Read Medumba 1 Kronika 29 Bible Online

1 Kronika 29 - Medumba bible

1 Kronika 29

¹David tshob mbumte fa ndù: Nshum àm Salomon b'a ta' mén ntshù' ze Nsi tsho' là. A ke' à metshab mén, ndù ngu'njù tse fùage. Là, fa' s'a tshwèt mbéb i là b'a se ndùb. Nummbe yen ba' li ke' b'a ze mènntùn, là ze Tshùaben Nsi.

²Mba yàm tu wut là, me lo lab wul àm, nenabte bon tshu nekut ba' Nsi àm yi: nabte gol num fa' gol, silba num fa' silba, tùn meba num fa' tùn meba, tùn fôgtab num fa' tùn fôgtab, nabte ntshwèn num fa' ntshwèn, nabte ndoṅ neta boa ndoṅ neloṅ ntùm memo'o, ndoṅ netshab ndo' nkwi tshu yi, mi ntshù mi be nzenze là, nabte ndoṅ tanjoṅ nzenze boa ndoṅ mintsin fôgtab.

³Mba me kô nu ba' Nsi àm, njab ntù bwe neshu là, m'a' fà mba gol bo silba ze me bèn ngù, a be ko' yàm nà num ba' Nsi àm, njab njam njoṅ i fa ze me nabte num ba' dù' nelàn nà;

⁴talaṅto gol ntsha' tat, gol z'a fe Ofir là; talaṅto silba ntsha' sammbàa, silba ze bo ton nà, ndù bo lo' nkabte mfé' mba' yi.

⁵M'a' fà gol num fa' gol, mfà silba num fa' silba, num mfa' fa mi ghafa' nsi fa' là. We z'a bèn nkô nefà tsemo' tshu bwôntù Tshùaben sènni à?

⁶Fenfen ba tunndà tà, fenfen ba nzwit Israél, fenfen ben ntsha' mbùm, boa fenfen ben nkù, mba ghabéb tshu mfen fà tshu bwôntù mba bo kô là.

⁷Bo fà talaṅto gol ntsha' tàn num ba' Nsi, mfà talaṅto darik ntsha' gham, mfà talaṅto silba ntsha' gham, mfà talaṅto tùn fôgtab ntsha' gham, mfà talaṅto tùn ntsha' nkù.

⁸Ben tse bo ghù ndoṅ nà lo' nèn mfà mum mbu Yéhiél mèn Guershom, a yab ntùm junkàb ndà Tshùaben.

⁹Ngô tsiaṅte num tshu bwôntù tse bo fà mba bo kô là, nummbe bo na' ndo' à ntù mebwô mfà yi Tshùaben; mba mfen David ghù tsiaṅte ndùb ntùm ntù i.

¹⁰David nyàmte Tshùaben mbwe njoṅ mbumte fa, ntshob ndù: Bag nyàmt'o wù Tshùaben Nsi tà yag Israél matmat.

¹¹Tshùaben a bwô ndù nezi, neta bo nku'ni, neghô matmat bo ghamte be wù, nummbe ju z'a mfe kamànyam, num nsitsha' là o bèn ngù fa; Tshùaben, a bwô netô be wù nummb'o num ndo tù ntùm fen, nke ntô mba ke lo.

¹²Neghù ju bo ke mfe à wù, o bèn nke nsa' mba ke lo. Ngù' bo neta b'a bu o. Bu o bèn ngù mba' neke nga'te mbèn ngù njoṅ tshu fa taṅ nga.

¹³Ndonni me Nsi yag, bag nyàmt'o, nke ngamte lén so se nekuni.

¹⁴Me b'a we, ngô be we, kà bag ku'ni nefà tshen tshu bwôntù wù mba bag kô à? Njoṅ tshu fa ke mfe à wù, ju ze bag fà wù là, o bèn mfà bag.

¹⁵Bag be num miag mu à mba ba ghùn nà, mba ghatshùanze, ndaṅndaṅ mba tà tshag là; lé'njù tshag ke ntshùa à mba netshaṅ nà, sàm mèn ke ku'ni nekwimte.

¹⁶Tshùaben Nsi yag, njoṅ tshen tshunkàb li fa tse bag nabte nekut ta' ba' wù yi, num lén so se nelàn nà ke ntum à bu o, o bèn ngù njoṅ i fa.

¹⁷Nsi àm, me lèn o num ntswe' ntun num ntù, mbèn nke nkô nu ndaṅndaṅ; ndùlala me fà tshen tshu bwôntù li tse me kô là wù à ntù nenùne, ntùm ntù ndaṅndaṅ; ndonni ntù àm tsiaṅte neyen mba yu nzwit mèn be nsen ni nefà tse tshu bwôntù wù mb'a kô là.

¹⁸Tshùaben, Nsi Abraham, Isak mba Israél, tà tshag, kà bam ntù yu nzwit mèn tsho' num o, ghù lèn men nkwate ntùn nà be ntù i.

¹⁹Fà ntù nenùn nshum àm Salomon, num neke nze ntshù' mu, ntag mu boa nkàn mu, ndùlala ndù a ze njoṅ tshen tshu là fa, nkut ba' ze me nabte tshu tse là.

²⁰David tshob mbumte fa ndù: Bin nyàmte Tshùaben, Nsi zin. Mbumte nyàmte Tshùaben, Nsi tà tshobe. Bo vù nsi nte nkekwi' mub nsi mbwe Tshùaben mba mbwe mfen.

²¹Njù lo tshag mbe làne, bo fà jule'te bo nyàm bo ton Tshùaben nà: Mfot mfô ntsha' mbùm, nkomnjù ntsha' mbùm, njùmbwe ntsha' mbùm, boa ndu' mi bo ke naṅ nsi là, boa tsemo' tshule'te yàm yàm num tu Israél fa.

²²Bo jù mbèn nu mbwe Tshùaben ntùm tsiaṅte ndùb; bo ghom Salomon nshum David fen num mbatte bàa, njo' i mbwe Tshùaben mba mfen nà. Bo yo' Tsadok mba ngafà jule'te là.

²³Salomon tswe num diaṅkwa Tshùaben, ntù' mfen num dù' tàab David. Salomon sin, njoṅ ba Israél fa nke nju' ntshu i.

²⁴Njoṅ fenfen fa boa ba sa'nde', mba njoṅ tse nshum mfen David fa ju'ni mfen Salomon.

²⁵Tshùaben bù'te Salomon ntshag tà tù neshu num miag ba Israél, ngù se fen kuni ntshùa se fenfen fa tse bo be mbwe i ntùm ngô Israél là.

²⁶David nshum Isaï lo tô Israél fa.

²⁷A lo tô Israél ngu'njù ṅam nkuà. A tswe num fen Hébron ngu'njù sammbàa, ntswe num fen Yérusalém ngu'njù ntshob tat ṅam ntat.

²⁸A be kwù ndù a ywèn ntùm mebwô, ngu'njù tse tènte kua' yàme, fu' bo nkuni ke bwoṅ yi. Nshum i Salomon tô num ze dù'.

²⁹Mfa' mfen David, mbwe mi, boa mi njam, bo kite ntùm ṅwa'ni Samuél ngayente, ntùm ṅwa'ni ngatshob ntshob Nsi Natan mba ntùm ṅwa'ni Gad ngatshob ntshob Nsi.

³⁰Bo kite mba ze nufen boa ntsho ts'a le' là, ju z'a tôg num ze ngelaṅ, Israél ke ntùm njoṅ tsemo' nufen fa ntùm tsemo' ngô lo là.