Read Medumba 2 Kronika 10 Bible Online

2 Kronika 10 - Medumba bible

2 Kronika 10

¹Roboam nèn Sikém, nummbe njoṅ ba Israél fa lo se' Sikém num neghom i fen.

²Yéroboam nshum Nébat lo be ju' tshen nu là nke' à Egipto dù' z'a kù mfen Salomon nèn nke ntswe là.

³Bo tum bo nèn ntsiaṅ i; Yéroboam se' boa njoṅ ba Israél fa mbaṅ Roboam, ntshob yi ndù:

⁴Tàan lo ghù lèt ta num bag neshu. A bwô ndonni ndù o bù'te fa' tàan, ke ma'ni yag yi mba ndùse bag ke mfa' yi là. Sébte lèt num bag, bag nsi fa' wù.

⁵Roboam bùnte bo ndù: Bin nène, a be tshùa lé'njù tat bin se' njen àm. Ndùlala ngô lo nène.

⁶Mfen Roboam bètte ywèn benntùn tse bo na' mbe mbaṅ tàab Salomon num njoṅ yôg se fa là nu, ntshob ndù: Bin kwate ndù mbùn ntshob mi me nsi fà ngô là b'a mil à?

⁷Tshù ju ze bo tshob yi li: Sènni, a be z'o fa' fa' mebwô num ngô, a be z'o kôgte nge' num bo, a be z'o fà mbùn ntshob ntùn bo là, mba bo nsi be ghafa' tsho matmat.

⁸Là, Roboam faṅ ntag mi ywèn benntùn fà yi là nsi, mbètte mi ntag ghuan benntùn boa bo na' nku'u, tse bo kùmte mbaṅ i là.

⁹A tshob bo ndù: Bin kwate ndù me nsi fà à mit mbùn ntshob ngô à? Ngô bètt'àm ndù: Tsho'te lèt num mfa' mi tàan na' nke njé' num bag là.

¹⁰Ghuan benntùn bùnte ntshob yi ndù: Tshob ngô z'a bètt'o ndù o tsho'te lèt num mfa' mi tàan yé'te num bo là ndù: Metsit ntu bu àm zi ntshùa zwe' tàa.

¹¹Ndonni, me nsi kwi'te lèt ze tàa na' njab num bin nà, a bèn ndèt ntshùate. Tàa lo lab zin nshua' banban, tu wul àm nsi lab zin nshua' mi a ghù njô là.

¹²Yéroboam boa njoṅ ngô fa bèn njam mbaṅ mfen num mbatte lé'njù tat, mb'a na' ntshob là, nummb'a lo tshob mb'a be tôg lé'njù tat bo se'.

¹³Mfen bùnte nu ngô neta neshu. A faṅ ntag mi ywèn benntùn fà yi là nsi,

¹⁴ntshob à be kua' ntag mi ghuan benntùn tshob yi là, ntshob ngô ndù: Tàa lo yab lèt num bin, tu wul àm me nsi kwi'te lèt num bin, a bèn ndèt zin ntshùate. A lo lab zin nshua' banban, tu wul àm nsi lab zin nshua' mi a ghù njô là.

¹⁵Ndùlala mfen ke ju' ntshu ngô; nummbe Tshùaben na' mbèn ntshagte yen nu là, ndùlala ndù ntshob mi Tshùaben tshùa num ntshu Akiya ze Silo ntshob Yéroboam nshum Nébat là bumte.

¹⁶Ngelaṅ njoṅ ba Israél fa yen ndù mfen ke' ju' ju ze bo tshob là, bo bùnte yi ndù: Bag à David num mo' nu ké? Bag ke'ghù ntsi' num mi nshum Isaï. Israél bèn njam ntùm tse ntàb ndonni, David bèn lab wut num ze tunndà. Ndùlala Israél bèn njam ntùm tse ntàb.

¹⁷Là Roboam tô bon Israél tse bo ke ntswe ntùm ntusô Yuda là.

¹⁸Mfen Roboam tum Hadoram ze bo na' njab i num njoṅ nu mfa' njôgmasi fa là. Là, njoṅ ba Israél fa tamt'é ndoṅ, a kwù. Ndùlala mfen Roboam nànte nko' tù kalig nkù nèn Yérusalém.

¹⁹Tshù mba Israél na' nsô wul i num tunndà David tà nse' nkum sènni là.