Read Medumba 2 Kronika 18 Bible Online

2 Kronika 18 - Medumba bible

2 Kronika 18

¹Yosafat ghù fu' yàm bo ghamte, ntshùa njam nu nandà ntsho Akab shune.

²A be kum tsemo' ngu'njù, a swe' nèn mbaṅ Akab Samaria; Akab zwite ba mbwe boa nyàmna' yi mba num lén ngô bo be njam i là, mbètt'é ndù a ko' nèn Ramot z'a Galad là.

³Akab mfen Israél tshob Yosafat mfen Yuda ndù: O kô bag wù nèn Ramot z'a Galad là ké? Yosafat bùnte yi ndù: Me mba wù, yàm ngô mba yu, bag bin a' nèn nkam i ntsho.

⁴Yosafat bèn ntshob mfen Israél ndù: A mbe ndùlal'o bwôgmbwe mbètte Tshùaben.

⁵Mfen Israél kùmte ba ghatshob ntshob Nsi nguan benntùn nkù kuà ntshob bo ndù: Be me lo' ntsho ntsho yi Ramot z'a Galad là ké, ke me faṅ n'à? Bo tshob yi ndù: Mfen lo' ntsho nko' ntsho yi bwe, nummbe Nsi a' fà i wù.

⁶Là, Yosafat tshob ndù: Sàm ta' ngatshob ntshob Nsi Tshùaben ke' bèn mbe nsen ni, be tshùa njam i mbètte Tshùaben nu ké?

⁷Mfen Israél tshob Yosafat ndù: Ta' mèn ke' nsen ni ze be be tshùa njam i mbètte Tshùaben nu là; nda' ndù tu wul àm ke' be kô i, nummb'a ke' be tshob sàm nu ntùn num àm. A ke ntshob à be kebwô num àm. A b'a Mika nshum Yimla. Yosafat tshob ndù: Kà mfen tshob ndùlala.

⁸Ndùlala mfen Israél tum njabmfenkun ntshob yi ndù: Ghù Mika nshum Yimla se' nsen ni ndende.

⁹Mfen Israél bo Yosafat mfen Yuda lo tswe nsi num nsém mbaṅ ntshu mbu' ngô Samaria, mba we lo num se diaṅkwa, nket nzwe fen num bo. Njoṅ ghatshob ntshob Nsi fa nke ntàm ngàm bo.

¹⁰Tshù, Sédékia nshum Kenaana lo lo' ndô tùn nse' yi ntshob ndù: Tshùaben tshob mb'o nsi lo' men ndô li lab Siria yi kà biagt'é.

¹¹Njoṅ ghatshob ntshob Nsi fa nke ntshob be ju ntshù' ntshob ndù: Ko' nèn Ramot z'a Galad là, o nsi tshùa ntsho. Tshùaben nsi fà ngô ntùm mbu mfen.

¹²Ngantum z'a nèn tsiaṅ Mika là tshob yi ndù: Lèn mbe njoṅ ghatshob ntshob Nsi fa b'a ntshu ntshù', nke ntshob à nu ntùn mfen. A bwô ndù yu ngàm b'a mba ze mba we lo netèt bo là; tshob à numebwô num mfen.

¹³Mika bùnte ndù: Me lo' lén Tshùaben z'a be ntùn nà nkàn mfe yi ndù me nsi tshob à nu ze Nsi a' tshob me là.

¹⁴Ndùs'a kum mbaṅ mfen nà, mfen tshob yi ndù: Be bag kam Ramot z'a Galad là ntsho ké, ke me faṅ n'à? Mika bùnte yi ndù: Bin ko'o, bin nsi tshùa ntsho, bo nsi swèn yub ntùm mbu mine.

¹⁵Mfen tshob yi ndù: M'a' ghù o nu ngu a yoṅ si' ndù o nsi ke tshob à nenùn z'a fe Tshùaben nà m'à?

¹⁶Mika bùnte ndù: Me yen Israél ndù bo sate num ba mbat, mba mbwe tse ngabéb yub ke bwe là; Ndùlala Tshùaben tshob ndù: Tshen benntùn ni ke' ghù ngatshagte, a bwô ndù mba we lo bèn ndà i ntùm fite.

¹⁷Mfen Israél tshob Yosafat ndù: A ke' be tshob sàm nu ntùn me, a ke ntshob à be kebwô.

¹⁸Ndùlala Mika tshob ndù: Bin ju' ntshob Tshùaben ni! Me lo yen Tshùaben ndù a tswe num diaṅkwa se ntshu ntsho mfe kamànyam tsinte mbaṅ i bu zwim bo bu kwéb.

¹⁹Tshùaben tshob ndù: We z'a nsi lo' ntù Akab, a ko' nèn Ramot z'a Galad là, a tsho bwe mbi à? Bo bùnte ntshù' ntshù', mba we lo num ze mal i.

²⁰Mo' ywèt se' ntsin mbwe Tshùaben ntshob ndù: M'a' lo' ntù i. Tshùaben tshob yi ndù: O nsi ghù à ndùke?

²¹A bùnte ndù: Me nsi tume, be ywèt tatte mba ntshu zit ze ngatshob ntshob Nsi netèt tse ghatshob ntshob Nsi fa. Tshùaben tshob ndù: O nsi lo' ntù i tà nèn miagte, nèn ngù kua' ndùlala.

²²Tshù là, ndonni Tshùaben yab ywèt tatte ntshu njoṅ tsho ghatshob ntshob Nsi fa tse bo be nsen ni là. Tshùaben tshob kebwô num o.

²³Ndùlala Sédékia nshum Kenaana kù'te nse' mbaṅ Mika ntam bu toṅ i, ntshob ndù: Ywèt Tshùaben tum à yà num àm kà ntshob nu wù à?

²⁴Mika bùnte ndù: O nsi yen i lé'njù s'o ke tsho nto'ndà nto'ndà ke lem nà.

²⁵Mfen Israél tshob ndù: Lo' Mika nèn mfà Ammon, mfen tusô bo Yoas nshum mfen.

²⁶Bin tshob bo ndù bo ma' i ndàtsha, nke nkém i jujù bo ntse nge' tà nkum ndùse me nsi bèn njam ntùm fite là.

²⁷Mika tshob ndù: A be z'o bèn njam ntùm fite là mba Tshùaben ke' to' tshob me. A bèn ntshob ndù: A bwô ndù njoṅ ngô fa ju'u.

²⁸Mfen Israél bo Yosafat mfen Yuda ko' nèn Ramot z'a Galad là.

²⁹Mfen Israél tshob Yosafat ndù: M'a' kaṅ wul àm nèn tshwèt ntsho, l'a bwô tu wul o ma' nzwe tsho. Ndùlala mfen Israél kaṅ wul i bo nèn tshwèt ntsho.

³⁰Mfen Siria lo tshob tse ghatshagte nkalig ndù: Bin ke nsi kam mén ke ndùb lo, là bin nsi kam à nda' mfen Israél.

³¹Ndùse ghatshagte nkalig yen Yosafat là, bo tshob ndù: A b'a mfen Israél. Bo diaṅ i mbume, nekam ntsho. Yosafat bu' ngoṅ, Tshùaben ywimt'é. Nsi ghù bo lo mbaṅ i nène.

³²Ghatshagte nkalig be yen mb'a ke' b'a mfen Israél là, ntsin ngùanesà mbaṅ i.

³³Ndùlala mo' mandum sô két mbàn, ntam mfen Israél yi ke lèn, num yoṅte fat se. Mfen tshob mèn z'a ke ntshagte se kalig là ndù: Kaṅ wul o ngù me tum tshwèt nummbe bo lem àm.

³⁴Ntsho ta sen lé'njù là neshu. Kà mfen Israél ghô ntùm se kalig mbwe ba Siria tà nkum mfetnjù; a kwù mfetnjù ndùse nyam ke mbi là.