Read Medumba 2 Kronika 29 Bible Online

2 Kronika 29 - Medumba bible

2 Kronika 29

¹Ezékia lo be jù fen ndù a ghù ngu'njù ntshob tàn ṅam mbàa. A tô num ngu'njù ntshob bwe'e ṅam mbàa, nke ntswe Yérusalém. Lén màab na' mb'a Abiya, mbe ngon Sakaria.

²A ghù nu ndaṅndaṅ num miag Tshùaben, kua' mba tàab David na' ngù là.

³A lo be ghù tamngu' num fen, ntùm mbwe ṅwù, a tsho' nzendà ndà Tshùaben, mbèn nabte njoṅ i fa.

⁴A ghù ghafà tshule'te boa ben Lévi se', ngù ta' mbumte num dù' z'a be ntumnyam nà.

⁵A tshob bo ndù: Ben Lévi, bin ju' me, bin lànte wut tsin ndonni, ndànte ndà Tshùaben Nsi tà tsine. Bin ma' mba ke lo z'a be ze nesagte là ntshundà, nsô i dù' nelàne.

⁶Nummbe tà be lo ghù nukebwô, ngù ju z'a ke' bwô là num miag Tshùaben Nsi be. Bo lo ghua' i, ntsho' lag sob num dù'ntswe Tshùaben, ndo' mvèn yub ntam i yi.

⁷Bo lo tam mba ba nzendà ndà Tshùaben tu, mbiag ndambo, ke bèn mfà tshob ba labinda, ke bèn nton tshob ba nyàm Nsi Israél ntùm dù' nelàne.

⁸A ndùlala ze yantù Tshùaben na' mbe num Yuda bo Yérusalém, k'a swèn yub mbu va' là, ngù bo tù' fam, mbe ju tshabte, mba bin tshwèt njen miag min sènni là.

⁹A tshùa ndùlala kà tà tsin ngwù num ntshùag ṅwi, tshag nshum, tshag ngon boa zwi tshag mbe ndà kuan.

¹⁰Ndùlala me kwate newat kàn bag Tshùaben, Nsi Israél, ndù tonte yantù i lo num be.

¹¹Nshumnshum tshàm, ndonni kà bin bèn nebe ghawag; nummbe Tshùaben lo tsho' zin ndù bin ke ntsin mbwe i ntùm fa' se, mbe ghafa' tse, nke mfà ba labinda yi.

¹²Ben Lévi lo nsi: A na' mb'a: Mahat nshum Amasai, Yoél nshum Azaria, tse nshum ben Kéhat; boa tse nshum ben Merar, Kis, nshum Abdi, Azaria nshum Yéhalléléel; boa ben Guershom, Yoak nshum Zimma, Edèn nshum Yoak;

¹³boa tse nshum Elitsafan, Shimri bo Yeiél; boa tse nshum Asaf, Sakaria bo Mattania;

¹⁴boa tse nshum Héman, Yéhiél bo Shimei; boa tse nshum Yédutun, Shemaéya bo Uziél.

¹⁵Bo tse'te fèt tshobe, mbe miagte nelànte wut tshobe, nse' ndànte ndà Tshùaben, mba mfen tshob là bo mba Tshùaben bètte ntùm ntshob mi là.

¹⁶Ghafà tshule'te tsho ntùm ndà Tshùaben num nelànt'é; bo sô njoṅ tshu nesagte fa tse bo tèt ntùm ndà Tshùaben nà, njab bam ntshundà ndà Tshùaben, dù' ze ben Lévi kwé ndo' nèn yi njam njù, ntùm fub Kédron nà.

¹⁷Bo to' nelànte dù' ndùlal'a mbwe lé'njù ntùm mbwe ṅwù. A be num mbatte lé'njù fome ntùm ṅwù bo tsho ntùm nzendà Tshùaben, njab lé'njù fom nelànte ndà Tshùaben; bo miagte fa' num mbatte lé'njù ntshob fom gham ntùm ṅwù.

¹⁸Yen nà be tôg bo nèn la' mfen Ezékia ntshob yi ndù: Bag lànte njoṅ ndà Tshùaben fa, tômbwôg neton ba nyàm bwe boa njoṅ tshundà fa, téblé bàn le'te boa njoṅ tshundà fa.

¹⁹Bag lo bèn njab njoṅ tshundà fa tse mfen Akaz na' ndo' mba tshu banban num ze ngelaṅ nà nka, mbèn ndànte njoṅ i fa. A lo ghù ndùlala ntùm mfànnu mi. Njoṅ i fa be mbwe tômbwôg Tshùaben nà.

²⁰Mfen Ezékia lo nsi mà nkebnjù ntse'te fenfen tusô fa, nko' nèn ndà Tshùaben.

²¹Bo fà mfot mfô sammbàa, nkomnjù sammbàa, mfà njùmbwe boa mfot mbwe, num tshule'te tamte fa num fen, num dù' nelàne, mba num Yuda. Mfen bètte ghafà tshule'te tse nshum Aron ndù bo ton tshen tshu là num tômbwôg Tshùaben.

²²Ghafà tshule'te wat ba nyàmna', ndette lem tshob ndo' naṅ num tômbwôge; bo wat nkomnjù naṅ lem tshob num tômbwôge; bo wat ba njùmbwe naṅ lem tshob num tômbwôge.

²³Bo lo' ba mfot mbwe netamte fa nse' yi mbwe mfen mba mbwe mbumte, bo tamte njab mbu tu bo.

²⁴Ghafà tshule'te wat yube, naṅ lem tshob num tômbwôg num netamte fa yi num nukebwô njoṅ bon Israél fa; nummbe mfen na' mbètte yen jule'te ze bo ton n'à num tu njoṅ bon Israél fa, num netamte fa yi.

²⁵A lo ghù bo tete ben Lévi ntùm ndà Tshùaben boa ba netsha'a, ndoṅ nse' boa ndoṅe, ndaṅndaṅ mba David, Gad ngayente mfen bo Natan ngatshob ntshob Nsi na' ntshob là; nummbe Tshùaben na' mbèn ntshùa num ntshu ghatshob ntshob Nsi tse mbètte ndùlala.

²⁶Ben Lévi lo' tshu nebu' ju yi ts'a b'a tse David là, ghafà tshule'te tshùb ba nta bu bo.

²⁷Ezékia bètte ndù bo ton nyàm num tômbwôge; ndùse bo to' neton nyàm nà mba kwi Tshùaben kam ze be ndùse. Bo tô kwi à ntùm ba nta boa tshu nebu' ju yi ts'a b'a tse David mfen Israél là.

²⁸Njoṅ mbumte fa te nkekwi' nsi, bo yob kwi, ntô ba nta, ngù be ndùlala tà nkum ndùse bo miagte neton nyàm nà.

²⁹Ndùse bo miagte neton nyàm nà, mfen boa ben tse bo à bo be là te nkekwi' nsi, ngwù nsi.

³⁰Yen nà be tôg mfen Ezékia boa fenfen tshob ben Lévi ndù bo lo' ntshob David bo ngatshob ntshob Nsi Asaf ngamte Tshùaben yi; bo ghamt'é ntùm ntù tsiaṅte, mben wut tshob nsi, ngwù nsi.

³¹Ndùlala Ezékia tshob ndù: Ndonni ze bin bèn mfà wut tsin Tshùaben num fa' se là, bin ghebte, ndo' tsin nyàm nse' yi, mfà tshule'te tse nenyàmte Tshùaben ntùm ndà i. Mbumte lo' ba nyàm nse' mfà tshule'te tse nenyàmte Tshùaben yi; njoṅ benntùn fa tse bo ghù bwôntù là fà ba nyàm bo ton.

³²Nyàm tse mbumte ton nà na' mb'a: Nyàmna' ṅam sammbàa, nkomnjù nkù boa njùmbwe nkù bàa; bo lo wat tshen nyàm nà nton Tshùaben.

³³Bo bèn mfà nyàmna' nkù ntôge boa njùmbwe ntsha' tat.

³⁴Mba ghafà tshule'te tse bo ton na' nkag là, fèt tshob ben Lévi ywimte yub tà nkum ndùse fa' mi là, mba ndùse tsemo' ghafà tshule'te na' ndànte yub wut là. Nummbe ba Lévi na' nke nànte nelànte wut tshob ntshùa ghale'te.

³⁵Fa' lo yàm neshu, nummbe nyàm bo ton nà lo yàme, boa nzit tshule'te tse nenyàmte Tshùaben, boa ndu' mi bo ke ma' njam nyàm tse bo ton nà. Tshù mba bo na' mbèn ntsiagte fa' ntùm ndà Tshùaben nà.

³⁶Ezékia bo ngô fa tsiaṅte mba Nsi na' mfà nelànte ntù ngô là, nummbe mba zit ju lo lo tôg à be kua' ndende.