Read Medumba 2 Kronika 21 Bible Online

2 Kronika 21 - Medumba bible

2 Kronika 21

¹Yosafat nèn ntèt tà tse, bo tshoṅ i mbaṅ tà tse ntùm tusô David. Nshum i Yoram tô num ze dù'.

²Yoram lo ghù fèt tse, tse nshum Yosafat: Azaria, Yéhiél, Sakaria, Azaria, Mikaél bo Shéfatia; njoṅ yub fa b'a tse nshum Yosafat mfen Yuda.

³Tà yub lo fà tshu bo yàme, tse silba, tse gol, boa tshu tanjoṅ boa ntusô mi bo kut ntsham ntsiag là Yuda; nda' ndù mfaṅ fen à Yoram, nummb'a na' mb'a tuswe i.

⁴Ndùse Yoram jù fen tàab k'a ghum bu i là, a watte njoṅ fèt tse fa, mba kua' tsemo' fenfen Israél.

⁵Yoram lo be jù fen ndù a ghù ngu'njù fome, nke ntswe Yérusalém.

⁶A zin num manze fenfen Israél, ndaṅndaṅ mba tunndà Akab là, nummbe nzwi i na' mb'a ngon Akab. Yoram ghù nukebwô num miag Tshùaben.

⁷Là Tshùaben ke kô nesate tunndà David, mb'a num kàn se bo David wat là, mba num nka'ni z'a na' ngù yi ndù a' ke mfà nka' yi njoṅ ndù, mbèn mfà mba nshumnshum tse là.

⁸A lo be num ze ngelaṅ Yoram, Edom kam ntanta, ngom ze mfen.

⁹Yoram boa fenfen tse nèn, boa njoṅ nkalig mi fa. Mb'a lo nsi nkebnjù là, a lab ba Edom tse bo lam i mbum nà boa tàndà ntsho nkalige.

¹⁰Ntanta z'a netèt Edom bo nsa'ngô Yuda là ke' tà nse' nkum sènni. Mba Libna kam ntanta be num yen ngelaṅ nà num nsa'ngô Yuda, nummb'a lo ghua' Tshùaben, Nsi tà tse.

¹¹Yoram te mba ba mbwe' num ba tse mbat Yuda; a tènte ba Yérusalém bo tsho ntùm kat, a fùte Yuda.

¹²Mo' ṅwa'ni fe ngatshob ntshob Nsi Elia nse' yi, nke ntshob ntùm bwe ndù: Tshù mba Tshùaben Nsi David, tàan tshob li: Mb'o ke' zin num tse nze tàan Yosafat, num tse nze Asa mfen Yuda,

¹³là nzin à num ze nze fenfen Israél là, mb'o tènte Yuda boa ba Yérusalém bo tsho ntùm kat, mba tunndà Akab na' ngù num Israél là, mb'o zwite fèt tsho tse bo be benntùn ntshùa o, nzwite tunndà tàan nà;

¹⁴Tshùaben nsi lab yu ngô, a ket keko' ndùb; tsho nshum, zwi tsho, boa njoṅ tshu fa ts'o ghù là;

¹⁵mba wù là, a nsi lab o mo' tonte ghon, ngokèt bam, sen ghon nà nsi ke sin à be nesine, tà nkum ndùse mba' yen ngokèt là nsi sô tshu ts'a bam o tum yi là.

¹⁶Tshùaben tènte ba Filistia boa ba Arab tse bo be mbaṅ Etiopia là, bo lo nsi num Yoram.

¹⁷Bo ko' nse' num Yuda, nse ka bwe, ndag njoṅ tshunkàb fa ts'a be ndà mfen nà, ndo' tse nshum, zwi tse, k'a tù' à nda' nshum i Yoakaz, z'a ke' metsil i netèt tse nshum nà.

¹⁸Yen nà be tôg Tshùaben lab Yoram mo' tonte ngokèt bam ze fu se ke bwe là. Ghon nà nke nsin be nesine.

¹⁹A be kum mbatte ngu'njù bàa mba' yen ngokèt là sô tshu ts'a bam Yoram nà fa. A kwù à ntùm tonte sobni yàme. Ze ngô ke ton labinda num lén se mb'a na' ngù num lén tà tse là.

²⁰Yoram lo be jù fen ndù a ghù ngu'njù ntshob bàa ṅam ntat. A tô ngô ngu'njù fome, nke ntswe Yérusalém. A kwù sàm mèn ke tshàm; bo tshoṅ i ntùm tusô David, ke yôg mb'a ntùm mfi fenfen.