Read Medumba 2 Kronika 15 Bible Online

2 Kronika 15 - Medumba bible

2 Kronika 15

¹Ywèt Nsi tsho num Azaria nshum Obéd,

²a nèn mbwe Asa ntshob yi ndù: Asa, Yuda bo Benjamin, bin ju' me. A be ze bin so wut num Tshùaben nà mb'a' so wut num bin. A be ze bin diag i là mb'a' tswite wul i bin, là, bin ghua' i mb'a' ghua' zine.

³Israél a' yôg ngelaṅ yàm ke ghù Nsi nenùne, ke ghù ngafà jule'te z'a tswit'é là, ke ghù ntshù' Nsi.

⁴Là, ndùse bo nsi tswe ntùm ntobni, kaṅ wut lôte Tshùaben Nsi Israél diag i là, a' tswite wul i bo.

⁵Num tshen ngelaṅ nà, fite ke nsi be ben tse bo tshwèt nèn nke mfe là; nummbe va' yàm nsi lèt ntùm ngô.

⁶Mo' ngô nsi kam mo'o, mo' tusô kam mo'o, nummbe Nsi lo lo' ntobni yàm nyi'te yub yi.

⁷Ndùlala, bin so neta num bin, ke faṅ ndù mbu min yube, nummbe bin nsi ghù ntsho'fa' num mfa' mine.

⁸Ndùse Asa ju' men ntshob là bo ntshob ngatshob ntshob Nsi Obéd là, a ghù tànntù mbiagte njoṅ tshùaya'nu fa ntùm ngô Yuda mba ntùm ngô Benjamin, ntùm ntusô mi a lo' num mbat Efraim nà. A bèn mbù'te tômbwôg Tshùaben s'a be mbwe nzendà Tshùaben nà.

⁹Asa tse'te Yuda bo Benjamin, ben Efraim, ben Manasé boa tse Siméon tse bo ke ntswe netèt bo là; nummbe mo' kam ba Israél yàm lo tam njam i ndùse bo yen ndù Tshùaben Nsi lo ke sô wut num i là.

¹⁰Bo tse'te Yérusalém ntùm mbatte ṅwù tat mum ngu'njù ntshob tàn gham mba Asa be num fen nà.

¹¹Bo nèn num ntsha' ze bo se' yi là nsô nyàmna' boa mbwe ntsha' sammbàa bwe mfà tshule'te yi num sen lé'njù là.

¹²Bo ghù nka'ni neke ndiag Tshùaben, Nsi tà tshob njoṅ ntù yub fa bo njoṅ zwiag sob fa;

¹³mba we lo z'a ke nsi diag Tshùaben Nsi ba Israél là, k'a b'a mônke' ke ndùb lo, k'a mandum ke mènnzwi lo, mba bo a' zwi i.

¹⁴Bo tshag nze yub tù ntùm ngoṅ tsiaṅte, ntô nta boa mandô, nu ngu ndù bo nsi ke be nenùn mbwe Tshùaben.

¹⁵Njoṅ ba Yuda fa tsiaṅte num yen ngu là, nummbe bo lo nu ngu njoṅ ntù yub fa, ndiag Tshùaben mba bo ku'ni là, tà mfon i; Tshùaben fà fite bo num njoṅ bag tse fa.

¹⁶Mfen Asa kwé mba lén màbwengub màab Maaka, nummb'a lo ghù ta' neto num lén Astarté. Asa be'te ze neto, ntsham i t'a tù' a bwe tse, a nèn nton ntùm fub s'a Kédron nà.

¹⁷Là, ba mbwe' ke mi Israél fa, mba mba Asa yab ntù i fa num Nsi njoṅ ngelaṅ fa z'a ke njôg là.

¹⁸A yab tshu tse tàab mba ze tu wul i na' njo' là ntùm ndà Tshùaben: Silba, gol boa ntu'.

¹⁹Ngô lo ke le' ntsho tà nkum ndùse Asa tswe num fen ngu'njù ntshob tàn ṅam ntat là.