo b'a mba bo num mfa' yi là.

¹⁶A fà gol yi mfi' z'a ku'ni num ntéblé bàn le'te là, mba num sit téblé lo; mfà silba yi num ntéblé silba.

¹⁷A fà lèn ndu'sob yi, ntu' boa nkob mi bo lo' gol nelàn nabte yi là; mfà lèn ntu' gol nelàne, bo njoṅ ze mba sit kob lo lét yi là, mfà lèn nkob silba bo njoṅ ze mba sit kob lo lèt là.

¹⁸Mfà lèn tômbwôg labinda se gol ze tonte la bo njoṅ z'a lèt là. A fà mba lèn kalig yi, ba kérubim gol tse bo num nsette mbàb mub ndo' nkabte Koṅ Kàn Tshùaben yi là.

¹⁹David tshob ndù: Njoṅ i fa, njoṅ bon ntote ntun mi fa, num yen netshaṅ ba' li b'a ndù kua' Tshùaben bèn nkite bu i. Yen nà bèn mfà nesiaṅte me.

²⁰David bèn ntshob nshum i Salomon ndù: Ghù tànntù nto' fa'; kà bwôg, ke vètte, nummbe bin Tshùaben Nsi, Nsi àm a' bèn mbe. A ke nsi faṅ o tù' wù, ke ghua' o, tà nkum ndùs'o miagte fa' num fa' ntùm ndà Tshùaben nà.

²¹Tshù nkamnkam ghafà tshule'te boa ben Lévi tse bo be num fa' ndà Tshùaben nà. O ghù ghave mba num sit fa' lo mbaṅ o. Bo ghù fùag wut num njoṅ mfa' fa. Mbèn mbe fenfen mba ngô tshwèt mbéb neghù mba ke lo z'o tshob là.