Read Medumba 2 Kronika 28 Bible Online

2 Kronika 28 - Medumba bible

2 Kronika 28

¹Akaz lo be jù fen ndù a ghù ngu'njù ṅam mbàa. A tô num ngu'njù ntshob ntôg gham, nke ntswe Yérusalém. A ke ghù nu ndaṅndaṅ num miag Tshùaben mba tàab David na' ngù là.

²A zin à num nze ze fenfen Israél na' nzin bwe là; a lo' tùn nabte ba bebun Baal yi,

³a ton ba labinda ntùm tômbo' bon Hinnom, nton mba tse nshum mbwôge, ndo' fi'te num tshùaya'nu tse ngôngô tse Tshùaben na' nta' yub mbwe bon Israél na' nke ngù là.

⁴A fà tshule'te, ma' ndu' ntùm mbwe', num nkônga mba tun ntù fi.

⁵Tshùaben Nsi i swèn i ntùm mbu mfen Siria; ba Siria tshùa yub ntsho, ngom tse yàm ndo' ngù ghandàtsha yi, ndo' yub nèn yi Damas. Tshùaben bèn nswèn i mba ntùm mbu mfen Israél, a ton i ntsho kua' kebwô.

⁶Pékash nshum Remalia zwite ben ntsha' bon bàa nkù Yuda num ta' lé'njù. Njoṅ yub fa na' mb'a ba neta nduku. A na' mb'a nummbe bo lo ghua' Tshùaben, Nsi tà tshobe.

⁷Zikri ngama' ntsho z'a fe Efraim nà zwi Maaséya nshum mfen, nzwi Azrikam tàndà ndà mfen bo Elkana ze mfen ke mbe, a bèn mbatte là.

⁸Bon Israél ghom ghandàtsha netèt fèt tshob ben ntsha' nkù bàa, bènnzwi, nshumnshum boa ngonngon, ndo' ntsha' bo neshu nèn yi Samaria.

⁹Mo' ngatshob ntshob Nsi lo be bwe lén se Obéd. A nèn mbwe ntshu ntsho z'a ke mbèn Samaria là, ntshob bo ndù: Tshùaben Nsi tà tsin ya ntù num Yuda kà nswèn i ntùm mbu mine. Bin lo' à tshùagntù kà nzwite yub yi. Yen nu là ko' tà nkum kamànyam.

¹⁰Ndonni bin kwate nelo' bon Yuda bo Yérusalém ngù ghafa' tsin tse bandum boa tse bènnzwi yi! Là, bin kwate mbe bin ke' fàn nu mbwe Tshùaben Nsi zin ké?

¹¹Ndonni bin ju' me, nta' tshen kuan ntsho li tse bin ghom netèt fèt tsin nà; nummbe tonte yantù Tshùaben num num bin.

¹²Tsemo' fenfen tse nshum Efraim, Azaria nshum Yokanan, Bérékia nshum Meshillemot, Ezékia nshum Shallum bo Amasa nshum Hadlai, ya ntù, nga ben bo ke mfe ntsho là, ntshob bo ndù:

¹³Be bin ke ghù tshen kuan ntsho là tsho nsen ni; nummbe bin ke ndiag neghù bag fàn à nu mbwe Tshùaben. Bin ke ndiag nekwi't'a nukebwô tshag num mfànnu mage. Bag a' be ghafànnu, mbe ndù tonte yantù Tshùaben num num Israél.

¹⁴Ba soyé faṅ kuan ntsho bo ntsha' mbwe fenfen mba mbwe mbumte fa.

¹⁵Tshen ben tse be lo netsiaṅ ndèn mub mfe tu là lo nsi ndo' kuan ntsho. Bo lo' ntsha' ma' nzwe yi num tse bo be tunntôg là, mfà nzwe boa nketo' bo, ngù bo jù mbèn nu. Bo yo' yube, ndo' yub nèn yi Yériko, tusô ntene, mbaṅ fèt tshobe. Bo ghù tse bo bot là ko' num ba kekwène. Yen nà be tôg bo bèn tshob Samaria.

¹⁶Akaz tum ba ntum bo nèn mbètte mfen Asiria ywimte.

¹⁷Ba Edom bèn nse' nton Yuda ntsho, ndo' kuan ntsho nèn yi.

¹⁸Ba Filistia kab mbu num ntusô Yuda mi à be tômbo' là mba mi à ntèn nà; bo lo' Bét-Shemesh, Ajalon, Guédérot, Soko boa ntusô mi a ghebte là, Timna boa ntusô mi a ghebte là, Guimzo boa ntusô mi a ghebte là. Bo tete ntùm men ntusô là.

¹⁹Nummbe Tshùaben lo tam tuswe tu Yuda num Akaz, mfen Israél z'a na' nkag va' Yuda, ngù nukebwô num Tshùaben nà.

²⁰Tilgat-Pilnéser mfen Asiria se' num i, mfa' num i mba ngakeban nà, ke tomt'é.

²¹Nummbe Akaz lo lagte ndà Tshùaben, ndà mfen bo ndà fenfen, mfà nda' yi mfen Asiria; yen nà ke ywimt'é num sàm ju.

²²Ndùse mfen Akaz ke' ntùm sobni là, a nke nke' ngù nukebwô num Tshùaben.

²³A fà tshule'te tse nsi Damas, tse bo lab i là ntshob ndù: Mba tse nsi fenfen Siria tshwèt njwimte yub là, m'a' fà tshule'te bo, bo ywimt'àm. Là, bo bèn mbe ze ju fa'te mba ze njoṅ ba Israél fa.

²⁴Akaz tse'te tshundà ndà Nsi, mbe'te tshundà ndà Nsi mfémfé. A tam tse nzendà ndà Tshùaben tu, mbom ntômbwôg num njoṅ ntôg Yérusalém fa.

²⁵A ghù ba mbwe' mba ntùm sit tusô Yuda lo, num neke nton ba labinda tsemo' nsi bwe. A tshùa ndùlala nkamte yantù Tshùaben, Nsi ba tà tse.

²⁶Tshé' mfa' mi boa njoṅ mi ngùninu fa, mi mbwe boa mi njam, bo kite ntùm ṅwa'ni fenfen Yuda boa tse Israél.

²⁷Akaz nèn ntèt tà tse, bo tshoṅ i tusô Yérusalém, nummbe bo lo ke yab i ntùm mi mfi fenfen Israél. Nshum i Ezékia tô num ze dù'.