Read Medumba 2 Kronika 25 Bible Online

2 Kronika 25 - Medumba bible

2 Kronika 25

¹Amatsia lo be jù fen ndù a ghù ngu'njù ntshob tàn ṅam mbàa. A tô num ngu'njù ntshob bwe'e ṅam mbàa, nke ntswe Yérusalém. Lén màab na' mb'a Yoadan, mbe ngon Yérusalém.

²A ghù nu ndaṅndaṅ num miag Tshùaben, là ke yôg mb'a boa ngô ntù i fa.

³Ndùse fen na' ntsho bu i kua' mebwô là, a zwite ghafa' tse tse bo na' nzwi tàab mfen nà.

⁴Là, a ke zwite bon ghazwi benntùn, mb'a be ntùm ṅwa'ni ntshù' Mosé dù' ze Tshùaben fà sen kàn ni ndù: Bo ke nsi zwi ba tà num nu bon, ke zwi bon num nu ba tà là; nummb'a bwô ndù mba we lo kwù à be num ko' ze nukebwô.

⁵Amatsia tse'te ba Yuda njab yub à mba tshob tunndà tà be yi là, njab fenfen ben ntsha' mbùm boa fenfen ben nkù num njoṅ Yuda bo Benjamin fa; a siaṅ yube, neto' num ngu'njù ṅam mbàa mba tse bo tôgte là, bo tum ben ntsha' nkù tat tse bo ku'ni netshùb tshu ntsho, nsab kô, nket tshètntsho là.

⁶A bèn ndo' ba neta nduku ben ntsha' nkù netèt ba Israél num talaṅto nkàb nkù.

⁷Mo' mèn Nsi se' mbaṅ i ntshob ndù: Mfen, kà bin sàm ntshu ntsho Israél zin, nummbe Tshùaben ke' be bo Israél, Tshùaben ke' be boa tshen nshum Efraim nà.

⁸A be ze bin à bo nèn nà, mb'o a' tswe nda'te yu mba' tshwèt ntsho num tsemo' bon tshu; Nsi yôg ngù o vù mbwe ngakeban o, nummbe Nsi ghù mba' netomte bo ze nema' mèn nsi.

⁹Amatsia tshob mèn Nsi ndù: M'a' ghù à ndùke num talaṅto nkàb nkù ze me fà ntshu ntsho Israél l'à? Mèn Nsi bùnte ndù: Tshùaben ku'ni nefà wù ntshùa ndùlala.

¹⁰Ndùlala Amatsia fagte ntshu ntsho z'a fe Efraim nà, ndù bo bèn njam la' bo. Là, bo ya ntù num Yuda neshu, ndo mbèn njam la' bo, ntùm tonte yantù.

¹¹Amatsia fèn ntù, ntshagte ze ngô. A nèn tômbo' ngwa, ntsho bwe ntshùa ben ntsha' gham netèt tse nshum Seir ntsho.

¹²Tse nshum Yuda ghom ben ntsha' gham ntùnntùn, ndo' yub nèn yi num ntshùa mo' gholoṅ, ntsho bwe ntèn yub ma'te nsi; njoṅ yub fa kwùte.

¹³Mba tà ndùlala, ntshu ntsho ze Amatsia ta' yub ndù kà boa bo nèn ntsho là be bèn njam nkam ntusô Yuda ntsho neto' Samaria nèn nkum Bét-Horon. Bo zwite ben ntsha' tat, ndo' ntsha' kua' yàm neshu.

¹⁴Ndùse ba Edom vù ntsho Amatsia bèn njam nà, a ghù bo lo' tse nsi nshumnshum Seir nse' yi, a lo' yub ngù ba nsi yi; a vù nsi mbwe bo, mfà ba labinda bo.

¹⁵Ndùlala yantù Tshùaben kam num Amatsia, a tum ta' ngatshob ntshob Nsi mbaṅ i, a tshob yi ndù: Numk'o ndiag tse nsi yen nzwit mèn ni ke be ndù bo tshu' yub nzwit mèn mum mbu mu à?

¹⁶Ndùs'a ke ntshob là, Amatsia tshob yi ndù: Bag lo lo' o ngù ngafà ntag mfen yi ké? Tum nsen ni, numk'o ndiag ndù bo lab o à? Ngatshob ntshob Nsi tum bwe, mbe tum ntshob ndù: Me lèn ndù Nsi jù' nebagt'o mb'o ghù yen nu là, ke bam neju' ntag màm nà.

¹⁷Ndùse Amatsia mfen Yuda momte tu wul i là, a tum bo nèn ntshob Yoas nshum Yoakaz, nshum Yéhu, mfen Israél ndù: Se' be yente se se.

¹⁸Yoas mfen Israél tshob bo tshob Amatsia mfen Yuda ndù: Njô z'a be Liban nà lo tum bo tshob sédra z'a Liban nà ndù: Fà ngon o nshum àm ghù nzwi i yi. Ndùlala nyàm tshwèt tse bo be Liban nà be tshùa nyiaṅte njô nku.

¹⁹O tshùa ba Edom ntsho ntù' ke nka'te. Ndonni tswe la' o ntsiaṅte ntùm nkuni mu. Numk'o nke nkô neto' nu z'a nsi sag o l'à? Yen nu là ghù neton mbu mu mba mi Yuda.

²⁰Là, Amatsia ke bam mb'a tshob yi là, nummbe Nsi lo jù' nefà yub mum mbu ngakeban mba bo ghamte tse nsi ba Edom nà.

²¹Yoas mfen Israél ko' bo yente se se, yi bo Amatsia mfen Yuda Bét-Shemesh z'a b'a dù' Yuda là.

²²Israél tshùa Yuda ntsho, mba we lo kù nèn ntùm ze ntàb.

²³Yoas mfen Israél lo' Amatsia Bét-Shemesh. Amatsia b'a mfen Yuda, mbe nshum Yoas, nshum Akaz. A lo' i nèn yi Yérusalém, nto ta' fa ndù a ghù mbu nkù bàa num kàbngô z'a be Yérusalém nà, neto' num nzendà Efraim nèn nkum nzendà z'a tôg bwe là.

²⁴A lo' njoṅ tshu nebom fa ts'a be ntùm Ndà Nsi, la' Obéd-Edom, mba ntùm tshunkàb ndà mfen nà; a bèn ndo' mba benntùn nèn yi Samaria.

²⁵Amatsia nshum Yoas mfen Yuda tswe ngu'njù ntshob tàn gham ndùse Yoas nshum Yoakaz mfen Israél kwù là.

²⁶Tshé' mfa' Amatsia, mi mbwe boa mi njam, bo kite ntùm ṅwa'ni fenfen Yuda bo Israél.

²⁷Fe ndùse Amatsia sô wul i num Tshùaben, a kù nèn Lakis, nummbe bo lo ze ntsham i Yérusalém; là bo bwe i tà nkum Lakis, zwi i.

²⁸Bo ket fe i num ba nyàmdiaṅ nse' ntshoṅ boa tà tse ntùm tusô Yuda.