Read Medumba 2 Kronika 17 Bible Online

2 Kronika 17 - Medumba bible

2 Kronika 17

¹Yosafat nshum i tô num ze dù'. A nabte wul i ndo nsi num Israél.

²A yab ba soyé ntùm njoṅ ntusô Yuda fa mi bo kut ntsham ntsiag là, njab ba ntshu ntsho ntùm ngô Yuda boa ntusô Efraim mi Asa tàab na' ndo' là.

³Tshùaben be bo Yosafat, nummb'a lo zin à num tse mbwe nze tàab David, ke diag tse Baal;

⁴nummb'a tam à njam Nsi tàab, nzin à ntùm ntag mi, ke fi'te tse Israél num mba ke lo.

⁵Tshùaben ghù fen ghum ntùm mbu Yosafat, ba Yuda nke mfà ba tshu yi, a ghù fu' yàm bo ghamte.

⁶Ntù i ku' à ntùm manze nebwôg Tshùaben.

⁷A be ghù ngu'njù tat, mbètte tse fenfen, Ben-Hail, Abdia, Sakaria, Netanéel bo Mika ndù bo nèn ntswite ntùm ntusô Yuda.

⁸A tum yub à boa ben Lévi Shemaéya, Nétania, Zébadia, Asaél, Shemiramot, Yonatan, Adoniya, Tobiya bo Tob-Adoniya. Tshen ben ni b'a tse ben Lévi boa Elishama, Yoram ghafà tshule'te.

⁹Bo tswite ntùm mi ntusô Yuda, ntswit'a ṅwa'ni ntshù' Tshùaben. Bo zinte num tse manze ntusô Yuda fa, nke ntswite netèt benntùn.

¹⁰Bwôg Tshùaben ghom njoṅ nufen fa tse bo diaṅ Yuda mbum nà, bo ke ma' Yosafat ntsho.

¹¹Ba Filistia lo' ba tshu bo ntshub nse' mfà Yosafat; tshen tshu là na' mb'a silba; mba ba Arab se' mfà nyàm yi, nkomnjù ntsha' sammbàa nkù sammbàa, mfot mbwe ntsha' sammbàa nkù sammbàa.

¹²Yosafat lo ke nsine, nke nsin nèn à be mbwe. A kut zizi mba' mi a sag nèn tù là Yuda boa ntusô, ndo' ngù ndà nelem tshu bwe.

¹³A ghù bo fa' mfa' yàm ntùm ntusô Yuda. A lo ghù ba neta nduku soyé Yérusalém.

¹⁴Tshù mba bo siaṅ yube, mba tshob tunndà tà be li: Tse ben Yuda, fenfen ben ntsha' mbùm: Adna, mfen boa ben ntsha' nkù tat, ba neta nduku;

¹⁵mfen Yokanan be mbaṅ i boa ben ntsha' nkù bàa;

¹⁶Amasia nshum Zikri z'a na' nso wul i num Tshùaben be ze tu là be mbaṅ i boa ben ntsha' nkù bàa, ba neta nduku.

¹⁷Tse ben Benjamin: Eliada, neta nduku boa ben ntsha' nkù bàa, ndù bo tshùb ngoṅkét bo tshètntsho.

¹⁸Zozabad be mbaṅ i boa ben ntsha' bon fom nkù, ndù bo tshùb tshuntshùag num ntsho.

¹⁹Tshù ben tse bo ke mfa' mfen nà, ke siaṅ ben tse mfen yabte yub ntùm njoṅ ntusô Yuda fa mi bo kut ntsham ntsiag là.