Read Medumba 2 Kronika 13 Bible Online

2 Kronika 13 - Medumba bible

2 Kronika 13

¹A lo be kum mbatte ngu'njù ntshob fom gham mba Yéroboam be mfen nà, Abiya tô Yuda.

²A tswe Yérusalém ngu'njù tat, nke ntô. Màab Maaka b'a ngon Uriél ze Guibéa. Ntsho lo ke be tag netèt Abiya bo Yéroboam.

³Abiya lo' ta' ntshu ntsho ba neta nduku ghama' ntsho nkam ntanta yi. Bo na' mb'a ben ntsha' nkù kuà ndù bo netsho'te yube. Yéroboam tsho tshwèt ntsho boa ben ntsha' nkù fome ts'a tsho'te là, bo b'a ba neta nduku, ghama' ntsho.

⁴Abiya tsin mfe tu mbat Tsemaraim z'a b'a mo' bag mbat Efraim nà ntshob ndù: Bin ju' me Yéroboam boa njoṅ ba Israél fa!

⁵A lo mbwô bin lèn Tshùaben, Nsi Israél lo fà fen David matmat num ba Israél fa, ke b'a nda' yi, là mba njoṅ tse nshum fa. A lo wat kàn se b'a ke bate là num yen nu là.

⁶Là Yéroboam nshum Nébat, ngafa' Salomon, nshum David lo ta tu tàfa' i.

⁷Ben banban, ben kebwô lo tse'te mbaṅ Yéroboam ndo' i ngù mfen yi num dù' Roboam nshum Salomon. Roboam lo ke' à mén, nke mbwôge, ke ghù neta mbwe bo.

⁸Ndonni bin kwate mbe bin a' yob ngu' num nufen Tshùaben, z'a be ntùm mbu tse nshum David là; bin yàm neshu, ngù ba mfô gol tse Yéroboam nabte bin ghù nsi yi là.

⁹Bin lo gha ghafà tshule'te, tse nshum Aron boa ben Lévi, ngù tsin ghafà tshule'te zin tu, mba benntùn tse bo ntùm tsemo' ngô là. Mba zit mèn no lo ke ndo' metshab fot mfô boa nkomnjù sammbàa nse' yi ndù bo yo' i, mb'a nsi tù' ngafà jule'te, ju z'a ke' b'a Nsi là.

¹⁰Mba bag là, Tshùaben bèn mbe yag Nsi, bag lo ke to' ghua' i, ghafà tshule'te tse bo ntùm fa' Tshùaben nà b'a tse nshum Aron boa ben Lévi tse bo num mfa' mub mfa' là.

¹¹Bag num nton ba nyàm Tshùaben mba zit nkebnjù bo mfetnjù lo, nke nton lamte labinda, nke njab bàn le'te num téblé se, se nelàne, nke nte mbwôg mba zit mfetnjù lo num ju neghette lambo bwe boa ndambo mi; nummbe bag num nze ntshù' Tshùaben Nsi yag. Mba bin nà, bin lo ghua' i.

¹²Bin yen mbe bag à Nsi mba tse ghafà tshule'te bèn mbe, bo bèn nkwé mbwe; bag ghù ba nta ts'a tshwèt ntshob ta là netô njam bin. Bon Israél! Kà bin ma' Tshùaben Nsi tà tsin ntsho, nummbe be bin ke zi ntshùa ntsho mba lé'njù ntshù'.

¹³Yéroboam tum num bo njamnjam, nummb'a lo lem benntùn nsi, tse soyé tù' b'a mbwe Yuda, nummbe soyé tù' diaṅ ntum à njam bo.

¹⁴Ba Yuda kaṅ wut yub, ntù' ke ma' ntsho à mbwe, mba njam. Bo kua' Tshùaben, ghafà tshule'te tô ba nta.

¹⁵Ba Yuda bu' ngoṅ ntsho, ba Yuda be ju' ngoṅ ntsho, Tshùaben lab Yéroboam mbwe Abiya bo Yuda, ndab Yéroboam kua' mbwe ba Israél.

¹⁶Bon Israél kù mbwe Yuda, Tshùaben swèn yub mum mbu mi.

¹⁷Abiya bo ze ngô yab nge' num bo, bo vù ntsho a bag neshu, ben ntsha' nkù tàn, netèt kum soyé vùte tshwèt ntsho netèt ba Israél nkwùte.

¹⁸Bon Israél vù nsi yen ngelaṅ nà, bon Yuda yob ngu'u, nummbe bo na' njé't'a num Tshùaben, Nsi tà tshobe.

¹⁹Abiya bwe njam Yéroboam kà ndo' ntusô yi, Bétél boa ntusô mi a ghebte là, Yéshana boa ntusô mi a ghebte là, Efron boa ntusô mi a ghebte là.

²⁰Yéroboam lo ke bèn ngù neta num ze ngelaṅ Abiya; Tshùaben lab i a kwù.

²¹Là, Abiya tù' nganeta; a so bènnzwi ntshob kuà gham, mbwe nshumnshum ntshob bàa ṅam mbàa boa ngonngon ntshob ntôg gham.

²²Tshé' mfa' Abiya, ju z'a ghù, ju z'a tshob là, bo kite ntùm ṅwate tshu tse ngatshob ntshob Nsi Iddo ghù là.

²³Abiya nèn ntèt tà tse, bo tshoṅ i ntùm tusô David. Nshum i Asa tô num ze dù'. Ngô lo tswe fite num ze ngelaṅ ngu'njù gham.